افغانستان ده بیرلشگن ملت‌لر تشکیلاتی خلق‌ارا آزیق-آوقات دستوری مسئوللری نینگ سلام‌وطندار گه ایتیشلریچه، کیله‌سی آلتی آی‌ده افغانستان ده نیازمندلر گه یاردم بیریش اوچون، ۱۱۱ میلیون دالر عاجل بودجه گه نیازلری بار. مسئوللر نینگ آگاه‌لنتیریشلریچه، بو مقدار پول اختیارلریگه قرار تاپمه‌گنی صورت‌ده، افغانستان ده نیازمندلر گه یاردم‌لری سطحی نینگ کمه‌یشی ممکن.
افغانستان ده بیرلشگن ملت‌لر تشکیلاتی نینگ خلق‌ارا آزیق-آوقات دستوری سوزلاوچیسی وحید‌الله امانی نینگ سلام‌وطندار گه ایتیشیچه: «قار یاغیش بیلن یوللری یاپیله‌دیگن اوزاق و تاغلی منطقه‌لرده آزیق-آوقات نی ذخیره قیلیش و قیش موسومی‌ده اوشبو منطقه‌لرده اوچ میلیون کیشی گه آزیق-آوقات ییتیشتیریش اوچون، بونگه جوده‌یم عاجل نیاز بار.»
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، کابل شهری‌ده نیازمند عایله‌لردن قطاری نینگ ایتیشلریچه، کون اوتیشی بیلن، انسان‌پرورلیک یاردم‌لر گه احتیاج‌لری کوپه‌یه‌دی.
کابل شهری یشاوچیسی جمال نینگ ایتیشیچه: «اقتصادی سطح جوده‌یم قویی کیلگن، ایشی‌میز یوق و کوپینچه قیین‌چیلیک بیلن روپه‌ره‌میز. عایله خره‌جتی نی تامین‌لش و اولردن حمایت قیلیش گه کوچی‌میز ییتیشمه‌یدی. کوپینچه یاردم گه نیازی‌میز بار.»
باشقه بیر تامان‌دن، افغانستان اوچون بیرلشگن ملت‌لر تشکیلاتی باش کاتبی نینگ مخصوص نماینده‌سی و یوناما باشلیغی روزا اوتونبایوا، مملکت‌ده قشاق‌لیک کوپه‌یشیدن خواطر بیلدیریب ایتیشیچه، افغانستاندده انسان‌پرورلیک یاردم‌لر بولیمی نینگ کوپینچه‌سی، غربی مملکت‌لر تامانیدن صورت تاپه‌دی و اوشبو مملکت‌لر مذکور یاردم‌لر نی یوباریش اوچون، سرپرست حکومت تامانیدن افغان عیال‌لر و قیزلر حقلری نی تامین‌لش خصوصیده تاکید قیلگنلر.
بیراق اسلام امیر‌لیگی نینگ ایتیشیچه، افغانستان گه یاردم بیرووچی مملکت‌لر، یاردم‌لری نی سیاسی قیلمه‌ی و سرپرست حکومت گه باسیم وسیله‌سی صفتیده فایده‌لنمه‌سلیک‌لری کیره‌ک.
بیزلرنینگ توییترده هم تعقیب قیلینگ!
اسلام امیر‌لیگی سوزلاوچیسی اورین باسرلریدن بلال‌کریمی نینگ ایتیشیچه: «بشری مسئله‌لر نینگ قید‌سیز و شرط‌‌سیز بولیشی کیره‌ک. اوشبو یاردم‌لر سیاسی بومه‌سین. بو اونملی بیر اصل دیرو اسلام امیر‌لیگی قید و شرط بیلن بولگن یاردم‌لر نی قبول قیلمه‌یدی. باشقه بیر تامان‌دن نیازمند کیشی‌لر گه یاردم بیریش و اهالی قیین‌چیلیگی نی حل قیلیش اوچون مخصوص برنامه‌لریمیز بار.»
بیرلشگن ملت‌لر تشکیلاتی خلق‌ارا آزیق-آوقات دستوری افغانستان بولیمی مسئوللری نینگ ایتیشیچه، جاری میلادی ییل نینگ باش آلتی آیی‌ده، افغانستان بویلب ۱۶ میلیون‌دن آرتیق نیازمند گه، آزیق-آوقات یاردم بیرگنلر که بو آره‌ده، ۸ میلیونی نی عیال‌لر تشکیل بیره‌دی.
