پروان مرکزی چاریکار شهرینینگ بیرقطار محلهلریده «اوی نانواییخانهلری» اهالینینگ کوندهلیک احتیاجلریدن بیر قسمینی تأمینلهیدی. اویده نان یاپیش اوچون امکانیتی یا کی شرایطی بولمهگن عایلهلر اوز خمیرلرینی پیشیریش اوچون اوشبو نانواییخانهلر گه آلیب بارهدیلر، بو جریان اوشبو شهرده ییللردن بیری دوام ایتیب کیلگن.
شو بیلن بیرگه، ایریم یشاوچیلر نان آغیرلیگینینگ کمهیشی، صفتیدهگی فرقلر و مجازلرنینگ حقی رعایه قیلینمسلیگیدن شکایت قیلیشهدی. اولرنینگ فکریچه، نظارت بولمسلیک و انیق معیارلر یوقلیگی سببلی بو قیینچیلیک دوام ایتیشیگه سبب بولگن.
چاریکار شهری ناحیهلریدن بیری یشاوچیسی ۵۵ یاشلی قدریه، بعضی نانواییخانهلرده نان آغیرلیگینینگ کمهیشی و ستندردسیز یاقیلغی مادهلردن قوللنیلیشیدن تشویشده. او شوندهی دییدی: «یاغاچ ساتیب آلیب و تندیر یاقیب نان پیشیریش گه قوربیمیز ییتمهیدی. خمیر تیارلهیمیز و آلتی دانه ناننی اوی نانواییخانهلریگه یوبارهمیز. ایکی-تورت دانه بیر جایده آلیشهدی و عوضی گه پول هم بیرهمیز. اعتراض کورستسهی خمیریمیزنی باشقه قبول قیلیشمهیدی. تندیرنی ایسیتیش اوچون حتا بشکه یاقیشهدی.»
چاریکار یشاوچیلریدن باشقه بیری ساجده، نان آغیرلیگینینگ کمهیشیدن سونگ خمیرینی اوشبو نانواییخانهلر گه یوبارمهگنینی ایتهدی. اونگه کوره: «بیر مرته تورت دیشک خمیر یوباردیم بیز گه فقط اوچ دانه نان پیشیریب بیردی. ینه بیر مرته بیش دیشک یوباردیم ینه هم اوچ دانه نان پیشیریب بیردی. بیر کون آلتی دیشک یوباردیم. ینه هم اوچ دانه نان پیشیریب بیردی. بیلدیم کی خمیریمیز کم بولهدی؛ پول هم آلیشهدی و نان هم کم بولهدی. دولتدن کیلیب تیکشیریشنی ایستهیمیز – نیگه بوندهی قیینچیلیک بار.»
چاریکار شهری یشاوچیلریدن بیری شهرام، دوام ایتهیاتگن احوالدن شکایت قیلیب و اوی نانواییخانهلری نظارت ایتیلیشینی سورهیدی. اونینگ ایتیشیچه: «اوییمیز اطرافیدهگی اوی نانواییخانهلریگه خمیر آلیب باریب بیرهمیز، ناننی کم پیشیریشهدی. ایلگری بیر بوجی اون بیر یریم آی بولردی، بیراق حاضر ۱۵-۲۰ کونگه ییتمهیدی.»
شو بیلن بیرگه، محلی مسئوللرنینگ ایتیشیچه، یشاوچیلر بوندهی قیینچیلیک بیلن دوچ بولگن حالده، باغلیق ادارهلر گه مراجعت قیلیب شکایت قیله آلهدیلر. چاریکار بلدیه باشلیغی رازمحمد یاسر شوندهی دییدی: «اویی نانواییخانهلرینینگ قیینچیلیکلرینی ساغلیقنی سقلش، یشش محیط ادارهسی یا کی ولایت حاکمیتی بیلن شریک قیله آلهدیلر – اولر آرقهلی باغلیق ادارهلر نظارت قیلهدی. بعضی اجتماعی قیینچیلیکلر بار و بیز ایش قاعدهلریمیز اساسیده آدملرنینگ اویی گه کیریب و اولرنینگ ایشلرینی نظارت قیله آلمهیمیز.»
چاریکا شهری یشاوچیلری، بو وضعیت دوام ایتیشی نانواییخانهلر و مجازلر اورتهسیدهگی ایشانچ کمهیشیگه آلیب کیلیشی ممکن دییدیلر. اولر اوی نانواییخانهلری مسئول ادارهلر تامانیدن نظارت قیلینیب، مجازلر حقوقی و امانتدارلیک مدنیتی حقیده خبردارلیک بولیشینی سورهیدیلر.
