قندوز ده فعالیت قیله‌دیگن خبرچی‌لردن بیرقطاری نینگ ایتیش‌لریچه، معلومات‌لرگه قول تاپیش قانونی نینگ تصویب و توشیح ایتیلیشیدن نیچه ییل اوتماقده؛ لیکن اوشبو قانون حاضرده هم دولتی اداره‌لرده نهادینه بولمه‌گن. اولرنینگ ایتیش‌لریچه، قندوز محلی اداره‌لری مسووللرینی اوشبو قانون خصوصیده معلومات تاپیب و میدیالر بیلن همکارلیک قیلیشی کیره‌ک.
قندوز ده فعالیت قیله‌دیگن خبرچی‌لردن بیری سیدنثارجلالی نینگ ایتیشیچه: «بوتوغریده دقت قیلینیشیدن امیدوارمن و دولتی اداره‌لر سطحی ده سمینار یولگه قوییلیب و محلی اداره‌لر مسووللریگه اوشبو قانون‌دن رعایت قیلیش‌لری اوچون بویورغ بیریلیشی لازم.»
خبرچی‌لرنینگ ایتیش‌لریچه، قندوز ده دولتی اداره‌لر مسووللریدن بیرقطارینی معلومات‌لرگه قول تاپیش قانونی خصوصیده معلوماتی یوق و معلومات ایسته‌گن صورتده، جدی قیین‌چیلیکلر بیلن روپه‌ره بوله‌دیلر.
شمال‌شرق زونی بوییچه آریانانیوز خصوصی تلویزیونی خبرچی نصرت‌الله ابراهیمی نینگ ایتیشیچه، معلومات‌لرگه قول تاپیش خصوصیده بولگن قیین‌چیلیک‌نی نیچه مرته محلی مسووللر بیلن شریک قیلگنلر، لیکن دقت قیلینمه‌گن.
عین‌حالده، شمال‌شرق زونی بوییچه خبرچی‌لر مصونیت کمیته‌سی مسوولی شهباز صابری نینگ ایتیشیچه، ایرکین‌سوز و میدیالر فعالیتی قیزیق‌لنگنیدن ۱۷ ییل اوتماقده، لیکن دولت و اهالی آره‌سیده معلومات‌لرنینگ یوریشی آزاد و دوام‌لی ایمس. اونینگ ایتیشیچه، خبرچی‌لر برابریده بولگن قیین‌چیلیکلرنی حل قیلیش اوچون تیزلیککه دولت اداره‌لرده تعلیمی برنامهلر یولگه قویش‌لری ممکن.
بیراق، قندوز محلی مسوول‌لری نینگ ایتیش‌لریچه، معلومات‌لرگه قول تاپیش قانونی بوتون دولتی اداره‌لرگه توزیع قیلینگن و اوشبو قانون بوتون دولتی اداره‌لرده عملگه آشیریلیشی اوچون سعی و حرکت‌لرنی دوامی بار.
قندوز حاکمی سوزلاوچیسی عصمت‌الله مرادی نینگ ایتیشیچه، اوشبو ولایت رهبرلیگی معلومات‌لرنی خبرچی‌لر اختیاریگه قرار بیریش‌لری خصوصیده دستور بیرگن و هر اداره نینگ مطبوعاتی مسوول‌لری معلومات‌لرنی میدیالر بیلن شریک قیلیش‌گه مکلف دیر.
مملکتده میدیا و ایرکین‌سوز دولت نینگ کلیدی یوتوق‌لریدن حساب‌لنه‌دی، لیکن تخار و قندوز ولایتیده فعالیت قیله‌دیگن خبرچی‌لرنینگ ایتیش‌لریچه، سونگی ییللرده معلومات‌لرگه قول تاپیش خصوصیده جدی قیین‌چیلیکلر بیلن روپه‌ره بوله‌دیلر.
معلومات‌لرگه قول تاپیش قانون نی بیرینچی مرته ۱۳۹۳- ییلده تصویب ایتیلگنیدن سونگ، جمهور رییس محمداشرف غنی تامانیدن توشیح ایتیلدی و ایکینچی مرته ایسه ۱۳۹۷- ییلده تعدیل ایتیلگن و اوشبو قانون‌گه کوره، بوتون دولتی اداره‌لر مسوولرینی فعالیت‌لری خصوصیده میدیالرگه معلومات بیریش‌لری کیره‌ک.