قندوز ولایتیده حیات کیچیرهدیگن ۵۰ یاشر باغدار شیرمحمدنینگ سلاموطندار گه ایتیشیچه، بیش جریب ییرده شفتالو، زردآلو و آلمه باغینی یرهتگن که بو میوه درختلری منطقه اقلیمی بیلن ماس دیر. او، میوهلر قیمتی کمهیگنیدن خواطر بیلدیریب و کوپهیتیریشیچه: «الحمدالله بو ییل یخشی حاصل قولگه کیلتیرگنمیز. زردآلو، شفتالو و باشقه میوهلر یخشی ایدی. هیچ قندهی آفت ییتیشمهگن؛ بیراق میوهلرنینگ ییتیشگنیده، برچهسی بیرگه شهر گه آلیب باریلهدی و انه شوو سبب، میوهلر قیمتی کمهیهدی.»
قندوز دهگی باغدارلردن بیری عبدالحنان، ایکینچیلیک نهادلرنینگ بیر قطار همکارلیکلریگه اشاره قیلیب و ایتیشیچه، منظم شکلده فنی مصلحتلر بیریلگنی صورتده، باغدارلیک وضعیتینینگ یخشیلنیشیگه تاثیر قیلهدی. اونینگ کوپهیتیریشیچه: «تعلیمی و فنی مصلحتلرنینگ دواملی شکلده یرهتیلگنیده، باغدارلیک وضعیتی یخشیلنیشیگه سیزیلرلی درجهده تاثیر قیلیشی ممکن. حاضر ایسه قوروقچیلیک و ییترلی سوو یوقلیگی بیلن روپهرهمیز. شونینگدیک ساووقخانه یوقلیگی سبب، محصوللریمیز باشقه مملکت گه انتقال تاپیب و قیته یوقاری قیمت بیلن افغانستان بازاریگه کیلهدی.»
بیزلرنینگ «ایکس» ترماغی ده هم تعقیب قیلینگ!
قندوز دهگی باغدارلردن باشقه بیری نویدالله سادات، مذکور ولایتدهگی باغدارلر کیلهجگینی دولت و همکار نهادلرنینگ حمایتیگه تیگیشلی بیلهدی. «قندوز دهگی باغدارلر حمایت بولمسه، نتیجه بیرمهیدی؛ بیراق دولت و موسسهلر آرقهلی حمایت بولسهی و بیزلرگه ساووقخانه قوریلسه، میوهلر سقلنهدی و کیین ایته آلهمیز که قندوز ولایتیده باغدارلیک رواجلنگن و حقیقتاً رواجلنهدی.»
شوندهی بیرحالده، قندوز بیلیم یورتی زراعت فاکولتهسی استادی زاهدالله عابدنینگ ایتیشیچه، قندوز اقلیمی ایسیق یاز، یوموشاق قیش و حاصل بیرهدیگن توپراققه ایگه بولگنی سبب، میوهلردن کوپ قطارینینگ ایکیلیشی و ییتیشتیریلیشی اوچون ماس دیر. اونگه کوره، اوزوم، زردآلو، شفتالو، انار و حتا بادام و آلمه قندوز ولایتینینگ تومنلریدن قطاریده یخشی ییتیشهدی. جناب عابد، فنی آگاهیلیک یوقلیگی، اصلاح بولگن کوچتلردن فایدهلنه آلمسلیک، زمانهوی جهازلر یوقلیگی، تربیهلش اصولی رعایت بولمسلیگی و باغلرنینگ مدیریت بولمسلیگی همده آفتلرگه قرشی کورهشمسلیکنی، باغدارلرنینگ اساسی قیینچیلیکلریدن عنوان قیلهدی.
زاهدالله عابدنینگ کوپهیتیریشیچه: «باغدارلرنینگ قیینچیلیگی کوپ دیر؛ بیراق اینگ اونملی قیینچیلیکلر ایسه، باغدارلریمیزنینگ تجارتی، یخشی حاصل بیرهدیگن، صفتلی و کوچلی تورلریدن فایدهلنه آلمسلیک دیر و شونینگدیک باغدارلریمیز میوه درختلرینی تربیهلش و تولید توغریسیده بوتونلی آگاهیلیکلری یوق؛ البته تجارتی شکلی بیلن. شو رقم تربیهلش، شاخچهلرنی قیرقیش، آفتلرنی کنترول و مدیریت قیلیش اصلینی رعایت قیلمسلیک و شونینگدیک باغدارلر تجارتی باغلر اوچون زمانهوی تولیدی اوسکونهلردن فایدهلنه آلمهیدیلر.»
بولرگه علاوه، قندوز ایکینچیلیک، سووغاریش و چاروهچیلیک ریاستینینگ باغدارلیک آمری عبدالرحمان زاهد، باغدارلیککه قیزیقیش کوپهیگنینی امیدلنتیرووچی دیب و ایتیشیچه، باغدارلیک عایلهلر اقتصادی رواجلنیشی و ایش زمینهسی یرهتیلیشیده اونملی رول اوینهیدی. «ایکینچیلیک ریاستی آرقهلی همکار موسسهلر یاردمی بیلن باغدارلر گه یخشی خذمتلر کورسهتیلهدی. مثلا نیچه مدت آلدین همکار موسسهلردن بیری و رواجلنتیریش عمومی مدیریتی همکارلیگی بیلن قندوزنینگ ییتی تومنیده ییتی باغدارگه یریم جریب ییرگه اوزوم باغی یرهتیلدی. باغدارلیک عایلهلر اقتصادیدن حمایت قیلیشده قریب ۲۰-۳۰ فایز اصلی اورینگه ایگه دیر.»
بیزلرنینگ فیسبوک صحیفهمیزگه باش اورینگ!
ایتیش کیرهک که، اقلیمی و اقتصادی بحران اهالینینگ شانهسیگه آغیر باسیم قویگنی بیرحالده، باغدارلیک رواجلنیشی محلی اقتصاد رواجلیشی اوچون برقرار ییچیم یول صفتیده بیان بولهدی. شوندهی بیرحالده، دولت و همکار نهادلر آرقهلی اوزون مدتلی و هدفلی حمایتلر بولمهگنی صورتده، قندوز ده باغدارلیکنینگ حقیقی ظرفیتیگه قول تاپیش امکانسیز بولهدی. باغدارلر حکومت و خلقارا نهادلردن تخصصی تعلیملر یرهتیلیشی، ساووقخانهلر قوریلیشی، کوچلی کوچتلر و ساتیلیش برقرار بازارلرگه قول تاپیش زمینهسی یرهتیلیشی بیلن اولرنینگ بو یولده حمایت قیلیشلرینی ایستهگنلر.
