۹ یاشیده بولگن عبدالرووف آتلی باله آدم اوغیرلاوچی‌لر تامانیدن اوغیرلنگنی باعث، بلخ ولایتی نینگ شورتپه و کلدار تومن‌لری یشاوچی‌لریدن مینگ‌لرچه‌سی حیرتان – مزارشریف قتناو یولینی باغلگن‌لر. اعتراضچی‌لرنینگ آگاه‌لنتیریشیچه، ایرته “دوشنبه” ساعت ۱۰ گه‌قدر عبدالرووف آدم اوغیرلاوچی‌لر تامانیدن آزاد قیلینمه‌گن حالده، اوز اعتراض‌لریگه دوام بیریب، حیرتان بندری، دولتی اداره‌لری، آقینه بندری، شیرخان بندری و مزارشریف – جوزجان قتناو یولینی باغله‌یدیلر.
اعتراضچی‌لر تورکمن‌لر، جمهور رئیس، ایچکی ایشلر وزیرلیگی و ملی خوفسیزلیک ریاستیدن بو قضیه‌نی جدی شکلده تیکشیریشلرینی سوره‌گنلر.
بلخ تورکمن شوراسی باشلیغی عبدالصمد حارث نینگ ایتیشیچه، ۹ یاشیده بولگن عبدالرووف آتلی باله نینگ اوغیرلنگنیدن ۳۸ کون اوتماقده، لیکن حاضر گچه هم اوندن خبر یوق و یالغیز اذیت قیلینیش ویدیوسی او نینگ عایله‌سیگه یوباریله‌دی.
جناب حارث گه کوره، حکومت مسؤل‌لری هردایم تیزلیککه نشانه تاپیشینی بیلدیره‌دی، لیکن حاضرگچه نتیجه قولگه کیلتیرمه‌گنلر.
عین‌حالده، بلخ ولایتی کینگش سابق اعضاسی عبدالرشید دوران نینگ ایتیشیچه، ۷ کون آلدین ۹ یاشیده بولگن بیر تورکمن باله اوق آرقه‌لی اولدیریلگن، لیکن حکومت بو قضیه‌گه دقت قیلمه‌گن.
حیرتان – مزارشریف قتناو یولیده فعالیت قیله‌دیگن موتر هیداوچی‌لر، حکومتدن تورکمن قومی نینگ ایستک‌لرینی قبول قیلیب و حیرتان – مزارشریف قتناو یولینی آچیشی‌نی سوره‌گنلر.
لیکن، بلخ حاکمی سوزلاوچیسی منیر فرهاد، عبدالرووف آزاد ایتیلیشی خصوصیده امنیتی و کشفی نهادلر نینگ تلاشی بولگنیدن خبر بیرگن.
مزارشریف شهری نینگ خصوصی مکتب‌لریدن بیرته‌سیده اوقووچی بولگن عبدالرووف ۳۸ کون آلدین مکتب تامان کیتیب باره‌دیگن پیتده، حربی کیمده بولگن آدم اوغیرلاوچی‌لر تامانیدن اوغیرلنگن، لیکن بلخ ولایتی نینگ امنیتی و کشفی نهادلری اوشبو خصوصیده هیچ‌قنده‌ی معلومات قولگه کیلتیرمه‌گنلر.
