کوپلب یاشلر تعلیم آلیش امکانیتلرینینگ چیکلنگنی، اقتصادی معمالر و ایشدهگی چیکلاولر گه دوچ کیلهیاتگن بیر پیتده، سلاموطندار» بیلن صحبت قیلگن ۱۶ نفر یاش موفقیتسیزلیکلر، امکانیتلرنینگ ییتیشمسلیگی و ییترلی حمایه بولمسلیگیگه قرهمی، سپورت، طبی تکنالوژی، ساغلیقنی سقلش، علمی و تدبیرکارلیک تنلاولریده موفقیت قازانیب، افغانستان نامینی ملی و خلقارا مقیاسده یوکسلتیریشگه موفق بولگنینی ایتیشگن.
اوشبو ۱۶ نفر یاشنینگ بیش نفری سپورت، ایکی نفری طبی تکنالوژی و ساغلیقنی سقلش، بیش نفری تدبیرکارلیک، بیر نفری تعلیم، بیر نفری انسان حقوقلری و ایکی نفری یازووچیلیک ساحهسیده فعالیت یوریتهدی. اولر سونگی ییللرده اوز مملکتی اوچون کوزگه کورینگن یوتوقلرنی قولگه کیریتیشگن.
سپورت آلتینیدن علم آلتینیگچه؛ چیگرهلرنی ضبط ایتگن یاشلر
کابل ولایتیدن بولگن ۲۸ یاشلی محمد یوسف جهانگیر، افغانستان تاریخیده ایلک بار اسلامی بیردملیک مملکتلری اویینلریده آلتین مدالینی قولگه کیریتگن. او شوندهی دییدی: «سونگی مدالنی اسلامی بیردملیک مملکتلری مسابقهسیده قولگه کیریتدیم. بو افغانستان سپورتی تاریخیدهگی بیرینچی آلتین مدالی ایدی. مدالنی آلگنیمده جوده خورسند بولدیم، اوشه لحظهده کوزلریمگه یاش کیلدی و ییغلهدیم.»
کنیاده یشاوچی افغان سپورتچیسی امیدالله علیزاده، هم کوپلب قیینچیلیکلر گه قرهمی، نیپالده اوتکزیلگن خلقارا مسابقهلرده بیر آلتین، بیر کوموش و بیر برنز مدالنی قولگه کیریتگن. او شوندهی دییدی: «سونگی ایکی ییلدهگی اینگ مهم یوتوغیم – شو ییل می آییده آسیا قهرمانی بولگنیم، شونینگدیک، نیپالده اوتکزیلگن «اوپن مالی» مسابقهسیده قهرمان بولگنیمدیر. اوچته مدال قولگه کیریتدیم. بیری آلتین، بیری کوموش و ینه بیری برنز.»
یاشلر سپورت یانیده، علم-فن و طبی تکنالوژی ساحهسیده هم کتته یوتوقلر گه ایریشماقده. برازیلده ایلک طبی فعالیت مجوزینی قولگه کیریتیشدن تارتیب، صنعی هوش بوییچه خلقارا مدالنی قولگه کیریتیشگچه بولگن یوتوقلر خارج دهگی یاش افغان شفاکارلرنینگ موفقیتلریدن دیر.
غزنی ولایتیدن بولگن ۲۹ یاشلی صنعی هوش تدقیقاتچیسی فریدون فرزاد، روسیهده اوتکزیلگن خلقارا اختراعلر و نوآورلیک تنلاویده آلتین مدال همده مخصوص مکافاتنی قولگه کیریتگن. او شوندهی دییدی: «سونگی ایکی ییلدهگی اینگ مهم یوتوغیم – خلقارا اختیارلر فستیوالیده آلتین مدالنی قولگه کیریتگنیم و طبی تکنالوژیلر ساحهسیده علمی یوتوقنی قید ایتگنیم بولدی. بو موفقیت مینگه شونی کورستهدی کی، انسان اوز قابلیتیگه ایشانیب، تینیمسیز محنت قیلسه، خلقارا مقیاسده هم یوتوقلر گه ایریشیب، افغانستان نامینی یوکسلتیریشی ممکن.»
