آلمان دولتی نینگ ینگی ریجه‌سی اوشبو مملکت فدرال پارلمانی‌ده تصویب ایتیلگن و مذکور ریجه اساسیگه، آلمان حربی‌لری نینگ افغانستانده‌گی ماموریتی کیله‌سی ۱۰ آی گچه تمدید قیلینگن. آلمان فدرال پارلمانی اوتگن “پنجشنبه” کونی دولت ینگی ریجه‌سینی تصدیق‌لب و اوشبو مملکت اردوسیگه ۱ مینگ و ۳۰۰ حربیسینی ۲۰۲۲- ییل ۳۱ جنوری گچه افغانستانده سقلشی اوچون رخصت بیرگن.
آلمان حربی‌لری نینگ افغانستانده‌گی ماموریتی جاری میلادی ییل ۳۱ مارچ ده یکونلنه‌دی. آلمان افغانستانده‌گی ماموریتی‌نی تمدید قیلگن ناتو نینگ بیرینچی عضوی دیر. آلمان دولتی نینگ آگاه‌لنتیریشیچه، ناتو کوچلری نینگ تیزلیک‌که افغانستاندن چیقشی تینچلیک سوزلشوولرینی خطر بیلن دوچ قیلیشی ممکن.
دوحه شرطنامه‌سیگه کوره، آمریکا و متحدلری نینگ بوتون حربی‌لری جاری ییل می آیی گچه افغانستاندن چیقیشی کیره‌ک. آمریکا حاضرده اوشبو شرطنامه‌نی تیکشیرماقده دیر.
آمریکا جمهور رییسی جو بایدن نینگ اوتگن کونی بیرینچی خبری ییعینیده ایتیشیچه، آمریکا حربی‌لری نینگ تعیین‌لنگن مهلت ده افغانستاندن چیقیشی فنی نقطه‌نظردن زور دیر. بیراق طالبان گروهی تعیین‌لنگن مهلت دن سونگ چیت‌ایللیک کوچلرنینگ افغانستانده قالیشی‌نی خطرلی عنون قیلگن.
ناتو حاضرگه‌قدر حربی‌لری نینگ افغانستانده‌گی حضوری خصوصیده قرار قیلمه‌گن. آمریکا و متحدلری نینگ تاکید قیلیشیچه، بیرلیکده افغانستان‌گه کیلگنلر و مناسب زمانده بیرلیککه چیقه‌دیلر.