غورده ایریم حاملهدار عیاللر بیزگک (ملاریا) کسللیگیگه چلینگنینی ایتیب، بو حالت حامله (جنین)لرنینگ سلامتلیگینی تهدید قیلهیاتگنلرینی بیلدیرگنلر.
غور یشاوچیسی بولگن ۳۲ یاشلی شکیلا، حاملهدارلیک تورتینچی آيیده ایتیشیچه، بیزگک که چلینگنی سببلی جنیننی قولدن بیریش تشویشی تاپیلگن. شکیلا شوندهی دییدی: «ملاریا گه چلینگنمن؛ شفاکار دارولرنی ترتیبلی روشده استعمال قیلیب و دمآلیشیمنی توصیه قیلدی؛ کوپینچه پیتلری ایسیتمه و تیترهی من، تنهم جوده ضعیف بولگن و هردایم فرزندلریم احوالیدن تشویش قیلهمن.»
غور مرکزی فیروزکوه شهری یشاوچیسی بولگن ۲۷ یاشلی قندگل، اوچ فرزند آنهسی ایتیشیچه، نیچه هفته ایلگری ملاریا گه چلینگن و ایندی دارو استعمال قیلماقده. او شوندهی دییدی: «منطقهمیزده سوو ییغیلهدیگن جایلرده چیوین کوپ و شونینگ اوچون کسل بولگن بولیشیم ممکن؛ حاضر حاملهدارلیگیم بیشینچی آیی دیر؛ شفاکار دارو بیرگن و دمآلیشیمنی توصیه قیلگن. جوده ضعیف من و ایسیتمم بار.»
شونینگدیک، غوردن بولگن ۲۵ یاشلی زهرا، بیرینچی فرزندینی دنیا گه کیلتیرگن شوندهی دییدی: «آلتینچی آی حاملهدارلیگیمده ملاریا گه چلیندیم. شفاکار کسلنی جدی آلیب و دارولرنی وقتیده استعمال قیلیشیمنی توصیه قیلدی. بو کسللیک مین اوچون جوده قیین. دایم باش آغریق و ایسیتمم بار و یخشی اوخلهی آلمهیمن.»
بیزگگ، آنوفل چیوینی چقیشی آرقهلی انسانگه یوقهدیگن کسللیک بولیب، یوقاری ایسیتمه، تیتراق، باش آغریق، عمومی حالسیزلیک و قوسیش اونینگ اساسی بیلگیلریدن حسابلنهدی.
باشقه تاماندن، غوردهگی ایریم شفاکارلر حاملهدار عیاللر تنهلریدهگی اوزگریش و معافیت سیستملری پسلیگی سببلی، کوپراق ملاریا گه چلینیشینی ایتهدیلر.
غورده شفاکار عتیقالله اکبرینینگ ایتیشیچه، حاملهدار عیاللرنینگ ملاریا گه چلینیشی اولرنینگ کمقانلیگی، وزن یوقاتیشی گه سبب بولیب آنه و جنین سلامتلیگینی خطر گه دوچ قیلیشی ممکن. اونینگ کوپهیتیریشیچه: «بیزگگ آنوفل چیوینی آرقهلی انسانگه یوقهدیگن پرازیت کسللیک دیر. حاملهدار عیاللر کوپراق خطر آستیده بولهدی. بو کسللیک آغیر کمقانلیک، جنین توشیشی، وزنی کم باله توغیلیشی و حتا آنه یا کی جنیننینگ اولیمیگه آلیب کیلیشی ممکن.»
علیاحمد صمدی، نسایی-ولادی متخصص شفاکارلریدن بیری، بیزگکنی ایرته انیقلش و حاملهدار عیاللر گه غمخورلیک قیلیش آنه سلامتلیگینی سقلش همده جنین گه ضرر ییتیشینینگ آلدینی آلیشگه یاردم بیریشینی ایتهدی. او شوندهی دییدی: «بیزگک قان تحلیلی آرقهلی انیقلنهدی و حاملهدارلیکنینگ ایستهلگن باسقیچیده تاپیلیشی ممکن. بو کسللیکنی دوالش اونینگ آغیرلیک درجهسیگه باغلیق بولیب، عادتده مخصوص دارولر یاردمیده و شفاکار نظارتی آستیده عملگه آشیریلهدی.»
چیوین تور (پشهخانه)لریدن فایدهلنیش، یشش محیطنی تازه سقلش، تورغون سوولرنینگ توپلنیشیگه یول قویمسلیک و اوز وقتیده طبیات مرکزلریگه مراجعت قیلیش آدملرنینگ، اینیقسه حاملهدار عیاللرنینگ بیزگککه چلینیشینی کمهیتیریشگه یاردم بیرهدی. اولراق، بیرلشگن ملتلر تشکیلاتینینگ ترقیات دستوری هم جاری ییلده افغانستانده بیزگکنینگ آلدینی آلیش مقصدیده حاملهدار عیاللر گه ۲۰۰ مینگ دانه چیوین توری ترقهتیلیشینی معلوم قیلگن ایدی.
