فاریاب ولایتیده بوغدای ایکینزارلریگه «کفشک» آفتینینگ کینگ کولملی هجومی، دهقانلر آرهسیده جدی خواطرلرگه سبب بولگن. گزارشلر اساسیده، اوتگن ییللرگه قرهگنده جاری ییلده بو آفت کوپراق ترقهلیب، مذکور ولایت پشتونکوت، المار، شیرینتگاب، چهلگزی، خواجه ناموسا و قیصار تومنلرینی تاثیر آستیگه قویگن.
فاریاب ولایتیدهگی دهقانلرنینگ ایتیشلریچه، اوشبو حشره اوسیملیکنینگ اینگ حساس اوسیش باسقیچیده تاپیلیب، بوغداینینگ ملایم دانهلری بیلن آزیقلهنیشی نتیجهسیده اولرنینگ بوشهشیشی همده حاصل وزنی کمهیشیگه سبب بولهدی.
فاریاب ولایتی پشتونکوت تومنیدهگی دهقانلردن عبدالغفارنینگ ایتیشیچه: «بو ییل کفشک کوپهیدی و اولر بوغدای خوشهلریگه اولتیریب و دانهلرنی بوزهر ایدی. دواپاشلیک قیلدیک، بیراق یخشی نتیجه بیرمهدی. ییریمیزدن بیر قسمی آز حاصل بیردی و کوپ ضرر کوردیک.»
شیرینتگاب تومنیدهگی دهقانلردن محمدنبی، امکانیت یوقلیگی قیینچیلیگیگه اشاره قیلیب و ایتیشیچه: «بیر قطار دارولردن فایدهلندیک و نیچه مرته ییرلرگه دارو اوردیک، بیراق کفشک کوپ ایدی و بوتونلی اورتهدن کیتمهدی. زراعت ریاستیگه باردیک، تخنیکی تیملریمیز تیکشیرهدیلر دیدیلر، بیراق فوقالعاده یاردم گه نیازیمیز بار.»
شونینگدیک المار تومنیدهگی دهقانلردن عبدالحمید، دهقانلرنینگ اقتصادی قیینچیلیگینی اوشبو آفتلرگه قرشی کورهشدهگی اساسی توسیق دیب و دولت آرقهلی تیکین یا-ده ارزانراق قیمت بیلن دارو ترقهتیلیشینی سورهگن. «بو حشره کوپراق بوغدای دانهسی و خوشهسینی بوزهدی. بیزلر سعیوحرکت قیلدیک، بیراق ییترلی بولمهدی. دولتدن دهقانلر اختیاریگه فایدهلی دارولر بیریلیشی همده تخنیکی یاردملر کورسهتیلیشینی سورهیمیز که حاصللریمیز اورتهدن کیتمهسین.»
شوندهی بیرحالده، فاریاب ایکینچیلیک ریاستی، ایکینچیلیک وزیرلیگینینگ مرکزی هیئتی همکارلیگیده جبرلگن منطقهلرگه تخنیکی تیملر یوباریلگنیدن خبر بیرگن. مذکور ریاست مسئوللریدن بیری، کیملیگی سِر قالیشنی ایستهب و سلاموطندار گه ایتیشیچه، بو ییل کفشک آفتیگه علاوه، چیگیرتکه و قاره قاق کبی آفتلر هم کوریلهدی.
اونینگ کوپهیتیریشیچه: «اوتگن ییلگه قرهگنده، بوغدای ایکینزارلریده آفت و کسللیکلر کوپهیگن. چیگیرتکه، کفشک و سرخی و قاره قاق بیر قطار ساحهلرده کوریلهدی. ایکینچیلیک ریاستی قرنطین و اوسیملیکلرنی سقلش عمومی مدیریتی آرقهلی، علمی و مسلکی سیمینارلرنی اوتکزیش، اصلاح بولگن اوروغلرنی ترقهتیش و تخنیکی خذمتلر بیلن دایم دهقانلر یانیده توختهگن.»
بو بیلن بیرگه، ایکینچیلیک ایشلری بوییچه ایش بیلرمان رحمتالله صدیقینینگ آگاهلنتیریشیچه: «کفشک بوغدای اوچون خوفلی آفتلردن بیری بولیب و توغری دانه و خوشه گه زیان ییتیشتیرهدی. وقتیده هماهنگلیک و بو آفت گه قرشی کورهش بولمسه، حاصللردن کوپینچهسینی کمهیتیریشی ممکن. ایکینچیلیک وزیرلیگی، همکار نهادلر همده دهقانلر همکارلیگی، بو دورهده جوده ضرور دیر.»
بوغدای، فاریاب ده اهالینینگ اساسی تیریکچیلیک منبعسی حسابلنگنی سبب، بو حالتنینگ دوام ایتیشی اوشبو ولایتده کمبغللیک و آزیق-آوقت خوفسیزلیگی معماسی خوفینی کوچهیتیریشی ممکن.
