افغانستان ده اوروش نی یکونلنتیریش اوچون تینچلیک سوزلشوولری حاضرگچه کوپ یخشی و یمان کونلرنی باشدن اوتکزگن، بیراق حاضر هم بو مملکتده تینچلیک تأمین ایتیلیشی اوچون دولت و طالبان تامانیدن اهالی گه هیچ قنده‌ی امید بیریلمه‌گن. نیچه کون آلدین آمریکا تشقی ایشلر وزیرلیگی جمهوررئیس غنی نی آگاه‌لنتیریب و تینچلیک سوزلشوولری نتیجه گه ایریشیشی اوچون اوندن قطار نفوذلی کیشیلر بیلن صحبت اوتکزیشی نی سوره‌دی.
مذکور نامه‌دن بیر نیچه کون اوتگندن کیین روسیه و ترکیه هم میدان گه کیردی و افغانستان اوروشی یکونله‌نیشی اوچون کیلگوسی کونلرده مسکو و انقره ده ییغین یولگه قوییلیشی خصوصیده خبرلر چیققن. روسیه رسمی‌لری ینگی‌لیکده افغانستان تینچلیک پروسه‌سیدن حمایت‌لرینی اعلام قیلیب و افغانستان ده وقتینچه‌لیک حکومت قوریلیشی دن حمایت بیلدیرگن.
سیاسی ایش بیلرمان‌لردن بیری باقر محسنی بو توغریده ایتیشیچه، افغانستان وضعیتی برچه تامان‌لرنی مشارکتی بیر حکومتدن حمایت قیلیش گه زورلنتیرگن. بیراق سیاسی ایش بیلرمان‌لردن باشقه بیری مصطفا علی‌زاده نینگ ایتیشیچه، وقتینچه‌لیک و عبوری حکومت دن حمایت قیلیش مملکت‌لرنینگ فایده‌سی اساسیده صورت تاپه‌دی. اونگه کوره، وقتینچه‌لیک حکومت ریجه‌سی اهالی نینگ مشارکتی بولمه‌گنده نتیجه بیرمه‌یدی.
بو توغریده جمهوررئیس‌لیک سرایی نینگ فکرینی اورگه‌نیش ایسته‌دیک؛ بیراق موفق بولمه‌دیک. بوندن آلدین جمهوررئیس محمداشرف غنی نیچه مرته وقتینچه‌لیک حکومت برابریده اوز قرشی‌لیگی نی بیلدیردی. او وقتینچه‌لیک حکومت توغریسیده سونگی بیاناتی ده ایتیشیچه، سیلاو آرقهلی قدرت انتقال تاپیشی او اوچون معامله قیلینمه‌یدیگن بیر اصل دیر، بیراق جمهورلیک ریاست سیلاوی یولگه قوییش تاریخی توغریسیده دنیا جماعه چیلیگی بیلن بحث اوتکزیش گه تیار دیر.
