اسلام امیرلیگی فواید عامه وزیرلیگینینگ تیمیر یول اورین باسری محمداسحاق صاحبزاده، یوقاری مرتبهلی هیئت باشچیلیگیده اوزبیکستان گه ییتیب بارگن.
فواید عامه وزیرلیگی سوزلاوچیسی محمداشرف حقشناس، بوگون (۳۱ سرطان/۲۲ جولای، چهارشنبه) ایکس اجتماعی ترماغیده بیر بیانیه ترقهتیب، بو وزیرلیک هیئتی افغانستان و اوزبیکستان اورتهسیده تیمیر یولی بوییچه همکارلیکلر کینگهیتیریلیشی، قوشمه لایحهلر ایزلنیشی و ایکی مملکت اورتهسیده آست قوریلمه لایحهلر عملگه آشیریلیش جریانی تیزلشتیریلیش مسئلهلری حقیده بحث ایتگنینی بیلدیرگن.
حقشناس گه کوره، صاحبزاده اوزبیکستان تیمیر یول اداره باشلیغی ظفر نظروف بیلن اوچرهشیب و افغان-ترانس لایحهسی بوییچه تدقیقات و تخنیک-اقتصادی اساسلش ایشلرینی باشلش، تیمیر یولنینگ هرات-مزارشریف یونهلیشی بوییچه تخنیک-اقتصادی اساسلش همده مطالعه حجتلرینی افغانستان گه تاپشیریش، هرات-مزارشریف تیمیر یولینینگ تورتینچی پورتیده قوشیمچه ترماقلر قوریش و تیمیر یول آرقهلی یوک تشوولرینی آشیریش مسئلهلری یوزهسیدن مذاکره آلیب بارگن.
بیانیهده اوشبو ییغیلیشده تامانلر، تیمیر بولیمیده همکارلیکلرنی مستحکملش، سودا علاقهلرنی کینگهیتیریش، سودا توارلر تشیلیشنی آشیریش همده سوداگرلر و سرمایه کیریتووچیلر گه کوپراق قولیلیک یرهتیلیشی گه تأکیدلنگنی قید ایتیلگن.
افغانستان و اوزبیکستان اورتهسیده تیمیر یول ساحهسیدهگی همکارلیکلرنینگ کینگهیشی اقتصادی و منطقهوی همکارلیکلرنی رواجلنتیریش، سودا و ترانزیت حجمینی آشیریش همده افغانستاننی مرکزی آسیا و جنوبی آسیا اورتهسیدهگی مهم ترانزیت چارراههسیگه ایلنتیریشده کتته اهمیت کسب ایتهدی.
