افغانستان اسلامی جمعیت حزب کاتب‌خانه سرپرستی عبدالرحمان حامد حمزه نینگ ایتیشیچه، تینچلیک پروسه‌سی نینگ مدیریت قیلیش افغانستان اهالیسی گه تیگیشلی دیر و مملکتده تینچلیک تأمین‌لنیشی اوچون اورته گه کیلگن فرصت‌دن فایده‌لنیش کیره‌ک.
جناب حمزه بوگون (جمعه ۲۱- قوس) کابل ده «افغانستان اوروش و تینچلیک وضعیتی نی تیکشیریش، افغانستانلیکلرارا سوزلشوولرنینگ برابریده‌گی فرصتلر و قیینچلیکلر» علمی سمیناریده بونده‌ی بیانات بیرگن.
اونینگ ایتیشیچه، دوحه ده افغانستانلیکلرارا سوزلشوولر نینگ نتیجه گه ایریشیشی اوچون سیاسی اجماع لازم دیر و حکومت نینگ بونده‌ی حرکتی بیلن بو پروسه نتیجه بیرمه‌یدی.
شونینگدیک اسلامی جمعیت حزب کاتب‌خانه سرپرستی نینگ ایتیشیچه، حکومت نینگ یکه‌تازلیگی و تینچلیک پروسه‌سیده سیاسی سیمالرگه سهم بیریلمه‌گنی، مذکور پروسه گه ضرر ییتیشتیره‌دی.
مذکور برنامه ده خلق‌ارا علاقه‌لر تدقیقاتچیسی فرامرز تمنا نینگ ایتیشیچه، افغانستان تینچلیک پروسه‌سیگه دخیل مملکتلر، بو پروسه نی قیین‌لشتیرگن. او پاکستان و آمریکا نینگ بو پروسه نی اونملی اویینچی‌لریدن دیب اورغولشیچه، افغانستان حکومتی طالبان گروهی بیلن کیلیشگن بیرحالده، بو کیلیشوو قبول قیلینه‌دیگن بیر نتیجه بیرمه‌یدی؛ اونگه کوره، مذکور گروه نینگ عملکردی گه هیچ قنده‌ی اوزگریش کیلمه‌گن.
جناب تمنا بیاناتی نینگ بیر بولیمیده، آمریکا افغانستان تینچلیک پروسه‌سی خصوصیده صادق بولمه‌گن دیب اورغولشیچه، آمریکا جمهوررئیسی افغانستان تینچلیک پروسه‌سیگه اَره‌لشیش بیلن، اوز مملکتی نینگ فایده‌سینی توشونه‌دی.
اونینگ کوپه‌یتیریشیچه، سوزلشوولر نتیجه گه ایریشگندن کیین، طالبان کوپینچه قدرت گه قول تاپه‌دی و شونینگدیک نیچه ییل‌لیک اوروش هم مشروعیت تاپیشی ممکن.
جناب تمنا افغانستان تینچلیک سوزلشوولری نتیجه گه ایریشیشی خصوصیده حکومت نینگ سیاستی نی کوچسیز دیب ایتیشیچه، افغانستان تینچلیگی توغریسیده سیاسی و ملی اجماع یوق دیر و حکومت نینگ، حزبلر و سیاسی جریان‌لرنی تینچلیک سوزلشوولرنینگ فایده‌سیگه اوزگرتیریش اوچون کوچی یوق.
شونده‌ی بیرحالده، قطر پایتختی دوحه ده افغانستانلیکلرارا سوزلشوولر باشلنگنیدن اوچ آی اوتماقده. اوتگن هفته ایکی تامان هیأت‌لری طرزالعمل نینگ مقدمه‌سی اوستیگه کیلیشگن‌لریدن خبر بیریب ایتیش‌لریچه، سوزلشوولرنینگ آجنداسی اوستیگه صحبت باشله‌نیشی گه قرار قیلینگن.