شفاکارلرنینگ ایتیشلریچه، فیزیولوژیکی اوزگریشلر سبب ۴۰ یاشرلیکدن سونگ حاملهدارلیکده، عیاللر تنی تخصصی شکلده مراقبت بولیشگه نیازمند دیر. بو دورهده جسمی و روحی قیینچیلیکلر بولیب، اجتماعی و طبی حمایت بولمهگنی صورتده، عیاللرگه کوپینچه باسیم کیلیشی ممکن.
فاریاب ده ۴۰ یاشدن سونگ حاملهدار بولگن عیاللر، جسمی قیینچیلیکلرگه علاوه، مالی، معنوی و عایلهوی حمایتلر یوقلیگیدن شکایت قیلهدیلر. ۴۰ یاشرلیکدن سونگ حاملهدار بولگن عیاللردن بیری نیلوفرنینگ ایتیشیچه: «خدا گه شکر قیزیم دنیا گه کیلدی. حاملهدار بولگنیمده باشده ایناغم مینی کوپ تحقیر قیلدی، چونکه یاشیم یوقاری کیتگن ایدی و ایناغهم شفاکار دیر. او بو یاشده حاملهدارلیکنینگ خوفلی بولیشینی ایتدی.»
بیزلرنینگ فیسبوک صحیفهمیزگه باش اورینگ!
شونینگدیک بو ولایت یشاوچیسی بولمیش سایده، ۴۵ یاشرلیکدن کیین حاملهدارلیک طفیلی قان کملیگی و ضعیفلیک قیینچیلیکلری توغریسیده ایتیشیچه: «۴۰ یاشدن آلدین حاملهدار بولگنیم کبی ایمس ایدیم. بلکیم بوندن آلدین حوصلهم بار ایکن، بیراق ۴۰ یاشرلیکدن سونگ حوصلهم قالمهدی. دارو و آوقت ییش بیلن وشبو اوچ بالهنی دنیا گه کیلتیردم.»
فاریاب دهگی نسایی-ولادی شفاکارلریدن شکریه کوشانینگ اورغولشیچه، ۴۰ یاشرلیکدن سونگ حاملهدار بولهدیگن عیاللر، اوزلری بیلن جنیننینگ سلامتلیگی تضمین بولیشی اوچون تخمدانلر، فشار، شکر و باشقه قیینچیلیکلرنی تیکشیریشلری کیرهک. «۴۰ یاشرلیکدم کیین یخشی حاملهدارلیک دورهسینی اوتکزیشلری ممکن، بیراق بیر قطار خوفلر هم بار که آنه بیلن جنینده تاپیلهدی. حاملهدارلیک پیتیده فشار بلند کیتیشی، وقتدن آلدین چقهلاقنینگ توغیلیشی و طبیعی شکلده توغه آلمسلیک.»
لیکن اوشبو ولایتدهگی نسایی-ولادی شفاکارلریدن باشقه بیری مریم قاریزادهنینگ ایتیشیچه، عیاللر جدی شکلده ساغلیق قیینچیلیکلری بولمهگنی بیرحالده، ۴۰ یاشدن سونگ حاملهدار بوله آلهدیلر. «بیر عیال ۵۰ یاشرلیککه قدر حاملهدار بوله آلهدی، چونکه ۵۰ دن ۵۵ یاشرلیکدن کیین، منوپوز دورهسیگه کیتهدی که بیر عیالنینگ تخمهلری فعالیت قیله آلمهیدی و حیض کوریشی هم توختهیدی و عیال باشقه حاملهدار بوله آلمهیدی.»
شونینگدیک فاریاب ولایتیدهگی نسایی-ولادی شفاکارلریدن سیوگلی قاچمسنینگ ایتیشیچه، عیاللر ۴۰ یاشرلیکدن سونگ مناسب طبی مراقبتلر بیلن حاملهدار بولیب و حاملهدارلیک دورهسینی یخشی بیر شکلده اوتکزه آلهدیلر. «بیر قطار ایشانچلر اساسیده، عیاللر ۴۰ یاشرلیکدن سونگ حاملهدار بوله آلمهیدیلر. بو ایشانچلر درست ایمس و عیاللر طبیعی حالتده حاملهدار بوله آلهدیلر و شونینگدیک نسایی ولادی بیر شفاکار بیلن مصلحت قیلسینلر.»
بیزلرنینگ «ایکس» ترماغی ده هم تعقیب قیلینگ!
شوندهی بیرحالده، روانشناسلردن بیری عبدالمنان حقیارنینگ اورغولشیچه، روحی سلامتلیک حاملهدارلیکده مهم اورینگه ایگه دیر و افسردهلیک همده تشویش کبی روحی قیینچیلیکلر، بیر عیال گه سلبی تاثیر قویه آلهدی. «افسردهلیک، تشویش و استرس کبی روحی قیینچیلیکلر، عیاللر گه سیزیلرلی درجهده تاثیر قویه آلهدی.»
حاملهدارلیک، عیاللر حیاتیده مهم دوره بولیب، آنه بیلن چقهلاق سلامتلیگینی تضمین قیلیش اوچون روحی و اجتماعی حمایتلر بیلن مخصوص طبی مراقبتلر عملگه آشیریلیشی کیرهک. یوقاری یاشلرده حاملهدارلیکنینگ خاص شرایطی توغریسیده عایلهلر و جمعیت آگاهیلیگی آشیریلیشی، آنهلر سلامتلیگیده مهم آدیمگه ایگه بوله آلهدی.