غزنی یشاوچیسی بولگن ۳۴ یاشلی امانالله درمان، سرطان و صنعی هوش ساحهسیده تدقیقات آلیب بارهدی. او اوتگن ییلی برازیلنینگ اینگ یخشی ۱۰ نفر متخصصی قطاریدن جای آلگن. شونینگدیک، او برازیلده طبی فعالیت یوریتیش جوازینی آلگن ایلک افغان شفاکاری صفتیده تنیلگن. اونگه کوره: «بیلیشیمچه، مین برازیلده طبیات بیلن شغللنیش اوچون جواز آلگن بیرینچی افغان شفاکاری من. شونینگدیک، افغانستان و برازیلده کوکرهک سرطانی کورستکیچلرینی قیاسی اورگنگن ایلک تدقیقاتیمنی نشر ایتتیردیم. بوندن تشقری، سرطان و صنعی هوش ساحهلریده ینه ایکی علمی مقالهم چاپ ایتیلدی.»
بو یاشلر آرهسیده پروان ولایتیدن بولگن ۱۹ یاشلی راشد، جاری ییلگی کانکور امتحانیده مکسیمل ۳۶۰ نمره آلیب مملکت مقیاسیده اینگ یوقاری نتیجهنی قید ایتدی. بو افغانستان کانکور امتحانی تاریخیده سونگی بیر نیچه ییل ایچیدهگی مثلی کوریلمهگن نتیجهلردن بیری دیر. او شوندهی دییدی: «هر قندهی مقصد گه ایریشیش اوچون معیین قاعدهلر گه رعایه قیلیش کیرهک. مین هم کانکور امتحانیدهگی مقصدیمگه ایریشیش اوچون شو قاعدهلرنی حسابگه آلدیم. بیرینچی – مقصدنی بیلگیلش، ایکینچی ایسه مینگه قندهی دوام ایتیشیم کیرهکلیگینی توغری یونهلتیرهدیگن اینگ یخشی استاذلرنی تنلش ایدی.»
قیینچیلیکلرنی امکانیت گه ایلنتیرگن اولاد (نسل)
علمی و سپورت یوتوقلردن تشقری، افغانستاننینگ ایریم یاشلری نوآورلیک بیزنسلرنی یولگه قوییش آرقهلی موفقیت سری ینگی یول یرهتماقده.
کابللیک ۲۶ یاشلی سویتا محمدی، ۲۰۲۵-ییلگی تدبیرکارلیک تنلاوی غالبلریدن بیری بولیب، عایلهسینینگ قوللب-قوتلاوی یوقلیگی، مبلغ و امکانیتلر ییتیشمسلیگیگه قرهمی، قوزیقارین ییتیشتیریش غایهسینی عملگه آشیریش گه موفق بولگنینی ایتهدی. او شوندهی دییدی: «سونگی تورت آی ایچیدهگی اینگ مهم یوتوغیم – ۲۰۲۵ ییلگی تدبیرکارلیک تنلاوی غالبلریدن بیری صفتیده تنلنگنیم بولدی. مینینگ لایحهم قوزیقارین ییتیشتیریش ایدی. غایهمنی عملگه آشیریشنی آرزو قیلردیم، بیراق مبلغیم یوق ایدی. بختیمگه، امکانیت گه ایگه بولگنیمدن سونگ، اونی عملگه آشیردیم.»
بو یاشلر، موفقیت گه ایریشگونیگه قدر امکانیتلرنینگ ییتیشمسلیگی، اقتصادی چیکلاولر، قوللب-قوتلنمسلیک همده تعلیم و کسبی امکانیتلردن فایدهلنیشدهگی قیینچیلیکلر کبی معمالر گه دوچ کیلیشگن.
قندوز ولایتی یشاوچیسی بولگن ۲۶ یاشلی سمیعالله حمیدی، خلقارا المپیک مسابقهسیده ۲۰ ته مملکت وکیللرینی آرتده قالدیریب، مدالنی قولگه کیریتگنینی ایتهدی. او شوندهی دییدی: «امکانیتلرنینگ ییتیشمسلیگی، مالیهوی معمالر، مشغولاتلردهگی چیکلاولر و حیاتدهگی قیینچیلیکلر اینگ کتته معمالریمدن ایدی. بیراق الله گه توکل، تیریشقاقلیک، انتظام همده عایلهم و مربیلریمنینگ کمکی بیلن بو توسیقلرنی یینگیب اوتدیم و مقصدلریمگه ایریشیش اوچون هیچ قندهی سعی-حرکتدن واز کیچمهدیم.»
