ایریم یاشلر، تورلی سببلر گه کوره، مکتب و بیلیم یورتلرده ایریم علمی همده تخنیک کونیکمه (مهارت)لرنی اورگنیش امکانیگه ایگه بولمسه-لرده، حرکت و تیریشقاقلیک بیلن بو کونیکمهلرنی مستقل روشده اورگنگنلیکلرینی ایتهدی. اولر ملَکه گه ایگه بولگچ، عینی ساحهده ایش و درآمد تاپیشگه موفق بولگن.
سلاموطندارنینگ مملکت آلتی ولایتیدن ۲۰ دن ۳۵ یاش دهگی ۲۴ نفر یاش بیلن اوتکزگن صحبت نتیجهسی شونی کورستهدی کی، بو یاشلر ایش بازاریده طلب یوقاری بولگن تورلی کونیکمهلرنی اورگنگن.
مستقل اورگنیشدن ایش بازاریگه کیریشگچه
گزارشده صحبت قیلگنلرنینگ معلوماتلریگه کوره، بو یاشلرنینگ سکیز نفری گرافیک دیزاین و ویدیو ایدیت قیلیش، اوچ نفری عکاسلیک، اوچ نفری رساملیک، تورت نفری اجتماعی ترماقلرنی باشقریش، اوچ نفری دیزاین و تیکووچیلیک، ینه اوچ نفری ایسه میدیا واسطهلرینی تعمیرلش و ویب-دیزاین ساحهلریده مهارت آرتیرگن.
اولرنینگ آیلیک درآمدی بیش مینگدن ۲۰ مینگ افغانیگچه ییتهدی. اولرنینگ ایتیشیچه، بو درآمد نهفقط شخصی احتیاجلرینی تأمینلشگه، بلکی عایلهلرینینگ ایریم احتیاجلرینی قاپلشگه و عایله اقتصادیاتیگه حصه قوشیش گه هم یاردم بیرهدی.
دیپلوم ییترلی ایمس؛ ایش بازاری مهارت طلب قیلهدی
کابلدن ۲۲ یاشلی عبدالوهاب، ویدیو ایدیت قیلیش و آنلاین سودا قیلیش کونیکمهلرینی مستقل روشده اورگنگنینی ایتهدی. حاضر شو ساحهلرده فعالیت یوریتهیاتگن عبدالوهاب، آییگه ۱۰ دن ۱۵ مینگ افغانی درآمد آلهدی. او شوندهی دییدی: «اورگنگن کونیکمهمیز نه مکتبده، نه بیلیم یورتده اورگهتیلگن. بیز اونی عملی ایشلر آرقهلی اورگندیک. شو کونیکمهلرنی ایشگه سالگنیمیزدن بیری معاشیمیز حاضرگچه ۱۰ دن ۱۵ مینگ افغانی بولگن، بعضیده ۲۰ مینگ افغانیگچه هم ییتهدی.»
شونینگدیک، کابلدن ۲۰ یاشلی حاسنات گرافیک دیزاین و پستر تیارلش، دیجیتال کانتینت یرهتیش و گرافیک لایحهلرنی تیارلشنی مستقل روشده اورگنگن. اونینگ فکریچه، محنت بازاریده فقط دیپلوم گه ایگه بولیش ییترلی ایمس، بلکی ضرور کونیکمه و تجربه گه هم ایگه بولیش کیرهک. او شوندهی دییدی: «آیلیک درآمدیم بیر مینگدن ۱۰ مینگ افغانیگچه. نظری تعلیم مهم، اما محنت بازاری اوچون اونینگ اوزی ییترلی ایمس. محنت بازاری یاشدن نیمه اوقیگنسن؟ دیب سورمهیدی بلکی نیمه قیله آلهسن؟ دیب سورهیدی. بیز اورگنگن اینگ مهم نرسه فقط دیزاین کونیکمهسی ایمس، بلکی اوزیگه بولگن ایشانچ دیر.»
غوردن بولگن ۲۵ یاشلی ساوین، رساملیکنی مستقل روشده اورگنگنینی و عینی پیتده ویدیو ایدیت قیلیش هم اورگنهیاتگنینی ایتهدی. او بو فعالیتی آرقهلی آیی گه ۵-۱۰ مینگ افغانی درآمد تاپهدی. اونینگ ایتیشیچه: «رساملیکنی بیش-آلتی ییل آلدین اورگندیم. کوپ مشق قیلدیم و اوشه پیتده بویورتمهلر هم آلردیم. هم یخشی درآمد تاپردیم هم بیلیم خرهجتلرینی قاپلهی آلردیم. ویدیو ایدیت قیلیشنی ایسه اوچ آی آلدین باشلهدیک.»
