تشقی ایشلر وزیرلیگی نینگ اعلام قیلیشیچه، بیرلشگن ملتلر تشکیلاتی نینگ خوفسیزلیک کینگشی لوگر ده قانلی پارتلش گه عکس‌العمل کورسه‌تیش بیلن، اعضا مملکت‌لردن ترورچیلیککه قرشی کوره‌ش گه افغانستان دن حمایت قیلیش‌لرینی سوره‌گن. مذکور کینگش بیر اعلامیه ترقه‌تیش بیلن لوگر ده بمب جایلشتیریلگن موتر پارتلش حادثه‌سینی جدی قاره‌لگن.
بیرلشگن ملتلر تشکیلاتی نینگ خوفسیزلیک کینگشی، زوروانلیکلر دوام تاپیشی، تینچ‌اهالی هدف گه آلینیشی و افغانستان ده‌‌گی ناتینچلیکلر توغریسیده جدی خواطر بیلدیریب و مملکتده زوروانلیکلر توخته‌تیلیشی و آتیش کیسین برقرار ایتیلیشی نی سوره‌گن.
تشقی ایشلر وزیرلیگی نینگ اعلامیه‌سیده کیلیشیچه، بیرلشگن ملتلر تشکیلاتی نینگ خوفسیزلیک کینگشی هر قنده‌ی ترورچیلیک نی قاره‌لب و اونینگ تینچلیک و خلق‌ارا خوفسیزلیککه قرشی تهدید بیله‌دی. شونینگدیک مذکور کینگش بونده‌ی ترورچیلیک اقدام‌لر عامل‌لری، حمایت قیله‌دیگن‌لری و ریجه‌لنتیره‌دیگن‌لرینی جزالنتیریلیشی نی سوره‌گن.
افغانستان دولتی بیرلشگن ملتلر تشکیلاتی نینگ خوفسیزلیک کینگشی نینگ موقفی نی خوش قرشی‌لب و معنالی سوزلشوو و افغانستان ده دایمی تینچلیک تأمین ایتیلیشی گه یاردم بیره‌دیگن آتیش کیسین تأمین‌لنیشی گه اورغوله‌گن.
شونده‌ی بیرحالده، اوتگن جمعه شام چاغی لوگر ولایتی ارزه تومن یشاوچی‌لری نینگ مهمانخانه‌سیده برابریده بمب جایلشتیریلگن موتر پارتله‌شی عاقبتیده، ۲۴ کیشی هلاک و ۱۱۰ دن آرتیق کیشی یره‌لنگن. گزارشلر اساسیده، مذکور حادثه قربانی‌لری نینگ کوپینچه‌سی کانکور سیناوی نی اوتکزیش اوچون لوگر مرکزی گه کیلگن اوقووچیلر دیر.
مذکور حادثه مسئولیتی نی حاضرگچه بیرار گروه یا-ده شخص بوینیگه آلمه‌گن؛ بیراق دولت بو حادثه نی طالبان گروهی گه نسبت بیرگن. لوگر ده بمب جایلشتیریلگن موتر پارتلش حادثه‌سی کینگ عکس‌العمل‌لرگه روپه‌رو بولگن.
