ترانسپورتی بیرلشمه‌لر مملکت قتناویوللری نینگ ناتینچلیگی و بو یوللرده ترافیک‌لرنینگ باج آلیشی دن شکایت قیلیب آگاه‌لنتیریش‌لریچه، قیینچلیک‌لری حل بولمه‌گن صورتده، مدنی اعتراض‌لرگه قول اوریشه‌دیلر.
ییر ترانسپورتی نی منسجم قیله‌دیگن کینگش باشلیغی طلامحمد اتمان‌زی بوگون کابل ده خبری بیر ییغین اوتکزیب ایتیشیچه، مملکت قتناویوللریده ناتینچلیک و هر تورلی آت بیلن باج آلیش باشقه هر زمان گه قرهگنده کوپه‌یگن.
جناب اتمان زی نینگ کوپه‌یتیریشیچه، مملکت قتناویوللری نینگ وضعیتی کوپ یمان دیر و هر کون ترانسپورتی شرکت ایشلاوچی‌لریدن ایکی الی اوچ ته‌سی جان بیرهدی.
اونگه کوره، زابل ولایتی قلات تومنی نینگ «نورک» منطقه‌سیده بیر پوسته بار کیم دولت گه قرشی قوراللی کیشیلر نینگ قولیگه دیر و بو پوسته هر دایم ترانسپورتی شرکت ایشلاوچیلری نینگ مالی و جانی نی آله‌دی.
اتمان زی نینگ ایتیشیچه، بوندن آلدین هم سابق ایچکی ایشلر وزیرلیگی و زابل پولیس قومندانی بیلن قتناویوللر خوفسیزلیگی اینیقسه «نورک» پوسته‌سی حقیده صحبت قیلگن و جاری هفته اداغی گچه قیینچلیک‌لری حل بولمه‌گن صورتده، مدنی اعتراض‌لرگه قول اوریشه‌دی.
ترانسپورت بولیمی ده سرمایه یاتقیزگن کیشی‌لردن بیری محمد ظریف نینگ ایتیشیچه، مملکت قتناویوللری اینیقسه هرات-کابل قتناویولیده ناتینچلیک و باج آلیش کونسایین کوپه‌یماقده. اونگه کوره، ترافیک پولیسی تورلی بهانه‌لر بیلن اولردن پول آله‌دی.
بو توغریده ایچکی ایشلر وزیرلیگی مسئوللری نینگ فکرینی اورگه‌نیش ایسته‌دیک؛ بیراق کوپینچه سعی و حرکت بیلن موفق بولمه‌دیک.
بوندن آلدین هم مملکت قتناویوللری ناتینچلیک و باج آلیش باعث ترانسپورتی شرکتلر تامانیدن کمیده اوچ هفته باغلنگن ایدی کیم بو پیتده ییگولیک ماده بهاسی یوقاری کیتگن ایدی.