بوگون “دوشنبه” فاریاب تومن‌لریدن اوشبو ولایت مرکزی میمنه شهریده آواره بولگن‌لردن قطاری ناراض‌لیک نمایش یولگه قوییب حکومت و طالبان گروهی‌دن آتیش‌کیسین اعلان قیلیش‌لرینی ایسته‌گنلر.
اعتراضچی‌لرنینگ ایتیش‌لریچه، ۷ آیی‌دن بویان میمنه شهریده تیریک‌چیلیک قیله‌دیلر و انه‌شوو مدت‌ده حکومت و سوداگرلرنینگ خیرات‌لریدن آوقات‌لنگنلر و بو وضعیت اولرنینگ اوستیگه سلبی تاثیر قوییگن.
آواره بولگن‌لردن بیری سیدصبغت الله نینگ ایتیشیچه، تینچلیک تامین‌لنیشی اوچون توپلنگن‌لر و بو ییغین آرقه‌لی، تینچلیک، آواره‌لرنینگ اساسی ایستکلریدن بولگنی‌نی حکومت و طالبان‌گه ییتیشتیریش‌نی ایسته‌یدیلر.
شونینگدیک، قیصار یشاوچی‌لریدن بیری علی‌محمد نینگ ایتیشیچه، طالبان نینگ ظلمی سبب، اوی و جای‌لرینی ترک قیلیب میمنه شهری‌گه کیلگنلر.
علی‌محمد نینگ کوپه‌یتیریشیچه، جای‌سیز بولگن‌لر تینچلیک و قیته‌دن اوز اوی‌لریگه باریش‌نی ایسته‌یدیلر و بوتوغریده دقت قیلینیشی کیره‌ک.
جای‌سیز بولگن‌لردن باشقه بیرقطاری نینگ ایتیش‌لریچه، اوروش یکونلنتیریلیشی و قیته‌دن اوی‌لریگه باریش اولرنینگ اساسی ایستکلریدن دیر.
آواره‌لر فاریاب ولایت مقامی برابریده توپله‌نیب طالبان گروهی و افغانستان حکومتیدن آتیش‌کیسین اعلان قیلیش‌لرینی سوره‌گنلر.
اولرنینگ آگاه‌لنتیریش‌لریچه، ایستک‌لریگه دقت بولمه‌گن صورتده، اعتراض‌لرینی کینگی‌تیریب و تینچلیک ایسته‌ش‌گه دوام بیره‌دی‌لر.