شونینگدیک، کابللیک ۱۹ یاشلی مرحمت هم کوپلب قیینچیلیکلر گه قرهمی، عیاللر اوچون اوز برندینی یرهتیشگه موفق بولگن تدبیرکارلردن بیری دیر. اونینگ ایتیشیچه: «تدبیرکارلیک یولی گللر بیلن قاپلنگن ایمسلیگینی بیلهمن. اقتصادی خواطرلر کبی معمالر دایما بار. بعضاً هیچ نرسه ریجهلشتیریلگنیدیک کیتمهیدی. مین تسلیم بولیش اورنیگه هر بیر توسیقنی اوزیم اوچون بیر درس گه ایلنتیردیم.»
استعداد قولب-قوتلاو اساسیده بنیاد ایتیلگن کیلهجک
شو بیلن بیرگه، جمعیتشناسلر تورلی ساحهلرده یاشلرنینگ ایریشهیاتگن موفقیتلری افغانستان یاش اولادینینگ کتته صلاحیتیدن دلالت بیریشینی ایتماقده. بیراق بو صلاحیتنی ینهده رواجلنتیریش اوچون تعلیم امکانیتلرینی یرهتیش، یاشلرنینگ نوآورلیکلرینی قوللب-قوتلش و محنت قیلیش اوچون شرایط یرهتیش ضرور.
جمعیتشناس محمدشریف حیدری شوندهی دییدی: «بو موفقیت فقط شخصی یوتوق ایمس. بلکی شخصنینگ اوزیدن تشقریده هم تأثیر گه ایگه بولگن اجتماعی حادثه دیر. بوندهی یوتوقلر باشقهلر اوچون نمونه و یول-یوریققه ایلنهدی، بو انسانلر ایسه باشقه یاشلر اوچون منبع گه ایلنهدی.»
ملی المپیک کمیته مسئوللری، مدال صاحبی بولگن سپورتچیلر مملکت گه قیتگچ، مادی و معنوی جهتدن تقدیرلنیشینی، مسابقهلر گه جونهتیلیشیدن آلدین ایسه اولر اوچون مشغولات و ضرور شرایطلر یرهتیلیشینی ایتهدیلر.
ملی المپیک، جسمانی تربیهلش و سپورت کمیتهسی سوزلاوچیسی اتل مشوانی شوندهی دییدی: «حاضرده کوپلب سپورت فدراسیونلریمیزنینگ خلقارا سپورت تشکیلاتلری تامانیدن تأمینلنیشی کیرهک بولگن تشقی مبلغلر توختهتیلگن. شو سببلی ایریم ساحهلرده مالیهوی معمالر بار. بیراق شونگه قرهمی، خصوصی سکتور کمکی و ایچکی بودجه امکانیتلریدن فایدهلنیب، احتیاجلرنی امکان قدر قاپلب همده سپورتچیلرنینگ خارجی مسابقهلرده قتنهشیشی اوچون شرایط یرهتیشگه حرکت قیلماقدهمیز.»
ساغلیقنی سقلش وزیرلیگی مسئوللری هم، اوشبو وزیرلیک خارجده یشهیاتگن افغان متخصصلرینینگ صلاحیتیدن فایدهلنهیاتگنینی ایتهدی. اولر اوچون مخصوص مکانیزم یرهتیلیب، قیسقه مدتلی طبی و تعلیم دستورلریده اشتراک ایتیش، تجربه و بیلیملرینی مملکت ایچیدهگی طبیات خادملریگه ییتکزیش امکانیتی یرهتیلگن.
ساغلیقنی سقلش وزیرلیگی سوزلاوچیسی شرافت زمان امرخیل شوندهی دییدی: «باشقه مملکتلرده تحصیل آلگن قریب ۱۵۰ مینگ نفر متخصص ینه مملکت گه قیتیب، اوز فعالیتینی باشلهگن. اولرنینگ ایریملری اینیقسه سرطان کسللیگی و باشقه ساحهلرده فعالیت یوریتماقده. مرکز (کابل)ده فعالیت آلیب بارهیاتگن متخصصلرنی سقلب قالیش، رغبتلنتیریش و خذمتلرینی رواجلنتیریش اوچون اولر گه مخصوص امتیازلر بیلگیلهگن میز.»
بو یاشلرنینگ تجربهسی و فعالیتی شونی کورستهدی کی، موفقیت فقط امکانیتلر گه باغلیق ایمس؛ اراده محنتسیورلیک و امید هم انساننی موفقیت سری ییتکلهی آلهدی. اولرنینگ یوتوقلری شخصی غلبهلردن هم کینگراق معناگه ایگه بولیب، افغانستان یاش اولادینینگ ینهده یارقین کیلهجکنی برپا ایتیش صلاحیتینی نمایان ایتهدی.
