افغانستانده کوپلب عیاللر اوچون ایش و تعلیم امکانیتلری چیکلنگن شرایطده، اینترنت اولرنینگ کوندهلیک حیاتیدهگی اینگ مهم واسطهلردن بیریگه ایلنگن. سلاموطندارنینگ غزنی، کاپیسا، بغلان، لغمان، پنجشیر، پروان و کابل ولایتلریده ۲۵ عیال بیلن صحبت نتیجهلری شونی کورستهدی، بو عیاللر اینترنتدن تعلیم آلیش، علاقه اورنهتیش و معلوماتلر گه کیریش مقصدیده فایدهلنیشهدی.
صحبت قیلگن ۲۵ عیالدن ۷ نفری، هیچ بیر معماسیز اینترنت پولینی تولشلرینی ایتهدیلر؛ بیراق ۱۸ نفری اینترنت پولینی قیینچیلیک بیلن تولشلرینی معلوم قیلهدی. اوشبو تدقیقات نتیجهلریگه کوره، بو عیاللر هر آی ۱۰۰۰ دن ۳۰۰۰ افغانی اینترنت اوچون پول صرفلهیدیلر؛ بو خرهجتلرنینگ برچهسی عایلهنینگ باقووچیسی تامانیدن تولنیلهدی. آته، ایناغه و بعضی حاللرده ایر اوشبو خرهجتلرنی تأمینلش گه مسئول دیر.
بو عیاللرنینگ بیر قسمی کوپراق اینترنتدن فایدهلنیشی سببلی عایله تامانیدن نظارت گه آلینهدی و بعضیلری ایسه بوندهی چیکلاولر بیلن دوچ ایمس. گزارشده صحبت قیلگن عیاللرنینگ ایتیشیچه، حیاتلریده اینترنتدن کوپ فایدهلنهدیلر. تعلیم منبعلریگه کیریش، باشقهلر بیلن علاقه اورنهتیش و معلومات آلیش کبی احتیاجلر اولرنینگ اینترنت گه بولگن باغلیقلیگینی کوچهیتیرگن.
کابللیک ۱۷ یاشلی مروه نوری، اینترنت خرهجتلرینی آتهسی تولهیدی، اینترنتدن تعلیم آلیش اوچون فایدهلنیشینی بیلدیرهدی. اونینگ کوپهیتیریشیچه، اینترنت خرهجتینی اوزی تولهی آلیشینی خواهلسه-ده، بونگه قوربی ییتمهیدی. او شوندهی دییدی: «آنلاین درس اوقیمن و اینترنت آرقهلی دوستلریم بیلن علاقه قیلهمن. اینترنت خرهجتلرینی آتهم تولهیدی، شونینگ اوچون اینترنتدن فایدهلنیشده کوپلب چیکلاولر و معمالر گه دوچ کیلهمن.»
غزنی یشاوچیسی ۱۷ یاشلی منیژه، اینترنت پولینی عایلهسی تولهیدیگن قیزلردن بیری. اونگه کوره، افغانستانده اینترنت نرخی یوقاری و تیز توگهیدی. اونینگ ایتیشیچه: «اینترنتدن آنلاین تعلیم آلیش اوچون هم، ینگیلیکلر و معلومات آلیش اوچون هم فایدهلنه من. عایلهم اینترنت پولینی تولهگنده، اولر چیکلاولر اورنتهدی و بعضاً حتا جهلی چیقهدی. افغانستانده اینترنت نرخی یوقاری و تیز توگهیدی.»
اوشبو گزارشده صحبت قیلگن عیاللردن باشقه بیرقطاری، تعلیم گه دوام ایتتیریش و آنلاین ایش اوچون اینترنتدن فایدهلنیشلرینی ایتهدیلر.
کابللیک ۱۸ یاشلی زینب شوندهی دییدی: «اینترنت پولینی سینگلیم تولهیدی، چیکلاو یوق؛ بیراق آنهم نظارت قیلهدی و ایتهدی اینترنتدن آزراق فایدهلن؛ چونکی آنلاین درس اوقیمن، عایلهنینگ باشقه اعضالریگه نسبتن اینترنتدن کوپراق فایدهلنهمن.»
لغمان یشاوچیسی ۲۵ یاشلی حسنا بوتوغریده شوندهی دییدی: «مین ایش و اوقیش اوچون اینترنتدن کوپراق فایدهلنه من؛ چونکی کوپینچه ایشلریم اینترنت گه باغلیق. اینترنت مصرفی کوپ و انده-سنده عایلهم اینترنت کوپ مصرف قیلگنیمدن نالیدی.»
