ایچکی ایشلر وزیرلیگی سوزلاوچیسی نینگ اورین باسری بسم‌الله حبیب نینگ سلام‌وطندار گه ایتیشیچه، پایتخت کابل شامل مملکت نینگ تورلی منطقه‌لریدن ۳۵ مینگ ۳۴۱ تیلنچی توپلنگن اولر ارا ۱۳ مینگ ۲۸۱ ته‌سی عیاللر دیر.
او نینگ کوپه‌یتیریشیچه، برچه تیلنچی‌لر ارا ۱۴ مینگ ۳۶۴ ته‌سی یاردم آلیش گه مستحق بولیب و قالگنی ایسه مسلکی تیلنچی تانیلگن.
او نینگ ایتیشیچه، محتاج تیلنچی‌لرنی یاردم آلیش اوچون افغان قیزیل آی جمعیتی گه تانیشتیرگنلر. «شهر بویلب ۳۵ مینگ ۳۴۱ تیلنچی توپله‌نیلگن اولر ارا ۱۳ مینگ ۲۸۱ ته‌سی عیاللر دیر، ۱۶ مینگ ۳۶۳ ته‌سی باله‌لر و بیش مینگ ۶۹۷ ته‌سی ایرکک‌لر دیر، مذکور تیلنچی‌لر نینگ ۱۴ مینگ ۳۶۴ ته‌سی مستحق و قالگن ۲۰ مینگ ۹۷۷ ته‌سی مسلکی تیلنچی تانیلگن و مستحق تیلنچی‌لر یاردم آلیش اوچون قیزیل آی جمعیتی گه تانیشتیریلگن.»
عین‌حالده، افغان قیزیل آی جمعیتی نینگ یاردم‌لر باشلیغی الیاس‌خیل ناصری گه کوره، کابل، بلخ، قندوز، قندهار و هرات شامل مملکت نینگ بیش زونیده، ۱۳ مینگ عیال مستحق تیلنچی گه معاش تعیینله‌گنلر.
او نینگ ایتیشیچه، یالغیز کابل ده اوچ مینگ ۷۰ تیلنچی گه یاردم کورسه‌تیلگن. «بیز یالغیز کابل ده اوچ مینگ ۷۰ تیلنچی گه یاردم بیردیک و توپلم روشده مملکت نینگ بیش زونیده ۱۳ مینگ مستحق تیلنچی گه یاردم بیرگن‌میز.»
بیزلرنینگ فیسبوک صحیفه‌میزگه باش اورینگ!
او نینگ کوپه‌یتیریشیچه، مملکت نینگ حاضرگی سرپرست حکومت رهبری هبت‌الله آخوندزاده نینگ فرمانی اساسیده، مملکت ۳۳ ولایتی ده هر آی مستحق بولگن تیلنچی‌لر گه سکیز مینگ ۵۰۰ افغانی معاش توله‌یدیلر و بو یاردم‌لر دوام تاپیشی ممکن.
سلام‌وطندار بیلن صحبت اوتکزگن ۲۸ تیلنچی عیال، حاضرگچه هیچ یاردم آلمه‌گنلرینی ایتگن بیرحالده، سرپرست حکومت ایچکی ایشلر وزیرلیگی و افغان قیزیل آی جمعیتی تیلنچی عیاللر گه معاش تولنگنینی ایتماقده‌لر.
سلام‌وطندار بیلن صحبت اوتکزگن مذکور عیاللردن بیری گه کوره، بایومتریک بولگن بولسه ده، لیکن حاضرگچه یاردم آلمه‌گن.
او نینگ کوپه‌یتیریشیچه: «قهرتان قیش ده هیچ یاردم بیریلمه‌دی، ایریم کسل اوی ده یاتگن، بو ییرده تیلنچی‌لیک قیلیش گه مجبور من.»
کابل شهری ده یاز موسومی ده ایسیق هوا ده توش چاغی ساعت ۱:۰۰ ده، بیر قولی گه اعصا و باشقه بیر قولی گه داکتر نسخه‌لری بولیب و دارو ساتووچیلیک قیله‌دیگن بیر دکان آلدیده تیلنچی‌لیک قیله‌یاتگن ۵۰ یاشر (مستعار اسملی) شفیقه بیلن روپه‌ره بولدیک.
او اقتصادی احوالی دن نالیب ایتیشیچه، مسلکی تیلنچی ایمس بلکه حیات قیینچیلیک‌لری باعث تیلنچی‌لیک قیلماقده.
بیش ییتیم باله سرپرستی بولگن مذکور عیال نینگ ایتیشیچه، حاضرگچه هیچ کیم یا که نهاد دن یاردم آلمه‌گن.
اونگه کوره: «بیش ییتیم باله سرپرستی‌من، آوقات‌لنیش گه نانی‌میز یوق، هر دقیقه ییغلب میندن نان سوره‌یدیلر، آته‌لری دستلب ماین پارتلشی باعث ناگران بولدی و کیین ایسه خودکش هجوم ده شهید بولدی، دولت دن هیچ ایسته‌گیم یوق چونکه حاضرگچه بیز گه یاردم بیرگن یوق.»
باشقه تاماندن، کابل شهری آلتینچی حوزه یشاوچیسی بی‌بی آمنه، کسل ایری یانیده اولتیریب و او نینگ دوالش اوچون یاردم سوره‌ماقده.
اوشبو عیال نینگ ایتیشیچه، حکومت کوچلری تامانیدن بایومتریک بولگن؛ لیکن حاضرگچه یاردم بیریلمه‌گن.
