اسلام امیرلیگی افغانستانده حاکمیت تیپهسیگه کیلگنی بیش ییللیگی بیلن ایریم یاشلر ییترلی تعلیم و ایش امکانیتلری یوقلیگیدن خواطر بیلدیرماقده. سلاموطندارنینگ مملکت ۱۳ ولایتیده ۲۸ نفر یاش، جملهدن ۱۶ نفر قیز و ۱۲ نفر ییگیت بیلن اوتکزگن صحبتی شونی کورستهدی کی، اولر تعلیم، کسب-هنر اورگنیش و ایش امکانیتلریدن فایدهلنیش بارهسیده بعضی معمالر گه دوچ دیر.
بو یاشلرنینگ ایتیشیچه، کسبی و ایلغار تعلیم گه کیریش امکانیتلرینینگ چیکلنگنی همده برقرار ایش اورینلرینینگ یوقلیگی اولرنینگ کیلهجگینی ناانیق حالگه کیلتیرگن. اولر اوز ملَکهلرینی آشیریش اوچون کوپراق ایش و تعلیم امکانیتلری یرهتیلیشینی ایستهیدی.
سوراوده قتنشگن یاشلرنینگ ۲۰ نفری ایش بیلن تأمینلنیش، عالی تعلیمنی دوام ایتتیریش و تعلیم آلیش امکانیتلرینی کینگهیتیریشنی، ۸ نفری ولایتلرده کسبی امکانیتلر همده تعلیم و ایش شرایطلرینی یرهتیشنی ایستهگن. صحبتده قتنشگن یاشلرنینگ بیش نفری ایسه بیر وقتنینگ اوزیده تعلیم خرهجتلرینی کمهیتیریشنی سورهگن.
۲۴ یاشلی، سرپل ولایتیده یشاوچی فرید احمدی، مملکتده خوفسیزلیکنی تأمینلش مهملیگینی، بیراق شو بیلن بیرگه یاشلر اوچون تعلیم و ایش امکانیتلری هم یرهتیلیشی لازملیگینی ایتهدی. اونینگ فکریچه، بو یاشلرنینگ اوزلری اوچون یخشیراق کیلهجک یرهتیشگه یاردم بیرهدی. او شوندهی دییدی:«مینینگ اینگ مهم طلبیم – یاشلر اوچون ایش، تعلیم و ینهده کوپراق رواجلنیش امکانیتلری یرهتیلیشی دیر. مملکتده اورنهتیلگن خوفسیزلیک خلق اوچون مهم. بیز خوفسیزلیک اقتصادی و ایش امکانیتلری بیلن بیرگه بولیشینی ایستهیمیز، شونده یاشلر اوز کیلهجگینی مملکت ایچیده قوره آلهدی.»
کاپیسا ولایتیدن بولگن ۲۷ یاشلی ریحان، طب معالجوی یونهلیشینی تماملهگن. او حکومتدن اوشبو یونهلیش بیتتیروچیلری اوچون ایش امکانیتلری یرهتیشنی همده اولر اوچون اگزیت امتحانلرینی اوتکزیش جریانینی باشلشنی سورهیدی. او شوندهی دییدی: «یاشلر اوچون ایش و عالی تعلیم امکانیتلری یرهتیلیشی کیرهک. بیلیم یورتنی تماملهدیک، اما حاضرگچه اوز متخصصلیگیم بوییچه MD شفاکار یا کی دوالش شفاکار صفتیده ایشلهی آلگنیم یوق. حکومتدن بیز اوچون اگزیت امتحانلرینی اوتکزیشینی سورهی من.»
کابلدن بولگن ۱۸ یاشلی عبیداللهنینگ ایتیشیچه، مکتبنی تماملهگچ بیلیم یورت گه کیریب، مناسب ایش تاپیشنی ریجهلشتیرگن. بیراق عایلهسینینگ اقتصادی شرایطی و ییترلی امکانیتلرنینگ یوقلیگی سببلی بو ریجهسی عملگه آشمهگن. او شوندهی دییدی: «مین اوچون اینگ مهم امکانیت اوقیشنی دوام ایتتیریش و دایمی ایش تاپیش ایدی. مکتبنی تماملهگچ بیلیم یورت گه کیریب بوندن کیین مناسب ایش تاپه آلهمن دیب اویلهگندیم. بیراق عایلهمیزنینگ اقتصادی شرایطی و امکانیتلرنینگ ییترلی ایمسلیگی سببلی بو ریجه عملگه آشمهدی.»
دایکندیلیک ۲۴ یاشلی فرزانه فرهمند، حکومتدن یاشلرنینگ استعدادلرینی انیقلش و تورلی ساحهلرده اولر اوچون تعلیم، رواجلنیش همده ایش امکانیتلرینی یرهتیشنی سورهیدی. اونگه کوره: «مملکت اوزیده استعدادلر تربیهلنسه، یاشلرنینگ استعدادینی رواجلنتیریش اوچون جهان ستندردلریگه ماس، تولیق و صفتلی تعلیم امکانیتلری یرهتیلیشی همده ایش اوز ایشینینگ متخصصلریگه تاپشیریلیشی کیرهک.»