پروانلیک ۱۹ یاشلی مریم گه کوره: «اینترنتدن اوقیش و قرآنکریمنی حفظ قیلیش اوچون فایدهلنهمن و اینترنت پولینی آتهم تولهیدی. مین کوپراق واتسپدن قوللنهمن؛ بیراق عایله ایرککلری کولگو-اویین اوچون اینترنتدن فایدهلنیشهدی.»
کابللیک ۲۰ یاشلی رخسار شوندهی دییدی: «اوقیتیش اوچون قوللنهمن و اینترنت پولینی اوزیم تولهی من؛ چونکی کوپینچه وقتلر اوقیتیش بیلن مصروف من، مین عایله ایرککلریگه نسبتن کوپراق اینترنت مصرف قیلهمن.»
عیال حقوقی فعاللری، عیاللرنینگ اینترنتدن فایدهلنیشینی ضروری دیب، ایش و اوقیش گه بولگن چیکلاولر سببلی اینترنت عیاللرنینگ حیاتیگه سیزیلری درجهده مثبت تأثیری بولیشی ممکن دییدیلر. اولر حکومتدن عیاللر اوچون اینترنت مصرفینی کمهیتیریب و قولیلیک یرهتیشنی ایستهیدیلر.
عیال حقوقی فعالی سوریا یوسفی، آنلاین اوقیش و دیجیتال ایشلرنی بجریش اوچون عیاللرنینگ اینترنتدن قوللنیشینی فایدهلی دیب بیلهدی. او شوندهی دییدی: «بوتون عیاللر گه دیجیتال اورگهتیلیش امکانیتی یرهتیلیب و مملکت مقیاسیده اینترنت گه کیریش آسانلشتیریلسه. حاضرگی کونده عیاللرنینگ ایشلش و اوقیشیگه چیکلاو قوییلگن، آنلاین اوقیش و ایشلش عیاللر اوچون فایدهلی دیر. کابل و بویوک شهرلرده عیاللر اینترنتدن فایدهلنهدی؛ بیراق قیشلاقلرده عیاللر اینترنت گه کیره آلمهیدی. تشکیلاتلردن قیشلاقلرده اینترنت گه کیریش اوچون قولیلیک یرهتیب و اینترنت نرخینی کمهیتیریشنی ایستهیمیز.»
تکنالوژی ساحهسیده بیلرمانلر، مملکت مقیاسیده اینترنت قیمتینی کمهیتیریش و اونگه آسانلیک بیلن کیریش اوچون، حکومت مخابرات آست قورمهلرینی کینگهیتیریب و بوتون حدودلرده فایبر نوری ترماغینی کینگهیتیریشی کیرهک دییدیلر.
تکنالوژی ساحهسیده بیلرمان قریب آرین شوندهی دییدی: «افغانستانده اینترنت قیمت؛ چونکی افغانستانده اینترنت منبعسی یوق. اینترنت قیمتی کمهیتیریلیشیگه تلاش قیلینسه؛ چونکی اینترنت قیمت بولسه جمعیتدهگی ضعیف قتلم یعنی عیاللر کوپراق ضرر کوریشهدی.»
شو بیلن بیرگه، مخابرات و تکنالوژی معلوماتی وزیرلیگی مسئوللری، افغانستان بویلب تینگ و صفتلی اینترنت بولیشی اوچون سعی-حرکت قیلهیاتگنلرینی معلوم قیلیشهدی. اولر گه کوره، سونگی تورت ییل دوامیده قریب ۷ میلیون ینگی فایدهلنوچی کوپهیگن. اونینگ ایتیشیچه: «مخابرات وزیرلیگی اوشبو تورت ییل دوامیده افغانستان مقیاسیده اینترنت خذمتلرینی آسانلشتیریش گه تلاش قیلگن و ایندی قریب ۷ میلیون اینترنتدن فایدهلنوچی کوپهیگن و حاضر ۲۹ میلیون فایدهلنماقده – دایمی شکلده اینترنت و علاقه قوریش خذمتلریدن فایدهلنیشهدی.»
افغانستاندهگی عیاللر اوچون اینترنت نهفقط اوقیش و ایشلش واسطهسی، بلکی کوندهلیک احتیاجلرینی حل قیلیش، معلوماتلر گه کیریش و آنلاین اوقیش اوچون ضروری دیر. اینترنت پولینی تولش اوچون عایله گه قرهملیک، اولرنینگ مصرفینی چیکلب و نظارت بیلن فایدهلنیشگه آلیب کیلگن؛ بیراق عیاللر ریجه و آنلاین فعالیتلر بیلن بو چیکلاولردن اوتیشگه سعی-حرکت قیلماقدهلر.