لوگر یشاوچیسی ۲۲ یاشلی زکریا، اجتماعی ترماقلر و ویبسایتلرنی باشقریش کونیکمهلرینی رسمی تعلیمسیز، تورلی اوقوو منبعلریدن فایدهلنیب، مستقل روشده اورگنگنینی بیلدیرهدی. او شوندهی دییدی: «برچه کونیکمهلرنی یوتیوب آرقهلی مستقل روشده اورگندیک. کیین بیر کمپنیهده کارآموز بولدیم و اجتماعی ترماقلر، باشقرو، ویدیو ایدیت قیلیش همده گرافیک دیزاین ساحهلرینی اورگندیم، چونکی افغانستانده بو کونیکمهلر بوییچه تعلیم جوده کم.»
بامیان ولایتیدن بولگن ۲۰ یاشلی زمان علی، عکاسلیک و ویدیو تصویر گه آلیشنی مستقل روشده اورگنگن. اونینگ ایتیشیچه، هر بیر یاش مکتب و بیلیم یورت تعلیمیدن تشقری، کمیده بیته عملی کونیکمهنی هم بیلیشی کیرهک. او شوندهی دییدی: «اورگنگن کونیمه هم حیاتیمگه کتته تأثیر کورستدی. عکاسلیک آرقهلی کوپلب انسانلر و جمعیت بیلن تنیشدیم. مکتب و بیلیم یورت انساننی نظری بیلیملر گه اورگتهدی. تعلیم بیلن بیر قطارده یاشلر بیرار هنرنی هم اورگنیشلری کیرهک.»
سرپل یشاوچیسی بولگن ۲۶ یاشلی محمد رفیع، موبایل تلفونلرنی تعمیرلش بیلن شغللنهدی. اونینگ ایتیشیچه، دستلب بو کسبنی فقط قیزیقیش سببلی اورگنه باشلهگن و بعضاً اوزی یا کی دوستلرینینگ بوزیلگن تلفونلرینی آچیب، تعمیرلب کورگن. او شوندهی دییدی: «تخمیناً اوچ ییلدن بیری بو کونیکمهنی مستقل روشده اورگنیب کیلماقده من. حاضر موبایل تلفونلرنی تعمیرلش ساحهسیده ایشلهیمن. دستورلر اورنهتیش، تلفون تیزیمیدهگی معمالرنی حل قیلیش، ایریم تلفونلرنی قطعه قیلیش، بعضی قسملرنی المشتیریش و تلفوننینگ تخنیک معمالرینی انیقلش کبی ایشلرنی بجرهمن.»
یاشلر اوچون تخنیک تعلیمنی کینگهیتیریش ضرور
شو بیلن بیرگه، اقتصادشناسلر افغانستانده محنت و کسب-هنر اورگنیش مدنیتینی رواجلنتیریش ایش بیلن تأمینلش و درآمد تاپیش امکانیتلرینی یرهتیشی، شونینگدیک، عایلهلر و مملکت اقتصادیاتینی یخشیلشده مهم رول اوینشی ممکنلیگینی ایتهدیلر.
اقتصاد شناس عبدالنصیر رشتیا شوندهی دییدی: «بیز گه مکتبلر، انستیتیوتلر همده قیسقه و اوزاق مدتلی تخنیک کورسلر کیرهک. یاشلر تخنیک و کسبی کونیکمهلرنی اورگنیب، اوز تجارتلرینی یولگه قوییشلری ممکن. بوگونگی کونده کیچیک تجارت اقتصادی اوسیش و ایش اورینلری یرهتیشده مهم رول اوینهیدی.»
عینحالده، ایش و اجتماعی ایشلر وزیرلیگی مسئوللری، تورلی ساحهلرده یاشلر اوچون تخنیک و کسبی تعلیم امکانیتلرینی یرهتگنلیکلرینی همده اولرنینگ ایریملرینی ایش بیلن تأمینلهگنلرینی معلوم قیلهدی.
ایش و اجتماعی ایشلر وزیرلیگی سوزلاوچیسی محمدصدیق توحیدی، وزیرلیک کیلگوسی بیش ییل دوامیده ایش اورینلری یرهتیش مقصدیده ۱۵ ته اداره بیلن کیلیشوو امضالهگنینی بیلدیرهدی او شوندهی دییدی: «ایش و اجتماعی ایشلر وزیرلیگی یاشلرنی تیکووچیلیک، موبایل تلفونلر و موترلرنی تعمیرلش، بویاقچیلیک و برق ساحهلریده تخنیک همده کسبی کونیکمهلرنی اورگتماقده. شونینگدیک، وزیرلیک کیلگوسی بیش ییل دوامیده بیر میلیون ۴۰۰ مینگدن آرتیق ایش امکانیتلرینی یرهتیش اوچون ۱۵ ته اداره بیلن کیلیشوو امضالهگن.»
بوگونگی کونده، کونیکمهلرنی مستقل اورگنیش افغانستاننینگ ایریم یاشلرینینگ محنت بازاریگه کیریش یوللریدن بیریگه ایلنگن. بو یاشلر قیزیقیش، سعی-حرکت و نارسمی تعلیمگه تیهنیب، عملی کونیکمهلرنی ایگللب، اولردن ایش و درآمد تاپیش اوچون فایدهلنیشگه موفق بولماقده.
