قزاقستاننینگ افغانستان اوچون مخصوص وکیلی ایرکین توکوموف، جاری قویاش ییلنینگ آلتی آییده بو ایکی مملکت اورتهسیده سودا آلیش-بیریش مقداری ۵۸۱ میلیون دالر گه ییتگنینی معلوم قیلگن.
توکوموف، بوگون (۶ میزان/۲۸ سپتمبر، دوشنبه) هراتده بولیب اوتگن تدبیرده، افغانستان و قزاقستان اورتهسیدهگی سودا آلیش-بیریشنی آشیریش اوچون ترانسپورت و ترانزیت ظرفیتینی کینگهیتیریش، تیمیر یول لایحهلری همده لجستیک مرکزلرینی تشکیل ایتیش ضرورلیگینی تأکیدلهگن.
باشقه تاماندن، هرات حاکمی نوراحمد اسلامجار، اوشبو ولایتده سودا و اقتصادی همکارلیکنی کینگهیتیریش اوچون کتته امکانیتلر بارلیگینی بیلدیرگن. هرات سودا و سرمایه کیریتیش اتاقی باشلیغی محمدیونس قاضیزاده ایسه، قزاقستان سرمایه کیریتووچیلرینینگ هراتده اقتصادی تورلی بولیملرده سرمایه کیریتیشلری اوچون زمینه یرهتیلیشی گه تأکید ایتگن.
قزاقستان و افغانستان بوندن اول، ایکی مملکت اورتهسیدهگی سودا آلیش-بیریش مقداری ییلیگه اوچ میلیارد دالر گه ییتکزیلیشی اوچون حرکت قیلینهیاتگنینی معلوم قیلگن ایدی.
اوشبو تدبیر دایرهسیده، هرات ولایتینینگ اقتصادی ظرفیتینی قزاقستان هیئتی گه تنیشتیریش مقصدیده محلی محصولاتلر کورگزمهسی هم تشکیل ایتیلدی. کورگزمهده ولایتنینگ ایکینچیلیک، چارواچیلیک محصولاتلری نمایش ایتیلگن.
