بوگون (چهارشنبه ۸- دلو) افغانستان انسان حقلری ایرکین کمیسیونی میلادی ۲۰۲۰- ییل ده تینچ‌اهالی نینگ تلفاتی حقیده ییل‌لیک گزارشی نی ترقتدی.
مذکور گزارش اساسیده، میلادی ۲۰۲۰- ییل ده مملکتده ۸ مینگ و ۵۰۰ تینچ‌اهالی هلاک و یرهلنگن. بولردن ۲ مینگ و ۹۵۸ تینچ‌اهالی هلاک و باشقه ۵ مینگ و ۵۴۲ تینچ‌اهالی ایسه تن جراحتی کوتارگن.
مذکور رقم میلادی ۲۰۱۹- ییل گه نسبتن ۲۱ فایز کمه‌یش نی کورسته‌دی. میلادی ۲۰۱۹- ییل ده مملکتده ۱۰ مینگ و ۷۷۲ کیشی هلاک و یرهلنگن ایدی کیم، بولردن ۲ مینگ و ۸۱۷ ته‌سی هلاک و ۷ مینگ و ۹۵۵ ته‌سی ایسه یرهلنگن ایدی.
انسان حقلری ایرکین کمیسیونی ده قید ایتیلگن رقم اساسیده، میلادی ۲۰۲۰- ییل ده ۸ مینگ و ۵۰۰ قربانی‌دن، ۵ مینگ و ۵۳۹ ته‌سی ایرکک، ۸۴۷ عیال و ۲ مینگ و ۱۹ ته‌سی ایسه باله‌لر دیر.
مذکور کمیسیون گه کوره، هلاک و یره‌لنگن‌لردن ۹۵ ته‌سی نینگ کیم‌لیگی بیللی بولمه‌گن.
انسان حقوقی ایرکین کمیسیونی نینگ گزارشی‌گه کوره، مغناطیسی ماین‌لر و جاده چیککه‌سیده جایلشتیریله‌دیگن ماین‌لردن کوپینچه فایده‌لنیش، هدفلی ترورلر، راکتی هجوم‌لر، انتحاری هجوم‌لر، زمینی آتیشمه‌لر و هوایی هجوم‌لر اوتگن ییل‌لر کبی تینچ اهالی‌گه جانی و مالی زیان ییتیشتیرگن.
اوشبو کمیسیون، تینچ اهالی تلفاتی کوپه‌یگنیدن خواطر بیلدیریب زوروانلیکلر کمه‌یتیریلیشی، آتیش‌کیسین و دایمی تینچلیک تامین‌لنیشی اوستیگه تاکید قیلگن.
انسان حقوقی ایرکین کمیسیونی، اوروش طرف‌لریدن خلق ارا انسان حقلری قاعده‌لریگه حرمت قیلیشی‌نی سوره‌ب و عمل‌لریگه قرشی جواب بیریشلرینی سوره‌گن.
انسان حقوقی ایرکین کمیسیونی‌گه قید ایتیلگن آمارلرگه کوره، ۲۰۲۰- ییلده هر بیر کیچه کوندوز ده اورتلمه ۸ تینچ اهالی هلاک و باشقه ۱۵ تینچ اهالی یرهلنگن.
۲۰۱۹- ییل‌گه نسبتن ۲۰۲۰- ییلده عیال‌لرنینگ تلفاتی ۱۳% کمه‌یگن. انسان حقوقی ایرکین کمیسیونی‌گه کوره، ۲۰۲۰- ییلده ۳۳۰ عیال هلاک و باشقه ۵۱۷ عیال یرهلنگن.
۲۰۱۹- ییل‌گه قره‌گنده ۲۰۲۰- ییلده اوروش‌لر سبب، باله‌لرنینگ تلفاتی ۲۵% کمه‌یگن. ۲۰۲۰- ییلده ۲۰۱۹ باله تلفات کورگن و بو جمله‌دن ۵۶۵ ته‌سی هلاک و باشقه ۱۴۵۴ ته‌سی یرهلنگن. لیکن ۲۰۱۹- ییلده ۲ مینگ و ۶۹۶ باله تلفات کورگن.
