مینگلب مهاجرنینگ ایراندن تخار گه قیتگنیدن آیلر اوتگن بولسه-ده، بیراق اولرنینگ کوپینچهسی حاضرگچه قیین شرایط و نامعلوم کیلهجک بیلن یشهماقده. اوشبو مهاجرلردن بیرقطاری، باشپنهسیزلیک، ایشسیزلیک و حیات دستلبکی امکانیتلریدن فایدهلنه آلمسلیک کبی قیینچیلیکلر بیلن دوچ ایکنلرینی ایتهدیلر.
عبدالله، قریب بیر ییل اول مجبوری شکلده ایراندن چیقریلیب و تخار گه قیتگن و عایله اعضالری بیلن بو ولایت دشتقله تومنیده یشهیدی. او شوندهی دییدی: «احوالیمیز یخشی ایمس، یاردم بیرهمیز دیب کارت بیرگن ایدیلر حاضرگچه قونغیراق قیلیشگنی یوق. بیزگه ایتگندیلر بو کارت بیلن طبی مرکزلرده تیکین دوالنهسیزلر بیراق کلینیکلر هم اعتبار قیلمهیدی و دوالش اوچون پول آلیشلرینی ایتدیلر.»
اوشبو مهاجرلرنینگ ایتیشیچه، عایله اعضالری بیلن قیین شرایطده یشهماقده و حاضرگچه حکومت و یاردم بیروچی تشکیلاتلر اولر گه یاردم کورستمهگن. اولر حکومتدن باشپنه قوریب و ایش امکانیتی یرهتیب بیریشینی سورهیدیلر.
محمدرحیم و قدسیه، ایراندن قیتگنلریدن بیر ییل اوتگن و تخار مرکزی تالقان شهریده یششماقده.
محمدرحیم شوندهی دییدی: «تورر جای اوچون باشپنهمیز یوق، احتیاجلریمیزنی تأمینلش گه قیینچیلیک بیلن دوچ میز، ساغلیق احوالیمیز یخشی ایمس، بیز گه حاضرگچه هیچ بیر تشکیلات تامانیدن یاردم کورسهتیلمهگن، ییر گه توشب اولتیریش اوچون حتا بیر پتومیز هم یوق.»
قدسیهنینگ ایتیشیچه: «افغانستان گه قیتگنیمیزدن بیری باشپنه و تورر جاییمیز یوق. مهاجرلر ادارهسیگه ثبتنام قیلدیک، قونغیراق قیلیشلرینی ایتدیلر کیلگنیمیزدن بیری هیچ دقت قیلیشگنی یوق و اجاره حویلیده یشهیمیز، اجاره پولی یوقاریلیگی اوچون تولشگه هم قوربیمیز ییتمهیدی.»
شو بیلن بیرگه، تخاردهگی ایریم اجتماعی فعاللر، بو مهاجرلرنینگ کوپینچهسی تورلی کونیکمه (مهارت)لرنی بیلهدی و حکومت اولر گه ایش امکانیتینی یرهتیشی کیرهک دییدیلر.
اجتماعی فعال ولیالله شوندهی دییدی: «مهاجرلرنینگ کوپینچهسی ایریم مهارتلرنی بیلیشهدی بیراق اولرنینگ قبول قیلیش اوچون انیق ریجه یوقلیگی، ایشسیزلیک و اقتصادی باسیملرنی آشیرهدی و اوزاق مدت دوام ایتگن حالده بویوک اجتماعی قیینچیلیککه سبب بولیشی ممکن.»
تخار محلی عملدارلری، مهاجرلرنینگ قیینچیلیکلری حل ایتیلیشی اوچون سعی-حرکت قیلهیاتگنلرینی ایتهدیلر.
تخار مهاجرلر باشلیغی شیراحمد انوری گه کوره، بو ولایتنینگ یوقاری مرتبهلی مسئوللری بیلن بیرگهلیکده، مهاجرلر گه یخشی شرایط یرهتیب بیریش گه حرکت قیلیشماقده. اونینگ ایتیشیچه: «تخار بهارک تومنی هوار سای حدودلریده ایکی مینگ جریب ییر مهاجرلر اوچون نظرگه آلینگن، البته مرکز و آلدین رویخط گه آلینگن همده حویلی و ییری بولمهگن مهاجرلر گه توزیع قیلینهدی.»
اوتگن بیر ییل دوامیده، مینگلب عایله ایران و پاکستاندن مجبوری شکلده چیقریلیب و مملکت گه قیتریلگن؛ بیراق اولرنینگ کوپینچهسی خیمهلر و یشاوچیلرنینگ اویلریده نامعلوم کیلهجک بیلن یشهماقده، بو معما قچانگچه دوام تاپیشی همان نامعلوم.
