بوگون “شنبه” ایرته‌دن چاغیده گاز تانکرلریدن بیری هرات شهری نینگ «کمرکلاغ» منطقه‌سیده گازنی خالی قیله‌دیگن پیتده اوت آلیب و نتیجه‌ده مذکور منطقه‌ده بولگن ایکی گاز شرکتیگه کوپینچه مالی زیان ییتیشگن.
هرات ده گاز وارد قیله‌دیگنلر بیرلشمه‌سی باشلیغی ظاهرشاه توخی نینگ ایتیشیچه، مذکور واقعه‌ده کمیده ۲۰ تانکر، ایکی تاسیسات و بیر گاز ذخیره‌سی نابود ایتیلگن.
جناب توخی نینگ ایتیشیچه، بیرینچی معلومات‌لرگه کوره، مذکور واقعه کمیده ۱ میلیون دالر زیان ییتیشتیرگن.
هرات ولایتی بوییچه صناعت و سوداگرلیک اتاقی نینگ اجرایی آمری محمدرفیع رحمانی نینگ ایتیشیچه، گاز شرکت‌لریده ایمنی نکات‌لر استندرد بولمه‌گنی سبب، بو واقعه صورت تاپگن. اونینگ ایتیشیچه، گاز شرکت‌لری نینگ شهر یقینیده بولگنی و اولرنینگ زمانه‌وی توزه‌تیش خصوصیده حکومت نینگ دقت‌سیزلیگی خواطرلنترووچی دیر.
صناعت و سوداگرلیک اتاقی اورین باسری و بو واقعه‌ده زیان کورگن‌لردن بیری حاجی سعید صدیقی نینگ ایتیشیچه، ۱۵ تانکری اوت آلگن و مذکور تانکرلر قتناو یول‌لرنینگ یاپیق بولگنی سبب، توخته‌تیلگن ایکن.
عین‌حالده، هرات حاکمی سوزلاوچیسی جیلانی فرهاد نینگ ایتیشیچه، گازنی خالی قیله‌دیگن جریانده دقت‌سیزلیگ و ایمنی نکات‌لر رعایت بولمه‌گنی سبب بو یانغین صورت تاپگن. اونینگ ایتیشیچه، یانغین اوچیرووچی تیم محل‌گه باریب کوپراق زیان‌گه توسیق بولگن.
نیچه ییل آلدین هم انه‌شو منطقه‌ده گاز شرکت‌لریدن بیرقطاری اوت آلگن ایدی و نتیجه‌ده محل یشاوچی‌لریدن کمیده ۱۰ ته‌سی هلاک ایتیلگن ایدی.
شونینگدیک، ۲ آی آلدین اسلام‌قلعه گمرکی اوت آلیب و نتیجه‌ده ۱۵۰۰ دن آرتیق موتر و تانگر نابود ایتیلگن ایدی.