انسان حقوقی ایرکین کمیسیونی اختیاریگه قرار تاپگن معلومات‌لرگه کوره، ۲۰۲۰- ییلده تینچ اهالی تلفاتی جمله‌سیدن ۵۳% طالبان تامانیدن، ۱۵% حکومت و خلق ارا حمایتچی‌لری و ۵% ایسته داعش گروهی تامانیدن صورت تاپگن. تینچ اهالی تلفاتی دن ۲۵% نینگ عاملی نامعلوم بولیب و ۲% تلفات ایسه پاکستان حربی‌لری تامانیدن آتیلگن راکت اوقی‌لری سبب صورت تاپگن.
اوشبو کمیسیون‌گه کوره، ۲۰۲۰- ییلده تینچ اهالی تلفاتی نینگ کوپراغی پارتلش‌لر و جاده چیککه‌سیده جایلشتیریلگن ماین‌لر سبب صورت تاپگن و جاده چیککه‌سیده جایلشتیریلگن ماین‌لر، مقناطیسی و پارتلش‌لر سبب، ۹۲۳ کیشی هلاک و باشقه ۱ مینگ و ۶۴۹ کیشی یرهلنگن. اوشبو رقم ۲۰۲۰- ییلده تینچ اهالی تلفاتی دن ۳۰% بوله‌دی.
۲۰۲۰- ییلده مغناطیسی ماین‌لرنینگ پارتلگنی سبب، تینچ اهالی تلفاتی کوپه‌یگن و حاضرگه‌قدر مغناطیسی ماین‌لر عامللریدن کوپ قطاری قولگه آلینمه‌گن. کمیسیون نینگ کوپه‌یتیریشیچه، مغناطیسی ماین‌لردن امنیتی و دفاعی کوچلر، انسان حقوقی مدافعه‌چیلری، مدنی فعاللر، دولت ملکی ایشلاوچی‌لری، دین عالم‌لر، میدیا ایشلاوچی‌لری و قوم بویوک‌لریگه قرشی فایده‌لنیله‌دی.
انسان حقوقی ایرکین کمیسیونی‌گه کوره، ۲۰۲۰- ییلده اوشبو تاکتیک آرقه‌لی ۱۰۷۸ کیشی هلاک و باشقه ۱ مینگ و ۱۷۸ کیشی یرهلنگن.
افغانستان بوییچه انسان حقوقی ایرکین کمیسیونی نینگ کوپه‌یتیریشیچه، سونگی ۱۲ ییل (۲۰۰۹- ییلدن ۲۰۲۰- ییل گچه) عیاللر و باله‌لر شامل ۹۳ مینگ و ۴۹۲ کیشی تلفات کورگن و بو جمله‌دن ۳۱ مینگ و ۴۲۵ کیشی هلاک و باشقه ۶۲ مینگ و ۶۷ کیشی یرهلنگن.
انسان حقوقی ایرکین کمیسیونی، افغانستان‌لیکلر ارا سوزلشوولر سرعت تاپیشی، آتیش‌کیسین اعلان قیلینیشی، تینچ اهالی بولگن منطقه‌لرده آتیشمه صورت تاپمه‌یشی، جای‌سیز بولگن عایله‌لرگه دقت قیلیش، خبرچی‌لر، انسان حقوقی مدافعه‌چیلری، مدنی فعاللر و دین عالم‌لرنینگ هدفلی ترورلر قیلینیش‌لریگه توسیق بولیش‌نی پیشنهاد قیلگن. اوشبو کمیسیون، اوروش طرف‌لریدن ذکر قیلینگن پیشنهادلرگه دقت قیلیش و اونینگ رعایت قیلیشی‌نی سوره‌گن.
