کابل شهریده تورت نفر یاش تدبیرکار بیر میلیون افغانی سرمایه بیلن «همرا» خذمتلر اپلیکیشن‌نی ایشگه توشیرگن؛ یشاوچیلرنینگ کونده‌لیک خذمتلردن فایده‌لنیشینی آسانلشتیریش مقصدیده یره‌تیلگن اوشبو «ایلاوه» (نرم‌افزار) آنلاین تکسی، طعام بویورتمه قیلیش، محصولات ساتیب آلیش، شفاکاردن نوبت آلیش، مهمانخانه‌نی بوک قیلیش و آنلاین تولاو کبی ۱۲ تورده‌گی خذمت‌نی یگانه پلتفرمه‌ده بیرلشتیرگن. اوشبو تشبث فقرالرنینگ وقت و خره‌جتلرینی تیجش بیلن بیرگه، کیچیک تجارت‌نی قوللب-قوتلش همده ینگی ایش اورینلرینی یره‌تیش مقصدیده هم عملگه آشیریلگن.
کابل شهریدن بولگن ۳۰ یاشلی محمدعلی یوسفی، اوشبو ایلاوه اساسچیلریدن بیری، «همرا» نی یره‌تیش غایه‌سی میلادی ۲۰۲۵ ییل آخریده جمعیت احتیاجلرینی اورگنیش و فقرالرنینگ کونده‌لیک خذمتلردن فایده‌لنیشده دوچ کیله‌یاتگن معمالرنی انیقلش جریانیده پیدا بولگنینی ایته‌دی. او شونده‌ی دییدی: «جمعیت احتیاجلرینی اورگنیش و اولرنینگ طلبلرینی تحلیل قیلیش نتیجه‌سیده شونده‌ی خلاصه گه کیلدیک کی، اگر جمعیت‌نینگ برچه قتلملری فایده‌لنه آله‌دیگن، اهالی‌نینگ کونده‌لیک حیاتیده ضرور بولگن اجتماعی خذمت‌لرنینگ اساسی قسمینی اوزیده جمعله‌گن ایلاوه یره‌تسک، فقرالرنینگ اوشبو خذمتلردن فایده‌لنیشنی آسانلشتیریشی‌میز ممکن. شو بیلن بیرگه، بو آرقه‌لی اهالی‌نینگ وقتی و خره‌جتلرینی هم تیجش ممکن.»
یوسفی‌نینگ سوزلریگه کوره، اوشبو پلتفرمه تورت نفر یاش تامانیدن تشکیل ایتیلگن بولیب، حاضرده جماعه اعضالری سانی ۱۰ نفر گه ییتگن. شونینگدیک، ایلاوه میلادی ۲۰۲۶ ییل باشیده رسماً ایشگه توشیریلگنیدن بویان اونده ۱۰ مینگدن آرتیق کیشی رویخطدن اوتگن. اونگه کوره: «اوشبو تیزیم ۲۰۲۶ ییل باشیده رسماً ایشگه توشیریلگنیدن بویان اونده قریب ۱۰ مینگ کیشی رویخطدن اوتگن. شونینگدیک، «همرا‌گرین» بولیمیده هم کوپلب کونگیلیلر اطراف-محیط‌نی محافظه قیلیش یونه‌لیشیده فعالیت یوریتیب، اوشبو بولیم بیلن همکارلیک قیله‌دی.»
کابل یشاوچیسی بولگن ۳۴ یاشلی نوراحمد مرادی، همرا ایلاوه‌سی‌نینگ ینه بیر اساسچیسی، اوشبو دستور خصوصیت‌لریدن بیری آنلاین تولاو تیزیمی ایکنینی بیلدیره‌دی. اونینگ ایتیشیچه، اوشبو تیزیم مملکت ایچیده و خارج‌ده یشاوچی فقرالر گه افغانستانده‌گی عایله اعضالری و یقینلری اوچون آزیق-آوقت همده ضرور محصولاتلرنی بویورتمه قیلیش و اولرنینگ حقینی آنلاین طرزده تولش امکانینی بیره‌دی.
