اجتماعی ترماقلر بیر قطار کیشی اوچون یالغیز اویین-کولگی بولگنی بیرحالده؛ بیراق تعلیمدن محروم قالگن قیزلردن قطاری اوچون اوشبو ساحه کیلهجکنی توزهتیش و مالی مستقللیککه ییتیشیش سری بیر وسیلهگه اوزگرگن.
کابل یشاوچیسی بولمیش ۲۱ یاشر مریم شیرزاد، ساده بیر فکر بیلن ایشینی باشلهب و حاضر مالی مستقللیککه ییتیشیش یولیده مهم آدیملرنی آلالگن. او قریب سکیز آی آلدین بیر مینگ ۵۰۰ افغانی سرمایه بیلن «ماریا قول صناعتی» اسمی آستیده بیر صفحهنی آچیب و ایشگه باشلهگن. «بو ایش ساده بیر فکر بیلن یعنی دوستلریمدن بیرینینگ توغیلگن کونی مناسبتیگه بیر دستهگل و کیک دیزاینینی توزهتیش بیلن باشلندی.»
صنعی تاش، کیلیننینگ گلدستهسی، دیزاینلی شمعلر، ایچیملیکلر قوطیسینی ویزاینلش و خینه همده توی کیچهسی تحفه پاکتلری، آنه و سینگلیسی همکارلیگی بیلن مشتریلر اوچون تیارلهیدیگن مریم ایشلرینینگ اساسی بولیملریدن دیر. مریم گه کوره، گرچند بو ایشنینگ باشلهنیشی اونچهلیک قولی بولمهگن بولسهده، بیراق سعیوحرکت بیلن درآمد قولگه کیلتیریش مرحلهسیگه ییتیشگن. حاضر مریم اورته شکلده کونده بیر یا-ده ایکی بویورتمه آلیب و انه شوو یولدن اوزینینگ نیازلرینی تامینلهیدی. «باشده، آنلاین ایشی مینی اوچون قیین ایدی، چونکه هیچ تجربهم یوق ایدی؛ بیراق عایلهمنینگ همکارلیگی و اوزیننینگ سعیوحرکتیم سبب، رواجلندی.»
مریم، فعالیتیدن مقصد مالی مستقللیککه ییتیشیش، اجتماعی ترماقلردن یخشی شکلده فایدهلنیش و باشقه قیزلر اوچون بیر الگو صفتیده بولیش دیگن. شیرزاد دستلبکی مادهلر تیارلنیشی حقیده شوندهی دیدی: «نیاز بولگن نرسهلردن کوپ قسمی مملکتده تاپیلهدی؛ بیراق بیر قطار نرسه چین و بیر تورلی چاکلیتلرنی هم ایران دن آلیب کیلهدیلر.»
مریمنینگ مشتریلریدن کوپ قطارینی قیزلر تشکیل بیرهدی. او، بویورتمهلرینی آلگنیدن کیین، اولرنی دلیوری شرکتلری آرقهلی مشترلریگه ییتیشتیرهدی. شوندهی بیرحالده، ایش یولی اونینگ اوچون دایم آسان بولمهگن. بیرینچی بویورتمهسی قیتریلگنی تجربهسی توغریسیده، مریمنینگ ایتیشیچه: «بیرینچی مشتریم گجری/قولگه تاقیلهدیگن گلنی بویورگن بیر عیال ایدی. کوپ خوشلیک بیلن تیار قیلیب و یوباردیم؛ لیکن کییمی گه اوخشمهگنی سبب قیتردی. جودهیم قیغولندیم؛ اما امیدسیز بولمهی و ایشیمگه دوام بیردیم.»
او اقتصادی فعالیتلری یانیده، اورگهنیش یولیدن هم اوزاق بولمهدی. بیر کونی حقوق بولیمیده تحصیل قیلیشنی آرزو قیلهدیگن مریم، بو هدفیگه ییتیشمسدن کیین، فرقلی تیللرنینگ اورگهنیشگه باشلهگن. حاضر ایسه دری و پشتو تیللریده گپلشه آلهدیگن مریم شیرزاد، خارجی تیللردن هم انگلیزچه، آلمانجه و اردوجهنی اورگهنیب و اونینگ یانیده عربچه نی هم بیراز بیلهدی. «خصوصی مکتبلرده تیل درس بیلهر ایدیم. آلمانجهنی آنلاین اوقیدیم؛ نیچه تیلنی بیلیش یعنی نیچه انسان بولیش دیر. تورلی تیللرنی اورگنماقچینمین.»
قیینچیلیکلر و چیکلاولر بولگنی بیرحالده، مریم کیلهجکینی توزهتیش اوچون هر بیر فرصتدن فایدهلنیشگه حرکت قیلهدی. اونینگ ایشانچیگه کوره، صفردن باشلش صبر و تلاش بیلن بیرگه بولگنی صورتده، موفقیتگه آلیب کیلیشی ممکن. او، بیر کونی ایشینی کینگهیتیریب و باشقه قیزلر اوچون هم الهام منبعسی بولیشنی ایستهیدی. شیرزاد گه کوره، قیزلر سعیوحرکت همده امکانیتلردن توغری فایدهلنیش آرقهلی حیاتلرینینگ یولینی اوزگرتیره آلهدیلر.
