تخار ولایتیده مخدره ماده‌گه چلینگن بیر عیال سابق پولیس قطاریده فعالیت قیله‌ریکن و حاضرده قیته‌دن پولیس صفتیده خذمت قیلیش‌نی ایسته‌یدی. اوشبو عیال نینگ نامی فاطمه دیر. او، تخار مرکزی تالقان شهریده حیات کیچیره‌دی.
اونینگ ایتیشیچه، ۶ ییلدن بویان مخدره ماده‌گه چلینگن و تورموش اورتاغی (ایری) هم معتاد دیر. فاطمه مخدره ماده‌گه چلینگنی‌دن سونگ، وظیفه‌نی ترک قیلگن.
فاطمه و تورموش اورتاغی (ایری) تالقان دینگیزی نینگ بیر گوشه‌سیده حیات کیچیره‌دیلر. اوشبو عیال گه کوره، تالقان شهریده کمیده ۲۰ یاش قیز مخدره ماده دن قولنه‌دی.
فاطمه نینگ ایتیشیچه، تورموش قورگنی‌دن سونگ، مکتب‌نی ترک قیلگن. اونینگ کیچیک باله‌لری هم بار و باله‌لریدن قیین‌آنه و قیین‌آته‌سی سرپرست‌لیک قیله‌دی.
اوشبو عیال، بیر مدت تخار پولیس قومندانلیگی تشکیلی‌ده پولیس صفتیده وظیفه انجام بیرگن. فاطمه حاضرده تخار ولایتی بوییچه عیاللر ریاستی و تخارلیک بیر یاش نینگ یاردمی بیلن درمانلنیش اوچون کسلخانه‌گه انتقال بیریلگن. او، حکومتدن پولیس تشکیلاتیده فعالیت قیلیش اوچون زمینه یره‌تیشی‌نی سوره‌یدی.
تخار ده مخدره ماده ساتیووچی‌لر کم ایمس. تخار پولیس قومندانلیگی ایشلاوچی‌لری هفته‌ده مخدره ماده ساتیووچی‌لریدن بیرقطارینی قولگه آله‌دی، لیکن ینه هم مخدره ماده ساتیووچی‌لری و بو ماده گه چلینگن‌لرنینگ سانی کون اوتیش بیلن کوپه‌یب بارماقده.