تیلنچی‌لیک دن اویلگن مذکور عیال گه کوره، بو کبی تیریکچیلیک دن حتا اولیش نی افضل کوره‌دی.
بیزلرنینگ توییترده هم تعقیب قیلینگ!
او نینگ کوپه‌یتیریشیچه: «ایریم مغزی خسته‌لیک طفیلی فلج بولگن بیر بالم بار بوینی سینگن ایش قیله آلمه‌یدی، مجبورلیک دن تیلنچی‌لیک قیلماقده‌میز، اوچ ییل دن بیری شو احوال ده میز.»
۳۳ یاشر شازیه اسملی عیال ایکی باله‌سی بیلن سرک اوستیده تیلنچی‌لیک قیلماقده، تیلنچی عیاللر گه معاش تعینله‌نیشیدن خبرسیزلیگینی بیلدیریب ایتیشیچه، اونگه معاش تعینلنگن تقدیرده هیچ قچان تیلنچی‌لیک قیلمه‌یدی.
اونگه کوره: «ایریم نینگ ایران کیتگنیدن آلتی آی بولماقده نیمه قیلیشنی بیلمه‌ی من عصبی قیینچیلیککه روپه‌ره بولیب من، ایریم ایران دن قونغیراق قیلیب قاچاقبر قولی گه توشگنینی ایتدی، اوندن هیچ احوالیم یوق، فرزندلریم اوچ آی پلاستیک فروش‌لیک قیلدی، طالبلر اولرنی تیلنچی‌لیک قیله‌دی دیب قولگه آلگندی، فرزندلریمنی اوی گه اولتیقیزیب و اوزیم اوشبو یول آرقه‌لی اولرنی نفقه‌سینی تأمینلش مقصدیده تلاش قیله‌یپمن.»
عام و خاص دن تیلنچی‌لیک قیله‌دیگن‌لردن باشقه بیری نینگ ایتیشیچه، اولر اونگی آلینیب و اولر گه معاش تعینلنمه‌گن تقدیرده، اقتصادی قیینچیلیک طفیلی باله‌لرینی ساتیش گه مجبور بوله‌دیلر.
او نینگ کوپه‌یتیریشیچه: «سابق‌لرده باله‌لر اوغیرلنر ایدی یا که عایله‌سی اقتصادی قیینچیلیک باعث ساتیش گه مجبور بولردی، نان بولمسه باله نیمه کیره‌ک، کمبغل‌لیک طفیلی باله‌لرینی ساته‌دیلر.»
عین‌حالده، عیال حقوقی فعاللریدن بیرقطاری، کمبغل‌لیک، ایش‌سیزلیک، سوادسیزلیک و ایچکی اوروش‌لرنی عیاللر نینگ تیلنچی‌لیک قیلیش گه یوز کیلتیریش یگانه عاملی عنوان قیله‌دیلر.
عیال حقوقی فعاللری نینگ ایتیشلریچه، سرپرست حکومت نینگ تیلنچی عیاللر گه معاش تعیینلش ریجه‌سی ناقص دیر؛ چونکه عیاللر ایش‌سیز بولیشی بیلن کونسه‌یین تیلنچی عیاللر سانی آشه‌دی و بوکبی ریجه‌لر اوزاق مدت اوچون نتیجه بیرمه‌یدی.
عیال حقوقی و سیاسی فعال دیوه‌پتنگ نینگ سلام‌وطندار گه ایتیشیچه: «تأسف بیلن مملکت ده تورلی حکومت‌لر کیلیب کیتدی، لیکن هیچ بیری تیلنچی‌لر گه دقت قیلمه‌دی، کمبغل‌لیک باعث اولر بو ایشنی قیلیش گه مجبور دیر، اولر گه شرایط یره‌تیش دولت نینگ بورچی دیر اینیقسه سرپرست‌سیز عیاللر گه، سرپرست حکومت هردایم عیاللر نینگ حقوقی تأمین ایتیلیشینی ایته‌دی، مذکور عیاللر نینگ قیینچیلیگی حلی اوچون اقدام قیلیشی کیره‌ک.»
عیال حقوقی فعالی حسنا روفی گه کوره، عیاللر گه یره‌تیلگن چیکلاولردن کیین، تیلنچی‌لر آره‌سیده تحصیل قیلگن عیاللر هم بارلیگی سیزیله‌دی.
او نینگ ایتیشیچه، تیلنچی‌لر ییغیلیشیدن آلدین حکومت تیلنچی‌لر سانی کوپه‌یشی گه توسیق بولیش گه مسئول دیر.
اونگه کوره: «دولت اوشبو عیاللر برابری ده مسئول دیر، بیز بوگون‌لیک کونده تحصیل قیلگن عیاللر نینگ تیلنچی‌لیک قیلیش گواهی‌میز، دولت تیلنچی عیاللرنی تورلی اداره‌لرده تعیینلب و اولرنی ایش بیلن تأمینلشی لازم.»
سرپرست حکومت ایچکی ایشلر وزیرلیگی، کابل شهری بویلب تیلنچی‌لر توپله‌نیش جریانی یکونیدن خبر بیرسه ده؛ لیکن کابل شهری سرک‌لریده تحصیل قیلگن‌لر شامل عیاللر تیلنچی‌لیک قیلماقده.
عیاللر گه یره‌تیلگن چیکلاولر، اولر نینگ ایش‌سیزلیگی و کمبغل‌لیک عیاللر نینگ تیلنچی‌لیک قیلیش عاملی سنله‌دی.