مرادی‌نینگ کوپه‌یتیریشیچه، ایلاوه جمعی ۱۲ تورده‌گی خذمت‌نی اوز ایچیگه آله‌دی. اولردن ایریملری اله‌قچان ایشگه توشیریلگن، قالگنلری ایسه ایشلب چیقیلماقده. او شونده‌ی دییدی: «همرا» شهر خذمتلری ایلاوه‌سی حاضرده فایده‌لنوچیلر گه ۱۲ تورده‌گی خذمت‌نی تکلیف ایته‌دی. اوشبو خذمتلر آنلاین تکسی، آنلاین موترسایکل، طعاملرنی آنلاین بویورتمه قیلیش، دکانلردن کونده‌لیک احتیاج ماللری و محصولاتلرنی خرید قیلیش، طبی خذمتلر و شفاکاردن نوبت آلیش، مهمانخانه‌لرنی آلدیندن بند قیلیش، کوچمه ملک خذمتلری، شهرلرارا و شهر ایچیده تکسی خذمتلری، شونینگدیک، بیلیم یورتلر گه آنلاین رویخطدن اوتیشنی اوز ایچیگه آله‌دی. بوندن تشقری، اوشبو ایلاوه‌ده فقرالرنینگ اجتماعی خذمتلر و امکانیتلردن فایده‌لنیشنی آسانلشتیریش مقصدیده فعالیت یوریتووچی ایکیته اجتماعی خذمت بولیمی هم تشکیل ایتیلگن.»
شو بیلن بیرگه، همرا اپلیکیشن ایریم فایده‌لنوچیلری اوشبو پلتفرمه شهر خذمتلریدن فایده‌لنیشنی آسانلشتیرگنی و کونده‌لیک یوموشلرینی بجریشده اولر گه یاردم بیره‌یاتگنینی ایته‌دیلر.
کابل‌لیک ۲۰ یاشلی و طب معالجوی فاکولته‌سی طلبه‌سی فضل‌الله‌نینگ ایتیشیچه، او اوچ آی‌دن بویان اوشبو ایلاوه‌دن فایده‌لنیب کیلماقده و شو وقتگچه تکسی همده طعام بویورتمه قیلیش خذمتلریدن فایده‌لنگن. او شونده‌ی دییدی: «مین اوشبو ایلاوه‌دن طعام بویورتمه قیلیش و تکسی خذمتلری اوچون فایده‌لنه‌من؛ اونینگ تکسی خذمتی حقیقتن هم بیر قطار قوله‌ی لیکلر گه ایگه. چونکه بعضاً تکسی تاپیش قیین بوله‌دی. بیراق اوشبو ایلاوه آرقه‌لی تکسی گه احتیاجیم بولسه، ایستلگن وقتده بی‌ملال بویورتمه بیریشیم ممکن. ایندی تکسی تاپیش اوچون یول چیتیده کوتیشیم یا کی اوزاق مصافه‌نی پیاده باسیب اوتیشیم شرط ایمس.»
شو بیلن بیرگه، تکنالوژی متخصص‌لری خذمت کورسه‌تیشگه مولجللنگن ایلاوه‌لرنینگ ایشگه توشیریلیشی رقملی اقتصادیات‌نی رواجلنتیریش و فقرالرنینگ تورلی خذمتلردن فایده‌لنیش امکانیتلرینی کینگه‌یتیریش یولیده‌گی مهم قدم بولیشی ممکن‌لیگینی ایته‌دیلر. اولرنینگ فکریچه، اینترنت‌دن فایده‌لنیش امکانیتی، ایلاوه‌نینگ قوله‌یلیگی و فایده‌لنووچیلر ایشانچینی قازانیش بونده‌ی پلتفرمه‌لر موفقیتی‌نینگ مهم عامللری حسابلنه‌دی.
تکنالوژی بوییچه متخصص منصور فیضی‌نینگ ایتیشیچه، بونده‌ی ایلاوه‌لردن فایده‌لنیش فقرالرنینگ وقتی و خره‌جتلرینی تیجش بیلن بیرگه، مملکتده رقملی اقتصادیات‌نینگ رواجلنیشیگه هم ثمره‌لی حصه قوشیشی ممکن. اونگه کوره: «بونده‌ی ایلاوه‌لرنینگ ایشگه توشیریلیشی افغانستان‌ده خذمتلرنی رقملشتیریش یولیده‌گی مهم قدم بولیشی ممکن. اوشبو ایلاوه‌لر فقرالر گه تورلی خذمتلردن هیچ جایگه بارمسدن و فقط موبایل تلفون آرقه‌لی فایده‌لنیش امکانینی یره‌ته‌دی. بونده‌ی تشبث‌لر خذمت کورسه‌تیش جریانینی آسانلشتیریشی، تیزلشتیریشی و ثمره‌دارلیگینی آشیریشی، شونینگدیک، فقرالرنینگ وقتی و خره‌جتلرینی تیجشگه خذمت قیلیشی ممکن.»
ینگی ایش اورینلرینی یره‌تیش و ینگی تشکیل ایتیلگن تجارت لایحه‌لرینی قوللب-قوتلش جمعیت‌نینگ مهم احتیاجلریدن بیری بولیب تورگن بیر شرایط‌ده، «همرا» کبی تشبث‌لر یاشلرنینگ تکنالوژی ساحه‌سیده‌گی ظرفیتیدن فایده‌لنیش همده فقرالر گه ینگی خذمتلرنی تقدیم ایتیش اوچون امکانیت یره‌تیشی ممکن.
