سمنگان ولایتیدهگی عیاللردن قطارینینگ ایتیشلریچه، اقتصادی قیینچیلیکلر، ساغلیقنی سقلش مرکزلری اوزاق بولگنی، امکانیت آزلیگی و طبی خذمتلردن فایدهلنیش امکانیتینینگ چیکلنگنی، بو ولایتده عیاللردن قطارینی اویده توغروقنینگ تنلشگه مجبور قیلگن.
چقهلاقلرینینگ اویده دنیا گه کیلتیریش تجربهسیگه ایگه بولگن عیاللردن قطاریگه کوره، طبی خادملر بولمسدن اویده توغروق، اولر و چقهلاقلری اوچون کوپینچه قیینچیلیک و خوفگه سبب بولگن.
سمنگان ولایتی روی دو آب تومنی یشاوچیسی بولمیش ۳۰ یاشر حوریه رحیمینینگ ایتیشیچه: «کسلخانه اوزاقلیگی و ییرلی امکانیت یوقلیگی اوچون چقهلاغیمنی اویده دنیا گه کیلتیریشگه مجبور بولدیم. اوچینچی بالهم بولگنی بیلن ینه هم کوپ خواطرلنگن ایدیم. توغروق پیتیده یالغیز محلدهگی قابله بیلن سینگلیم یانیمگه ایدی. آغریق کوپ ایدی و نیچه ساعت دوام قیلدی. چقهلاغیم توغیلگنیدن کیین قان کیتدی و جوده ضعیف بولگن ایدیم. حاضر بیلهمن که کسلخانهده توغروق تینچراق دیر و کیینگی حاملهدارلیگیمده شفاکار نظری آستیده بولیش اوچون حتما تلاش قیلهمن.»
شونینگدیک فیروزنخچیر تومنی یشاوچیسی ۲۸ یاشر زهرا ظهورنینگ ایتیشیچه: «اقتصادی قیینچیلیک و کسلخانه گه باریش اوچون عایلهمنینگ رخصت بیرمسلیگی سبب، بالهمنی اویده دنیا گه کیلتیردیم. حاملهدارلیک دروهسیده شفاکار گه بارگنیم یوق. آغریق باشلنگنیده آنه و محلدهگی تجربهلی عیاللردن بیری یانیمگه ایدی و یاردم بیردی. جودهیم قیین و خواطرلنتیرووچی ایدی و جودهیم قورققن ایدیم.»
شوندهی بیرحالده، نسایی ولادی شفاکارلریدن قطاری اویده توغروق خوفلریگه اشاره قیلیب و اورغولشیچه، عیاللر توغیشنینگ احتمالی خوفلری آلدی آلینیشی اوچون طبی مرکزلر و ملکهلی شفاکارلرگه باریشلری کیرهک.
بو توغریده نسایی ولادی متخصصلریدن سمینه عزیزینینگ ایتیشیچه: «کسلخانهده بیر قطار آنهلرنی کورهمیز که اویده توغروقدن کیین جدی قیینچیلیکلرگه چلینیش طفیلی انتقال بیریلگنلر. حاضرگچه عایلهلردن قطاری آگاهیلیک آزلیگی، اقتصادی قیینچیلیکلر یا-ده دوالنیش مرکزلری یولی اوزاقلیگی سبب، بالهلرینی اویده دنیا گه کیلتیرهدیلر. آنهلر اولیمینینگ بیر بولیمی ایسه اوشبو اویده توغروققه تیگیشلی دیر. توصیهمیز شو که حاملهدار عیاللر منظم شکلده معاینهلرنی اوتکزسینلر و توغیش اوچون حتما طبی مرکزلرگه بارسینلر.»
شونینگدیک نسایی ولادی متخصصلریدن باشقه بیری مریم شریمنینگ ایتیشیچه: «توغروق طبی خادملر نظارتی آستیده بولمهگنی صورتده، توغروق آغریغینینگ دوام قیلیشی، آنهنینگ ضعف قیلیشی یا-ده طبی یاردملرگه عاجل شکلده نیاز تاپیلیشی کبی قیینچیلیکلرنینگ اورته گه کیلیشی ممکن. حاضرگچه بیر قطار جایلرده طبی خذمتلردن فایدهلنه آلمسلیک و آگاهیلیک آزلیگی سبب، عایلهلر اویده توغروقنی تنلهیدیلر. خوفلر کمهیشی مقصد توغیش اوچون طبی مرکزلریگه مراجعت قیلیشلرینی توصیه قیلهمیز.»
سمنگان ساغلیقنی سقلش ریاستی مسئوللرینینگ ایتیشلریچه، اویده توغروقلر کمهیشی مقصد، قیشلاقلرده طبی خذمتلر کوچلنیشی و آگاهیلیک دستورلرینی قولگه آلگنمیز.
سمنگان ساغلیقنی سقلش ریاستی حاملهلیک سلامتلیگی بوییچه عمومی مدیری شبنم عاصمنینگ سلاموطندار گه ایتیشیچه: «کسلخانهلر و کلینیکلرده ساغلیق خذمتلر کوچلنیشی و تورلی منطقهلرده مسلکی قابلهلرنینگ فعالیتی اوچون سعیوحرکت بولهدی. البته قیشلاقلردن قطاریده حاضرگچه طبی امکانیتلر کملیگی، دوالنیش مرکزلریگچه فاصله کوپلیگی و عیال شفاکار یوقلیگی بیر قطار قیینچیلیکلرنی یرهتگن. شونینگدیک ییتکرمهلر، طبی خادملر و اجتماعی ییغیلیشلر آرقهلی آگاهیلیک بیریش دستورلرینی قولگه آلگنمیز.»
شوندهی بیرحالده، افغانستان ده بیرلشگن ملتلر تشکیلاتی انسانسیورلیک یاردملرنی هماهنگ قیلووچی ادارهسی (اوچا)، نینگ ینگی گزارشی اساسیده، جاری میلادی ییلده افغانستان ده هر ۱۰۰ مینگ توغروقده قریب ۶۰۰ عیال جانلرینی قولدن بیریشلری ممکن. اوشبو نهادگه کوره، ساغلیقنی سقلش مرکزلر اوزاقلیگی، طبی خذمتلردن عیاللرنینگ آزراق فایدهلنه آلیشی و دوالنیش امکانیتلری کملیگی مملکتده آنهلر اولیمی میزانی کوپهیشی اصلی عامللریدن حسابلنهدی.
