نسایی-ولادی شفاکارلریدن قطارینینگ ایتیشلریچه، ناتوغری ایمیزیش اصوللری و ایمیزیکلی آنهلرنینگ آوقتلنیشی حقیدهگی ناتوغری ایشانچلر، چقهلاقلر سلامتلیگینی خوف بیلن روپهره قیله آلهدی. اولرنینگ ایتیشلریچه، حاضرگچه عایلهلردن بیر قطاری آرهسیده ایمیزیکلی آنهلرنینگ قندهی آوقتلنیشی حقیده تورلیخیل قرهشلر بار. انه شوو سبب عیاللر فایدهلی اَیریم آزیق-آوقتلردن فایدهلنمهی یا-ده کسللیکلرینی دوالش اوچون عنعنوی اصوللرگه یوز کیلتیرهدیلر؛ بو موضوع ایسه بعضا آنه سوتی کم بولیشی و چقهلاقنینگ آوقتلنیشیده قیینچیلیک چیقیشیگه سبب بوله آلهدی.
شفاکارلرنینگ اورغولشیچه، ایمزیش دوریده آنّلرنینگ برابر و ییترلی شکلده آوقتلنیشی همده ساغلیق قیینچیلیکلری حلی اوچون علمی بولمهگن توصیهلرگه توجه قیلیش اورنیده، ساغلیقنی سقلش ایشلاوچیلر بیلن مصلحت قیلیشلری کیرهک. تخار ده نسایی-ولادی شفاکاری نرگس میرزایینینگ ایتیشیچه، آنهلردن قطاری آوقتلنیشلری همده درست ایمیزیش اصولی حقیده ییترلیچه آگاهیلیککه ایگه ایمسلر.
اونینگ کوپهیتیریشیچه: «آنهلردن قطاری چقهلاقلریگه قندهی سوت بیریش و آوقتلنیشنی بیلمهیدیلر. آنهنینگ استرسی بولسه یا-ده مناسب آوقتلنمسه، سوتی کم بولیب و چقهلاق ییترلی آوقتنی آلالمهیدی. باشقه بیر تاماندن، ناتوغری سنتی ایشانچلر بار؛ مثلا آنهنینگ یاغلیق یا-ده اچیق نرسه ایمسلیگی کیرهک، چونکه سوتی گه تاثیر قویهدی یا-ده چقهلاقنینگ قارنی آغریدی. شونینگدیک چقهلاق سریغلمه بولسه، آنهنینگ بوتونلی یاغلیقدن پرهیز قیلیشی کیرهک. بو ایشانچلر علمی ایمس. آنه هم اوزینینگ ساغلام بولیشی همده چقهلاغی اوچون ییترلیچه سوتی بولیشی اوچون مکمل و برابر آوقتلنیشی کیرهک.»
تخار دهگی قابلهلردن سونا احمدینینگ ایتیشیچه، آنهلردن قطاری ناتوغری ایشانچلر سبب، آنهنینگ بیرینچی سوتی یا-ده «فله» نی ناپاک بیلهدیلر و اونی چقهلاققه بیرمهیدیلر. اونگه کوره، بو سوت چقهلاق تنهسی مستحکملنیشی اوچون اهمیتگه ایگه دیر. احمدینینگ کوپهیتیریشیچه، سوت بیرهدیگن آنهلرنینگ حددن تشقری آوقتلردن پرهیز قیلیشی، اولرنینگ ضعیف بولیشی و چقهلاقنینگ آوقتلنیشیده قیینچیلیک چیقیشیگه سبب بوله آلهدی.
