بغلان پولیسی سوزلاوچیسی احمدجاوید بشارت نینگ ایتیشیچه، اوتگن کون (پنج‌شنبه ۱۲- حمل) بغلان مرکزی پلخمری شهریده بو ولایت پولیسی نینگ خاص قطعه قومندانی شریف‌الله خوستی طالبان بیلن اوتکزگن آتیشمه نتیجه‌سیده جان بیرگن. اونگه کوره، شونینگدیک مذکور آتیشمه‌ده طالبان گروهی گه هم تلفات ییتیشگن.
عین حالده، بغلان ده ایشانچلی امنیتی منبعلرنینگ سلام‌وطندارگه ایتیش‌لریچه، پلخمری شهری نینگ ایکینچی پولیس حوزه‌سیده امنیتی کوچلر کاروانی طالبان هجومی گه دوچ کیلگن کیم نتیجه‌ده، ۹ حربی تن جراحتی کوتارگن. مذکور منبعلرگه کوره، بو حادثه‌ده اوشبو کوچلرنینگ اوچ تانکی هم تخریب بولگن.
منبعلرنینگ ایتیش‌لریچه، بغلان پولیسی نینگ خاص قطعه قومندانی شریف‌الله خوستی مذکور کوچلرنینگ یاردمی گه باره‌دیگن بیر پیتده، طالبان نینگ بیر پسترمه‌سیگه جان بیرگن.
ملی مصالحه عالی کینگشی بو حادثه نی قاره‌لگن. شریف‌الله خوستی نینگ هلاک ایتیلگنی ملی کینگش اعضالری و بغلان یشاوچی‌لری نینگ عکس‌العمل‌لریگه روپه‌رو بولگن. بغلان پولیس خاص قطعه قومندانی نینگ جسدی بوگون توپراققه قوییلیشی ممکن.
شریف‌الله خوستی ایکی ییل آلدین بغلان پولیس خاص قطعه قومندانی صفتیده تعیین ایتیلدی. او طالبان پسترمه‌سی و ماین پارتلشی نتیجه‌سیده، نیچه مرته یره‌لنگن ایدی.
بغلان ده طالبان گروهی هجوم قیلگن بیرحالده، اوتگن کون مدافعه وزیرلیگی سرپرستی یاسین ضیا مذکور ولایت گه قیلگن سفریده ایتیشیچه، بغلان ده هیچ قنده‌ی خوفسیزلیک خواطری یوق دیر.
