آمریکا جمهور رئیسی جو بایدن نینگ اوشبو مملکت حربی‌لرینی ۱۱ سپتامبر گه‌قدر افغانستاندن چیقیشی خصوصیده بولگن قراری واشنگتن‌پست تامانیدن نشر ایتیلگنیدن سونگ، طالبان گروهی چیت‌ایللیک حربی‌لر افغانستاندن چیقمه‌گن صورتده، هیچ‌بیر ییغینده اشتراک قیلمه‌یش‌لرینی بیلدیرگن.
طالبان نینگ قطرده‌گی سیاسی دفتری سوزلاوچیسی محمد نعیم، بو موضوعی توییتر صحیفه‌سیده یازگن. واشنگتن‌پست کونده‌لیگی نی جو بایدن نینگ برنامه‌لریدن آگاه بولگن منبع‌لردن نقل قیلیب یازیشیچه، آمریکا حربی‌لری نینگ افغانستاندن چیقیش برنامه‌سی جاری ییل ۱۱ سپتامبرگچه تکمیل بولیشی ممکن.
حاضرده آمریکا نینگ ۲ مینگ و ۵۰۰ حربی‌سی افغانستانده فعالیت قیله‌دی. مذکور حربی‌لر افغانستان امنیتی و دفاعی کوچلریگه تعلیم بیریش و مصلحت بیریش بیلن شغللنه‌دیلر.
عین‌حالده، افغانستان جمهورلیک ریاستی نینگ مصلحتچی‌سی و عامه رابطه‌لر اداره‌سی باشلیغی وحید عمر نینگ ایتیشیچه، جو بایدن تیزلیککه محمداشرف غنی بیلن صحبت اوتکزیب آمریکا حربی‌لری نینگ افغانستاندن چیقیش ریجه‌سی خصوصیده بولگن معلومات لرنی او بیلن شریک قیله‌دی. جناب عمر بو موضوعی توییتر صحیفه‌سیده یازگن. اونینگ ایتیشیچه، افغانستان و آمریکا دولتی اوتمیش‌لرده تکراری شکلده آمریکا کوچلری نینگ افغانستاندن چیقیشی خصوصیده صحبت اوتکزگن. اونینگ تاکید قیلیشیچه، افغانستان دولتی، آمریکا دولتی نینگ حربی‌لری خصوصیده آلگن قراری‌گه حرمت قیله‌دی.
وحید عمر نینگ کوپه‌یتیریشیچه، افغانستان امنیتی و دفاعی کوچلری ایکی دهه دن بویان یوقاری روحیه بیلن افغانستان اهالی‌سیدن دفاع قیله‌دی و حاضرده عملیات‌لردن ۹۸% ایرکین شکلده افغانستان حربی‌لری تامانیدن اویوشتیریله‌دی. اونینگ ایتیشیچه، افغانستان امنیتی و دفاعی کوچلری کیله‌جک‌لرده هم افغانستان اهالی‌سیدن دفاع قیله آله‌دی.
طالبان گروهی نینگ قطرده‌گی سیاسی دفتری سوزلاوچیسی نینگ ایتیشیچه، اوشبو گروه ایش‌لرینی اسلام مقدس دینی نینگ ارشادت‌لریگه کوره انجام بیره‌دی و مصلحت‌لر اساسی‌گه قرار قیله‌دی و انه‌شو سبب، استانبول ییغینی اولر تامانیدن رد قیلینمه‌گن.
ترکیه یغینی‌نی یولگه قویه‌دیگنلر اوتگن کونی استانبول ییغینی نینگ یولگه قویلیش زمانی‌نی بیللی قیلدی. ترکیه، قطر و بیرلشگن ملت‌لر تشکیلاتی نینگ قوشمه اعلامیه‌سیگه کوره، مذکور ییغین ۲۴ اپریل ده یولگه قویلیب و می آیی نینگ ۴ گچه دوام قیلیشی ممکن.