مذکور قابله شوندهی دیدی: «اهالیدن قطاری چقهلاق اوچون جودهیم فایدهلی بولیب و تنهسینینگ مدافعه سیستمینی مستحکملهیدیگن بیرینچی سوت یا-ده فلهنی حرام بیلهدی. چقهلاق سوت ایچگنیدن کیین قارین آغریق بولگنی صورتده، آنه نیچه کونگچه آوقتینی تغییر بیرسین؛ لیکن آوقتلرنینگ بوتونلی ترک قیلمهسین. پروتئین و یاغلیق کبی قوی آوقتلر آنهنینگ تنهسی اوچون کیرهکلی بولیب و شونینگدیک استرس هم آنه سوتینی کمهیتیره آلهدی. آنه کسل بولگنیده شفاکار گه باریشی و چقهلاقنینگ ایکی یاشرلیگیگه قدر سوت بیریشی کیرهک. چقهلاقنینگ ضعیف بولگنی صورتده کونده ۱۲ مرته و ساغلام بولگنیده سکیز مرته سوت بیریشی کیرهک. آنهلر اهالی سوزلریگه ارزش بیرمهی و ساغلیقنی سقلش توصیهلرینی جدی آلیشلری کیرهک.»
شوندهی بیرحالده، تخار دهگی عیاللردن قطاری عایلهلرده ایمیزیلکلی آنهلر آوقتلنیشی حقیدهگی ناتوغری ایشانچلر بارلیگیدن تنقیدلب و ایتیشلریچه، بو ایشانچلرگه ایشانیش اوزلری و بالهلرینینگ سلامتلیگیگه تاثیر قویگن. تخار یشاوچیلریدن بیری شمسیهنینگ ایتیشیچه، عایلهسینینگ تاتوغری ایشانچلری سبب ایمیزیش دورهسیده فایدهلی آوقتلر و تازه میوهلردن قطارینی ایمهگن. اونگه کوره، بو موضوع بالهسینینگ ساغلیق وضعیتیگه تاثیر قویگن.
او، تجربهسی توغریسیده شوندهی دیدی: «بیرینچی مرته آنه بولگنیمده، هیچ تجربهم یوق ایدی. سوت بیریش پیتیده چقهلاغیمنینگ باشینی یوقاری توتمهگن ایدیم، سوت چقهلاق اوپکهسیگه کیتیب و اولدی. ایکینچی مرته چقهلاغیمگه هیچ نرسه بولمهسین دیب جودهیم احتیاط قیلهر ایدیم. قینآنهم سوت بیرهدیگن عیال میوه، سبزهوات و هر تورلی آوقت ییمهسین، چونکه چقهلاق قارنی آغیری دیهر ایدی. مین هم نیچه پیتگچه قوروق نان، شوربا ییب و چای ایچهر ایدیم. حتا شفاکار گه باریشیم اوچون رخصت بیرمهیدیلر؛ بیزلر وقتیمیز قچان مونچه شفاکار بار ایدی دیهر ایدیلر. چقهلاغیم کوپ ییغلهر ایدی و کون اوتیشی بیلن ارّیغ (لاغر) بولگن ایدی که کیین شفاکار گه آلیب باردیم، بالهمنینگ توییت آوقتلنمسلیگینی ایتدی.»
تخار دهگی آنهلردن ۲۴ یاشر لطیفه حکیمینینگ ایتیشیچه، ایمیزیش دورهسیده شفاکار و تورموش اورتاغینینگ عایلهسیدن فرقلی توصیهلرنی آلهر ایکن. «بیرینچی بالهم دیر. چقهلاغیم توغیلگنیده شفاکار هر قندهی آوقتنی ییه آلهسین دیدی؛ بیراق قین آنهم سوت بیرهدیگن عیال، سوتی کوپهیشی اوچون یاغلیق گوشت، حیوانی یاغ و زردچوبه ییسین دیهر ایدی. قین آنهم ایتهدیگن هر نرسهنی ییهر ایدیم؛ لیکن چقهلاغیم هیچ قوی بولمهی و عکسینچهسی کوپ ییغلهب و قارنی شیشهر ایدی. حتا کسل بولگنیم پیتلرده دارو ییمه سوتینگ قوریدی دیهر ایدیلر و مینگه اویده توزهتیلگن دارولرنی بیریدیلر؛ یعنی شفاکار گه باریشگه رخصت بیرمس ایدیلر. بیر کونی چقهلاغیم قتیق ایسیتمه قیلیب و قارنی آغیریدی و شفاکار گه باردیم که بیر هفته بستر بولدی. شفاکار ییگنیم آوقتلرنینگ چقهلاغیم اوچون ضررلی بولگنینی ایتدی. نیگه شفاکار توصیهلریگه توجه قیلمهدیم دیب جگرخونمین.»
