صدای غور رادیوسی نینگ سابق مدیر مسوولی بسم‌الله عادل ایماق عایله اعضالریدن ۳ ته‌سینی ناتانیش قوراللی کیشی‌لر تامانیدن اولدیریلگنی جدی واکنش‌لر بیلن روپه‌ره بولگن. خبرچی‌لر مصونیت کمیته‌سی، افغانستان ایرکین میدیالریدن حمایت قیلیووچی نهاد یا-ده نی و ناتو تشکیلاتی مذکور واقعه‌نی جدی شکلده تیکشیریلیشی‌نی سوره‌گنلر.
خبرچی‌لر مصونیت کمیته‌سی، بسم‌الله عادل نینگ عایله اعضاسی اوستیگه صورت تاپگن هجوم‌نی قاره‌لب و محلی و امنیتی نهادلردن اوشبو قضیه‌نی جدی شکلده تیکشیریب و عامل‌لرنی جزالنتیریشی‌نی سوره‌گن.
اوشبو کمیته حکومتدن جناب ایماق نینگ عایله اعضالریدن حفاظت قیلیشی‌نی سوره‌گن.
خبرچی‌لر مصونیت کمیته‌سی تامانیدن نشر قیلینگن اعلامیه‌ده اوشبو هجوم عامل‌لری و انگیزه‌سی خصوصیده معلومات بیریلمه‌گن. لیکن بسم‌الله عادل نینگ ایناغه‌سی حیات‌الله نینگ ایتیشیچه، طالبان جنگریلری اوتگن “پنجشنبه” کیچه‌سی مسکونی اوی‌لری اوستیگه هجوم قیلیب و نتیجه‌ده عایله اعضالریدن ۳ ته‌سی هلاک و باشقه ۵ ته‌سی یره‌لنگن.
طالبان گروهی بو واقعه‌ده قولی بولگنی‌نی رد قیلگن. اوشبو گروه سوزلاوچیسی‌لریدن بیری یوسف احمدی نینگ ایتیشیچه، مذکور هجوم طالبان تامانیدن اویوشتیریلگن ایمس.
عین‌حالده، افغانستان ایرکین میدیالریدن حمایت قیلووچی نهاد یا-ده نی تشکیلاتی بسم‌الله عادل نینگ عایله اعضالری اوستیگه اویوشتیریلگن هجوم جدی شکلده تیکشیریلیشی‌نی سوره‌گن.
اوشبو نهاد تامانیدن نشر قیلینگن اعلامیه‌ده ایتیلیشیچه: « گزارش‌لرگه کوره، ناتانیش قوراللی کیشی‌لر بسم‌الله عادل ایماق نینگ آته‌سینی اویی اوستیگه هجوم قیلگن و نتیجه‌ده ۳ کیشی هلاک ایتیلگن. گزارش‌لرگه کوره، جناب عادل نینگ عایله اعضالریدن ۲ ته‌سینی قوراللی کیشی‌لر اوزلری بیلن آلیب کیتگن.»
ایرکین میدیالردن حمایت قیلووچی نهاد غور محلی اداره‌سی و اوشبو ولایت امنیتی نهادلریدن بو واقعه نی تیکشیریب و قاتل‌لرنی قانونگه تاپشیریشینی سوره‌گن.
عین‌حالده، شمالی اتلانتیک تشکیلاتی یا-ده ناتو بیر توییت آرقه‌لی، اوشبو هجوم‌نی قاره‌لب و بونده‌ی هجوم‌لر توخته‌تیلیشینی سوره‌گن.
ناتو نینگ ایتیشیچه: «غور ولایتیده مدنی و میدیا فعاللریدن بولمیش بسم‌الله عادل اولدیریلگنیدن ایکی آی اوتیشی بیلن اونینگ عایله اعضالری هجوم آستیگه قرار بیریلگن. افغانستانده ایرکین میدیالرنینگ اورنی اونملی دیر و بونده‌ی هجوم‌لرنی توخته‌تیلیشی کیره‌ک.»
صدای غور رادیوسی نینگ سابق مدیر مسوولی بسم‌الله عادل ایماق ایکی آی آلدین فیروزکوه شهری نینگ غربی ده ناتانیش قوراللی کیشی‌لر تامانیدن ترور قیلینگن ایدی.
جناب عادل نینگ تروری دن سونگ، ملی خوفسیزلیک عمومی ریاستی بیر اعلامیه آرقه‌لی، غور ولایتی کینگش عضوی عزت‌الله بیک نی جناب ایماق نینگ تروریگه قول بار لیگینی بیلدیردی. عزت‌الله بیک قولگه آلینیشی اوچون ملی خوفسیزلیک کوچلری نینگ اقدامی‌گه قرشی کیلیب و آتیشمه نتیجه‌سیده هلاک ایتیلدی.
