قطر پایتختی دوحه، ایرته دن باشلب افغانستان وضعیتی گه دایر بیرلشگن ملتلر تشکیلاتی باش کاتبی نینگ ایکّی کون‌لیک ییغیلیشیدن میزبان‌لیک قیله‌دی.
دوحه ییغیلیشی آجنداسی حاضرگچه بیللی بولمه‌گن بولسه ده، بیراق اوشبو ییغیلیش ده افغانستان نینگ وضعیتی، اسلام امیرلیگی بیلن جهان نینگ قنده‌ی همکارلیک قیلیشی و بیرلشگن ملتلر تشکیلاتی تامانیدن افغانستان اوچون مخصوص وکیل تعیینلنیشی و افغانستان اوچون بیرلشگن ملتلر تشکیلاتی باش کاتبی نینگ هماهنگ قیلووچیسی تامانیدن مستقل طرزده تیکشیریلگن گزارش بحث گه آلینیشی کوتیله‌دی.
مذکور ییغیلیش ده مملکت‌لر و تورلی تشکیلات‌لر نینگ مخصوص وکیل‌لری اشتراک قیلیشی کوتیله‌دی. اسلام امیرلیگی بوندن آلدین دوحه ییغیلیشی ده اشتراک قیلیش اوچون بیرلشگن ملتلر تشکیلاتی تامانیدن تکلیف بولگنینی ایتگندی؛ بیراق اسلام امیرلیگی بو ییغیلیش ده اشتراک قیلیش یا که قیلمسلیگینی حاضرگچه شریک قیلمه‌گن.
بیزلرنینگ فیسبوک صحیفه‌میزگه باش اورینگ!
اسلام امیرلیگی سوزلاوچیسی ذبیح‌الله مجاهد نینگ ایتیشیچه، دوحه ییغیلیشی ده اسلام امیرلیگی وکیلی اشتراک قیلیش یا که قیلمسلیگی همان نامعلوم دیر.او، اسلام امیرلیگی اشتراک یا که قیلمه‌گن حالده، اوشبو ییغیلیش دن تورلیچه کوتیش‌لری بارلیگینی معلوم قیله‌دی.
مجاهد نینگ سلام‌وطندار گه ایتیشیچه: «اشتراک قیلیشی‌میز معلوم بولمسه ایستک‌لریمیزنی هم شریک قیله آلمه‌یمیز. اشتراک قیلسک باشقچه کوتیشی‌میز بوله‌دی و اشتراک قیلمسک علیحده کوتیشی‌میز بوله‌دی.»
افغانستان وضعیتی گه دایر بیرلشگن ملتلر تشکیلاتی باش کاتبی آنتونیو گوترش میزبان‌لیگی بیلن دوحه ایکینچی دور ییغیلیشی ایریم تنقید و کوتیش‌لر بیلن روپه‌ره بولگن بیرحالده، یولگه قوییلیشی ریجه‌لشتیریلگن.
بیزلرنینگ «ایکس» ترماغی ده هم تعقیب قیلینگ!
مذکور ییغیلیش ده افغان عیاللری آدرسیدن فعاللر نینگ حضورسیزلیگی ایریم تنقیدلر گه دوچ بولگن موردلردن سنله‌دی.
خلق‌ارا کیچیریم تشکیلاتی دوحه ییغیلیشی یولگه قوییلیشی عرفه‌سیده، بو ییغیلیش ده اشتراک قیلووچیلردن اسلام امیرلیگی تامانیدن عیاللر گه یره‌تیلگن چیکلاولر بیکار قیلینیشی اوچون سعی‌وحرکت قیلیش‌لرینی سوره‌گن.
برچه‌سی بیلن، خلق‌ارا مناسبت‌لر ایش بیلرمانی ولی فروزان، افغانستان ده سیاسی وضعیت اوزگریشی اوچون دوحه ییغیلیشی نتیجه بیریشی گه ایشانمه‌یدی. «بو ییغیلیش ده اسلام امیرلیگی بیلن همکارلیک قیلیش، قطار ایلچی‌خانه‌لر آچیلیشی، بشری و اقتصادی یاردم کورسه‌تیش حقیده بحث ایتیلیشی کوتیله‌دی و اوشبو ییغیلیش یکونیدن سونگ بعضی موردلر عملی بوله‌دی و اسلام امیرلیگی گه قرشی موردلر اصلا عملی بولمه‌یدی.»
سونگی ایکّی ییل ده افغانستان وضعیتی گه دایر خلق‌ارا اونلب ییغیلیش دوامیده دوحه ییغیلیشی یولگه قوییلماقده؛ بیراق افغانستان ده وضعیت اوزگریشی اوچون بو ییغیلیش‌لردن هیچ بیری نتیجه بیرمه‌گن.