شونینگدیک تخار دهگی آنهلردن باشقه بیری کاملهنینگ ایتیشیچه، سوت بیرهدیگن باش آیلرده عایلهسی آرقهلی ناتوغری معلوماتلر و بیر قطار آوقت بوییچه چیکلاولر سبب، چقهلاغیدن درست شکلده مراقبت قیله آلمهی و حاضر چقهلاغینینگ ضعیفلیگی بیلن روپهره بولگن. «آنه بولگنیمده، هر نرسهنی اوز یورهگیمگه ییمس ایدیم. دایم آنهم ساووق نرسهلر یا-ده ترووز و قاوون کبی سوولی نرسهلر همده ماست ییمه دیهر ایدی. شونینگدیک ساووق سوو ایچمه دیهر ایدی؛ چونکه چقهلاقنی ساووق توتهدی و یا قارنی آغیریدی. انه شوو سبب قوروق و یینگیل آوقتلرنی ییهر ایدیم. بعضا ایسه یالغیز چای و نان ییهر ایدیم. کسل بولیشیم پیتلرده دارو ییگنی قویمهی و دارو سوتنی بوزهدی دیهر ایدیلر. انه شوو ایشانچلر بیلن چقهلاغیم بیر یاشر بولدی؛ لیکن وزن آلمهدی و دایم بیقرار ایدی. شفاکار گه بارگنیمده چقهلاق قانی کملیگی همده ییترلی سوت ایچمهگنی اوچون تنهسی ضعیفلیگی بیلن روپهره بولگن دیدی.»
اوشبو آنهلرنینگ تجربهسی گه کوره، آنهلر آوقتلنیشی و ایمیزش حقیده ناتوغری ایشانچلر، اولرنینگ یالغیز آوقتلنیشیدهگی چیکلاولر بیلن چیکلهنیب قالمهیدی؛ بلکیم ایریم حاللرده بو حالت اولرنینگ ساغلیقنی سقلش خذمتلریگه قول تاپیش و دارودن فایدهلنیشنی تاثیر آستیگه قویهدی. شوندهی بیرحالده، شفاکارلرنینگ اورغولشیچه، سوت بیرهدیگن آنهلر اوزلری و چقهلاقلرینینگ سلامتلیگینی سقلش اوچون برابر و فرقلی آوقت رژیمیگه ایگه بولیب، سوت بیریش جریانیده قیینچیلیک یا-ده کسللیک چیقیشی صورتده، ساغلیقنی سقلش ایشلاوچیلریگه مراجعت قیلیشلری کیرهک.
شونینگدیک آنهنینگ مناسب آوقتلنیشی، ییترلی اوخلش و ساغلیقنی سقلش مصلحت آلیش، آنه سلامتلیگینی سقلش و چقهلاقنینگ آوقتلنیش نیازلری تامینلنیشیده مهم اورینگه ایگه بوله آلهدی. نهایت عایلهلرنینگ درست شکلده سوت بیریش اصولی و ناعلمی توصیهلردن اوزاق بولیش توغریسیده آگاهیلیگی، آنهلرگه باسیم و بیمورد چیکلاولر بولمسدن ایمیزیش دورهسینی اوتکزیش و شونینگدیک چقهلاقنینگ مناسب آوقتلنیشگه ایگه بولیشیگه یاردم بیره آلهدی.
