آمریکا مدافعه وزیرلیگی افغانستان ده حربی‌لری نینگ سانی کمه‌یشی نی اعلام قیلگن بیرحالده، ملی خوفسیزلیک کینگش دفتری نینگ ایتیشیچه، چیت‌ایللیک کوچلرنینگ کمه‌یشی افغانستان اوروشی اوستیگه سلبی تأثیر قویمه‌یدی.
اوتگن کون (شنبه ۲۷- جدی) ملی خوفسیزلیک کینگش دفتری سوزلاوچیسی رحمت‌الله اندر رسانه‌لرگه ویدیویی بیر پیام یوباریب ایتیشیچه، حاضر مملکتده عملیات‌لردن ۹۶ فایزی امنیتی و مدافعه کوچلر آرقه‌لی اویوشتیریله‌دی و شو یوزه‌دن چیت‌ایللیک کوچلرنینگ کوپه‌یشی یا-ده کمه‌یشی اوروش وضعیتی اوستیگه سلبی تأثیر قویمه‌یدی.
شونده‌ی بیرحالده، طالبان گروهی آمریکا نینگ بو اقدامی نی خوش قرشی‌لب و اونینگ بو گروه و طالبان آره‌سیده امضالنگن کیلیشوونامه تطبیق ایتیلیشی اوچون عملی بیر اَدیم دیگن.
قطر ده طالبان سیاسی دفتری سوزلاوچیسی محمدنعیم توییتر صحیفه‌سیده یازیشیچه، کیلیشوونامه عملی بولیشی ایکی تامان نینگ فایده‌سیگه دیر و طالبان اوز وعده‌لریگه عمل قیلیش اوچون ایشانچ بیره‌دی.
ایکی کون آلدین آمریکا مدافعه وزیرلیگی، افغانستان ده مذکور مملکت حربی‌لری نینگ سانی ۲۵۰۰ کیشی گه کمه‌یگنی نی اعلام قیلدی.
اوتگن (جمعه ۲۶- جدی) آمریکا مدافعه وزیرلیگی بیر توییت آرقه‌لی مذکور وزیرلیک سرپرستی کریستوفر میلر دن نقل قیلیب ایتیشیچه، مذکور حربیلر آمریکا نینگ ترورچیلیک که قرشی کوره‌ش مأموریتی و بو مملکت نینگ ناتو بیرلشیک‌لری بیلن آلگن قراری اساسیده تینچلیک تأمین‌لنیشی اوچون کوره‌شه‌دیگن افغانستان امنیتی کوچلردن حمایت قیلیش گه فایده‌لی دیر.
آمریکا جمهوررئیسی دونالد ترامپ آق سرای ویب‌سایتی ده بیر بیانات بیریب ایتیشیچه، بو مملکت حربی‌لری نینگ رقمی افغانستان ده سونگی ۱۹ ییل ده اینگ قویی رقم گه ییتیشگن.
آمریکا مدافعه وزیرلیگی کمیده ایکی آی آلدین افغانستان ده بو مملکت حربی‌لری میلادی ۲۰۲۱- ییل ۱۵- جنوری گه قدر ۴۵۰۰ مینگ دن ۲۵۰۰ کیشی کمه‌یشی نی اعلام قیلگن ایدی.
عین حالده، ناتو رسمی‌لریدن بیری افغانستان ده آمریکالیک حربیلر سانی کمه‌یشی خصوصیده ایتیشیچه، افغانستان برابریده بو تشکیلات نینگ موقفی اوزگرمه‌گن. ناتو نینگ اوشبو رسمی‌سیگه کوره، بو تشکیلات حاضر هم افغانستان حربی‌لریگه تعلیمات و مصلحت بیرماقده.
اونگه کوره، تینچلیککه ایریشیش و افغانستان خلق‌ارا ترورچیلر اوچون تینچ بیر اویه گه اوزگرمه‌سلیگی اوچون اولر افغانستان امنیتی کوچلری گه یاردم بیره‌دی.
آمریکا حربی‌لری نینگ افغانستان دن چیقیشی طالبان و آمریکا آره‌سیده امضالنگن کیلیشوونامه نینگ اساسی موردلریدن بیری دیر.