بغلان ولایتی یشاوچیسی بولگن ۲۳ یاشلی رامین رحیمی، یاشلرنی رواجلنتیریش اوچون تعلیم، بندلیک، کسب-هنر و تخنیک ساحهلر گه کوپراق سرمایه کیریتیش همده اولر اوچون کینگراق امکانیتلر یرهتیش ضرورلیگینی ایتهدی. او شوندهی دییدی: «تعلیم، ایش کسب-هنر و تخنیک ساحهلر گه کوپراق سرمایه کیریتیلیشی کیرهک. ایش اورینلرینی یرهتیش، تدبیرکارلیکنی قوللب-قوتلش و کسبی تعلیم بیریش یاشلرنینگ صلاحیتینی آشیریشی ممکن. بو ایسه اولرنینگ خارج گه کیتیش اورنیگه، مملکت ایچیده اوز کیلهجگی و افغانستان کیلهجگی اوچون محنت قیلیشیگه امکان بیرهدی.»
شو بیلن بیرگه، جمعیتشناسلرنینگ ایتیشیچه، یاشلر جمعیتنینگ مهم و فعال قتلمی دیر. حکومت اولرنینگ صلاحیتیدن تورلی ساحهلرده فایدهلنیشی اوچون یاشلرنینگ رواجلنیشی، تعلیم آلیشی، کسب-هنر اورگنیشی و ایش بیلن تأمینلیشی اوچون شرایط یرهتیشی کیرهک. اولرنینگ فکریچه، یاشلر گه سرمایه کیریتیش اولرنینگ مملکتنینگ اقتصادی و اجتماعی رواجلنیشیگه اشتراکینی آشیریشیگه یاردم بیرهدی.
جمعیتشناس شعیب احمدی شوندهی دییدی: «حکومتلر یاشلرنینگ صلاحیتیدن تورلی ساحهلرده فایدهلنه آلیشی اوچون، اولا اولرنینگ تفکری و دنیا قرهشی اوستیده ایشلش کیرهک. شونده اولر کیلهجکده جمعیت گه خذمت قیلیش آرزو و مقصدیگه ایگه بولهدیلر. شونینگدیک، اولر اوچون ایش اورینلری، تعلیم و ملَکه آشیریش دستورلری یرهتیلیشی لازم.»
اخبارات و مدنیت وزیرلیگی مسئوللری ایسه، اوشبو وزیرلیک یاشلرنینگ علمی، فکری، کسبی و محنت صلاحیتینی آشیریشگه صادقلیگینی بیلدیرماقده. اولرنینگ ایتیشیچه، وزیرلیک یوزلب علمی و تعلیمی دستورلرنی تشکیل ایتیش آرقهلی یوز مینگلب یاشلرنینگ اوشبو تدبیرلرده اشتراک ایتیشی اوچون امکانیت یرهتگن.
اخبارات و مدنیت وزیرلیگی سوزلاوچیسی خبیب غفران شوندهی دییدی: «اخبارات و مدنیت وزیرلیگی اوتگن ییل دوامیده تورلی علمی دستورلر، کتابخوانلیک تنلاولری، کورگزمهلر و فکری تدبیرلرنی تشکیل ایتیب، یوز مینگلب یاشلرنینگ اوشبو دستورلرده اشتراک ایتیشی اوچن امکانیت یرهتدی. کسبی و تعلیم صلاحیتینی آشیریش بارهسیده ایسه اخبارات و مدنیت وزیرلیگینینگ یاشلر بولیملریدهگی اکادمیک دستورلر آرقهلی ۱۹ مینگ نفر یاش تحصیلنی تماملهدی.»
شو بیلن بیرگه، ایش و اجتماعی ایشلر وزیرلیگی مسئوللری، کیلگوسی بیش ییل دوامیده بیر میلیون ۴۰۰ مینگدن آرتیق یاش اوچون ایش امکانیتلرینی یرهتیشنی ریجهلشتیرهیاتگنینی معلوم قیلهدی.
اسلام امیرلیگی ایش و اجتماعی ایشلر وزیرلیگی سوزلاوچیسی محمدصدیق توحیدی شوندهی دییدی: «اوتگن ییلی ۴۵ مینگدن آرتیق یاش اوچون تخنیک و کسبی کونیکمهلرنی اورگنیش امکانیتی یرهتیلدی و اولر تیگیشلی تعلیمنی آلدیلر. اولرنینگ کوپچیلیگی تعلیمنی تماملهگچ ایش بیلن تأمینلندی. کیلگوسی بیش ییل دوامیده محنت و اجتماعی ایشلر وزیرلیگی تامانیدن بیر میلیون ۴۰۰ مینگدن آرتیق کیشی اوچون ایش امکانیتلری یرهتیلهدی.»
اوشبو گزارشده صحبت قیلگن یاشلر، کیلهجکلرینی قوریش اوچون تعلیم آلیش، کسب-هنر اورگنیش و اوز قابلیتلریگه ماس ایش اورینلریگه محتاج ایکنینی بیلدیرگنلر. اولر حکومتدن نظری تعلیم بیلن بیرقطارده، اختصاصلشتیریلگن و عملی تعلیم همده ایش امکانیتلرینی کینگهیتیریشنی سورهیدی. بو ایسه یاشلرنینگ تورلی ساحهلردهگی صلاحیتی و قابلیتلریدن ثمرهلی فایدهلنیش امکانینی بیرهدی.