اوتگن کونی توش‌دن کیین قندوز ولایتی نینگ امام‌صاحب تومنیده «مولوی سکندر» مسجدی ایچیده قانلی پارتلش یوز بیردی که نتیجه‌ده اونلب تینچ اهالی اولیب یره‌لندیلر و اوتگن کونی شام چاغی، اسلامی امارت سوزلاوچیسی ذبیح‌الله مجاهد، اوشبو پارتلش‌نی محکوم قیلیشگه علاوه، تلفات رقمینی ۳۳ کیشی هلاک و ۴۳ کیشی یره‌لی اعلام قیلگن ایدی.
بوگون قندوز ساغلیق‌نی سقلش باشلیغی نجیب‌الله ساحل نینگ سلام‌وطندار گه ایتیشیچه، اوشبو ولایت نینگ امام‌صاحب تومنی «مولوی سکندر» مسجدی‌ده اویوشتیریلگن پارتلش نتیجه‌سیده، ۱۲ باله شامل ۳۶ کیشی هلاک و بیش باله شامل ۴۷ کیشی یره‌لنگن‌لر.
بیزلرنینگ فیسبوک صحیفه‌میزگه باش اورینگ!
قندوز ساغلیق‌نی سقلش باشلیغی نینگ کوپه‌یتیریشیچه، اوتگن کونی پارتلش‌دن کیین، ساغلیک تیم‌لر یره‌لرنی امام‌صاحب تومنیدن مذکور ولایت نینگ حوزوی و چیگره بیلمس کسلخانه‌لری گه انتقال بیرگنلر. اونگه کوره، اوچ یره‌لی کیشی نینگ وضعیتی آغیر دیر.
عین‌حالده، قندوز امنیه قوماندان‌لیگی نینگ امنیت آمری دوست‌محمد عبیده گه کوره، پارتلش ماده مسجد ایچیده کتاب جعبه‌سیده ییرلشتیریلیب و ذکر قیلووچی‌لر آره‌سیده پارتله‌تیلگن.
جناب عبیده قندوز ساغلیق‌نی سقلش ریاستی تامانیدن ترقه‌لگن رقم‌نی تصدیقلب ایتیشیچه، برچه ساحه‌لرده‌گی امنیتی مسئول‌لرگه، اوشبو حادثه یره‌لری بیلن همکارلیک قیلیشگه قوشیمچه، امنیت تأمین ایتیلیشی اچون دقت قیلیش‌لری سوره‌لگن. اونگه کوره، حادثه‌گه دایر تیکشیریش‌لر دوام ایتماقده و عامل‌لری تیزلیک بیلن قولگه آلینه‌دی.
باشقه تاماندن، پارتلش طفیلی مسجد ایچیده یره‌لنگن امام‌صاحب تومنی یشاوچیلریدن قطاری، روحی وضعیت‌لری یخشی ایمسلیگینی ایته‌دیلر.
اوشبو حادثه یره‌لریدن بیری عبدالغفار نینگ ایتیشیچه: «ذکر قیلیش بیلن مصروف ایدیم که پارتلش یوز بیردی، نیچه دقیقه‌دن کیین اهالی نینگ ییغی و ناله‌سینی کوردیم.» اونینگ کوپه‌یتیریشیچه، اوشبو ذکر دایره‌سیده ۱۲ یاشر باله‌سی جان بیریشی، اونی کوپ قیینه‌یدی.
شو بیلن بیرگه اوشبو حادثه یره‌لری اسلامی امارت مسئول‌لریدن، جنایتچیلرنی قولگه آلیب و اهالی امنیتی تأمین ایتیلیشینی سوره‌یدیلر. مذکور واقعه ملی و خلق‌ارا عکس‌العمل‌لرگه روپه‌رو بولگن.
ایران تشقی ایشلر وزیرلیگی اوشبو هجوم‌نی قاره له‌گن. مذکور وزیرلیک افغانستانده اویوشتیریلگن سونگی هجوم‌لرگه اشاره قیلیب، بو مملکتده زوروانلیکلر کوچه‌یشیدن خواطر بیلدیرگن.
ایران تشقی ایشلر وزیرلیگی نینگ سوزلاوچیسی سعید خطیب‌زاده بیر بیانیه ترقه‌تیب، تروریستیک گروه‌لر افغانستانده ایچکی اوروش باشله‌نیشی اوچون سعی و حرکت قیله‌یاتگنلرینی بیلدیرگن.
بیانیه‌ده کیلیشیچه: «اوتگن کونی مزاشریف‌ده شیعه‌لر مسجدی گه اویوشتیریلگن هجوم‌دن کیین، قندوز ولایتیده اهل سنت مسجدی گه هجوم بولدی که تروریست‌لر نینگ افغانستانده ایچکی اوروش باشله‌نیشی اوچون سعی و تلاش قیلیش‌لری نی کورسته‌دی.»
افغانستانده بیرلشگن ملت‌لر تشکیلاتی نینگ اورین باسرلیک هیأت دفتری یا یوناما، بو هجوم‌نی قاره‌لب، مذکور هجوم‌لرده کوپراق تینچ اهالی قربان بولگنی نی ایتگن.
مملکت سابق جمهور رئیسی حامد کرزی، اوشبو هجوم نی قاره‌لب، اونی افغانستان یشاوچیلری برابریده بیللی بیر دسیسه دیگن. او نینگ کوپه‌یتیریشیچه، مذکور شوم هدف‌لردن قوتیلیش یالغیز یول، اهالی نینگ آگاه‌لنتیریش، اتفاق‌لیک و بیردملیک دیر.
شونینگدیک ملی مصالحه عالی کینگشی نینگ سابق رئیسی عبدالله عبدالله، تعلیمی مرکزلر و مسجد‌لرده روزه و تینچ اهالی گه قرشی کیتمه_کیت اویوشتیریلگن هجوم‌لرنی توطئه دیب «بو هجوم‌‌لر افغانستان خلقی بیلن دشمن‌لیک قیلیش مقصده اویوشتیریلیشینی ایتگن.»
عبدالله افغانستان یشاوچیلریدن «مملکتده‌گی برادر شیعه و سنی قوم‌لر» ارا اتفاق‌لیکنی مستحکم‌لب، افغانستان یاولری نینگ دسیسه‌لری گه قرشی هوشیارلیک بیلن حرکت قلیش‌لرینی طلب قیلگن.
بیزلرنینگ توییترده هم تعقیب قیلینگ!
اسلامی امارت سوزلاوچیسی اوشبو هجوم‌نی قاره‌لب ایتیشیچه، واقعه عامل‌لری «فتنه‌چی و بوزیق‌باش» دیر. جناب مجاهد، مذکور حادثه عامل‌لرینی قولگه آلیش و جزالنتیریش اوچون سعی و حرکت قیلینه‌یاتگنینی تأکید ایتگن.
مذکور پارتلش، بلخ ولایتی نینگ مرکزی مزارشریف شهری‌ده «سه دکان» مسجدی ایچیده اویوشتیریلگن قانلی واقعه‌دن کیین یوز بیرگن. اوشبو هجوم مسئولیتینی اسلامی دولت (داعش) گروهی زمه‌سیگه آلیب و ۱۰۰ دن آرتیق کیشی اولیب و یره‌لنگنینی ادعا قیلگن.
