پاکستان دن قیتگن قاچقینلردن قطاری، باش‌پنه‌سیزلیک خصوصیده خواطر بیلدیریب سلام‌وطندار گه ایتیشلریچه، ساووق هوا‌ده چادر آستیده حیات کیچیریش قیین دیر.
مملکت گه قیتگنلردن بیری اسد‌الله نینگ ایتیشیچه: «افغانستان گه کیلگنی‌میزدن بیر یریم آی بوله‌دی و باش‌پنه‌میز یوق، سرپرست حکومت‌دن بیزلر گه اوی قوریلیشی نی ایسته‌یمیز.»
پاکستان دن قیتگنلردن باشقه بیری شباب، سرپرست حکومت‌دن اولر گه اوی قوریلیشی نی ایسته‌گن. اونینگ ایتیشیچه: «حکومت‌دن بیزلر گه اوی قوریلیشی و ییگولیک خصوصیده‌گی نیازرلریمیز نینگ تأمین‌لنیشی نی ایسته‌یمیز که بو نرسه‌لر حیات نینگ دستلبکی خذمت‌لری دیر و اولر گه قول تاپیشی‌میز کیره‌ک.»
بیزلرنینگ «ایکس» ترماغی ده هم تعقیب قیلینگ!
شونده‌ی بیرحالده، ایکینچیلیک، سووغاریش و چاروه‌چیلیک وزیرلیگی مسئوللری نینگ ایتیشلریچه، پاکستان دن قیتگن نیازمند یشاوچیلر گه عایله اعضالری نینگ سانی گه قره‌ب، ملکیت حجتی بیلن ۲۰۰ مینگ نمره یشش ییر ترقه‌تیله‌دی.
ایکینچیلیک، سووغاریش و چاروه‌چیلیک وزیرلیگی سرپرستی عطاءالله عمری نینگ ایتیشیچه: «۱۰ کیشی‌لیک بولگن نیازمند عایله‌لر گه، ۱۰ بسوه و عایله اعضاسی کوپ بولگن عایله‌لر گه ۱۵ بسوه ییر ترقه‌تیله‌دی و افغانستان ده ییری بولمه‌گن مهاجرلر گه بیریله‌دی.»
ایکینچیلیک، سووغاریش و چاروه‌چیلیک وزیرلیگی مسئوللری نینگ ایتیشلریچه، افغانستان ده اوی قوریش اوچون ییری بولگن؛ بیراق ایشی بولمه‌گن کیشیلر گه، ایش زمینه‌سی یره‌تیلیشی اوچون، بیر قنچه مدت اجاره‌یی شکلده ایکینچیلیک ییرلری اختیارلریگه قرار بیریله‌دی.
بیزلرنینگ فیسبوک صحیفه‌میزگه باش اورینگ!
بولر گه علاوه، پاکستان ۱-نوامبردن افغانستان‌لیک مهاجرلر نینگ اوشبو مملکت‌دن جبردن چیقریش پروسه‌سی نی باشلب و حاضرگچه، قریب یریم میلیون افغانستان‌لیک یشاوچی مملکت گه قیتریلگن.
پاکستان نینگ وقتینچه‌لیک حکومتی ایچکی ایشلر وزیری سرفراز بوگتی اوتگن کونی خبری بیر ییغین‌ده ایتیشیچه، حاضرگچه ۴۸۲ مینگ ۸۴۵ افغانستان‌لیک قاچقین، تورلی چیگره‌لردن اوشبو مملکت نی ترک قیلگنلر.
شونینگدیک پاکستان نینگ وقتینچه‌لیک حکومتی ایچکی ایشلر وزیری مذکور مملکت‌ده‌گی افغانستان‌لیک قانونی قاچقینلر گه، سیاسی فعالیت‌لر گه قول اورمه‌سلیکلری و سیاسی فعالیت‌لر گه شرکت قیلگنیلری صورت‌ده مملکت‌دن چیقریلیشلری خصوصیده آگاه‌لنتیرگن.
