پاکستان تشقی ایشلر وزیری اوتگن کون بیر اعلامیه آرقلی ایتیشیچه، بوگون (چهارشنبه،۴_حوت) مذکور مملکت باش‌وزیری عمران‌خان روسیه گه قیلگن سفریده اوشبو مملکت جمهوررئیسی ولادیمیر پوتین بیلن اوچرشه‌دی.
مذکور اعلامیه اساسیده، افغانستان وضعیتی اوشبو ییغین‌ده ایکی تامان نینگ بحث گه آلینه‌دیگن موضوع‌لریدن دیر.
بیراق سیاسی ایش بیلرمان‌لر نینگ ایتیش‌لریچه، عمران‌خان بیلن پوتین نینگ اوچره‌شووی افغانستان وضعیتی خصوصیده هیچ قنده‌ی تاثیری یوق. اولر نینگ ایشانچ‌لری گه کوره، پاکستان حاضرگی وضعیت‌ده ایچکی خوفسیزلیک و اقتصادی قیین‌چیلیک بیلن روپه‌رو دیر و بو شرایط‌ده افغانستان وضعیتی خصوصیده هیچ بیر ایش قیله‌آلمه‌یدی.
سیاسی ایش بیلرمان‌لردن بیری خپلواک زازی نینگ ایتیشیچه، حاضر پاکستان فرقلی تامان‌لردن کوپینچه قرضی بار. اونگه کوره، اوشبو مملکت اوز ایچکی قیین‌چیلیکلری نی حل قیلیش اوچون سعی و حرکت قیلماقده.
اونینگ ایتیشیچه: «حاضرگی شرایط‌ده پاکستان آمریکا، چین، دنیا بانکی و آی‌ام‌اف‌دن کوپ قرضدار دیر. عمران خان حاضرگی وضعیت‌ده پاکستان ایچکی قیین‌چیلیگی نینگ حل قیلیشی نی ایسته‌یدی؛ لیکن برنامه آجنداسی نینگ باشلنیشی اوچون افغانستان موضوع‌سی نی آلگن؛ بیراق افغانستان گه هیچ منفعتی یوق.»
شونده‌ی بیرحالده، سیاسی ایش بیلرمان‌لردن باشقه بیری مطیع‌الله خروتی نینگ ایتیشیچه، حاضر پاکستان هر تامان‌دن ایچکی اوروش و ناتینچ‌لیک بیلن روپه‌رو دیر. جناب خروتی نینگ ایشانچی گه کوره، پاکستان نینگ ایچکی قیین‌چیلیگی و شرایطی گه توجه بولگن صورت‌ده، افغانستان خصوصیده اوشبو مملکت نینگ نظریه‌لری ارزشمند ایمس.
بیزلرنینگ توییترده هم تعقیب قیلینگ!
باشقه بیرتامان‌دن، خلق‌ارا رابطه‌لر بیلرمانی طارق فرهادی نینگ سلام‌وطندار گه ایتیشیچه، افغانستان‌ده‌گی برحال قدرتمندلر، تشقی مملکتلر نینگ اوچره‌شوولری گه سهیم بولیش یولی نی تاپیشلری کیره‌ک. اونگه کوره، افغانستان اوزیگه تیگیشلی مذاکره‌لریده، اوز نمایده‌سی نینگ اشتراک قیلیشی اوچون کوتیب توریلگن.
ایتیش کیره‌ک که پاکستان نینگ اقتصادی رابطه‌سی چین و شونینگدیک آمریکا بیلن بوزیلگن بیرحالده، عمران خان نینگ روسیه تامان سفری صورت تاپگن. باشقه بیر تامان‌دن، شونینگدیک روسیه و غربی مملکتلر آره‌سیده اوکراین مسله‌سی خصوصیده جنجال‌لر کوپه‌یگن.