سونگی ییللرده اقلیم اوزگریشلری سمنگان ولایتینینگ باغدارلیک بولیمی اساسی قیینچیلیکلریدن حسابلنهدی. مسئوللر و باغدارلر، هوانینگ بیردن ساووق بولیشی، تیزلیکده هوا ایسیشی، توستدن یاغینگرچیلیکلر و اوسیملیک آفتلری کوپهیشینینگ بادام باغلریگه کوپینچه زیان ییتیشیشی همده حاصلات کمهیشیگه سبب بولگن عامللردن دیگنلر.
ایکینچیلیک ریاستی مسئوللرینینگ ایتیشلریچه، بو قیینچیلیکلر کمهیشی توغریسیده باغدارلر اوچون آفتلرنینگ آلدینی آلیش و ایش اورگتیش بوییچه بیرقطار برنامهلری بار، لیکن باغدارلر مذکور قیینچیلیکلر بیلن قرشی کورهش اوچون کوپینچه حمایتگه نیازلری بارلیگیگه تاکید قیلگنلر.
سمنگان ولایتیدهگی باغدارلرنینگ ایتیشلریچه، بو ییل هوا وضعیتی بادام باغلریگه کوپینچه زیانلرنی ییتیشتیریب، آفتلرنی کنترول قیلیش اوچون سعیوحرکت بولگنی بیلن، حاصللر کمهیشی اولرنینگ اصلی خواطرلریدن بیری دیر.
بو ولایتدهگی باغدارلردن بیری ۴۷ یاشر محمد عثمان، آفتلر یانیده هوانینگ بیردن ساووق بولگنی و اقلیم اوزگریشلرینینگ باغلریگه کوپینچه ضرر ییتکزگنینی ایتگن. اونگه کوره: «هوانینگ بیردن ساووق بولگنی گللرنینگ توکیلیشی و حاصل کمهیشیگه سبب بولدی. شونینگدیک آفتلر کنترولی اوچون دوا سیپدیک و بیراز یخشی ایدی، بیراق ساووق طفیلی خسارهلر آلدینی آلیش ممکن ایمس. بو ییل حاصللریمیزدن ۴۰ فایزینی قولدن بیردیک.»
شونینگدیک محمد عثمان، ایکینچیلیک ریاستی آرقهلی باغدارلرگه دارو سیپیلیشی اوچون یخشی دارولر تامینلنیشی، اولرگه فنی تعلیملر بیریلیشی و قوللب-قوتلنیشی بوییچه کوپراق همکارلیک بولیشینی کوتیب تورگنلرینی بیان قیلهدی.
باغدارلردن باشقه بیری ۴۲ یاشر نورمحمدنینگ ایتیشیچه، سوو تنقیصلیگی، اوسیملیک آفتلری و کسللیکلریگه علاوه، هوا حرارتینینگ بیردن اوزگریش هم محصوللر صفتی و مقداری کمهیشیگه سبب بولیب و باغدارلر خرهجتلرینی کوپهیتیرگن.
نورمحمد هم ایکینچیلیک ریاستیدن باغدارلرگه همکارلیک بولیشینی سورهب و ایتیشیچه: «بو ییل بادام باغی حاصلی اوتگن ییللرگه نسبت کمراق بولگن، چونکه سوو تنقیصلیگی، هوا اوزگریشی و حشرهلر بیلن آفتلر میوه توکیلیشی و بادام صفتی بوزیلیشیگه سبب بولدی. دارو سیپگنیمیز بیلن ینه خسارهلر کوپ بولیب و ۵۰ فایز حاصلیمیزنی قولدن بیردیک. ایکینچیلیک ریاستیدن دارو سیپیلیشی، فنی تعلیملر بیریلیشی و یخشی کوچت توغریسیده همکارلیک بولیشینی سورهیمیز.»
شکرک و اوسیملیک کسللیکلری؛ بادام باغلری اوچون ینگی تهدید
مذکور قیینچیلیکلر یانیده، سمنگان ولایتیدهگی باغدارلردن قطارینینگ ایتیشلریچه، اوسیملیک کسللیکلری اینیقسه شکرک کسللیگی ترقهلیشی اولرگه ینگی بیر خواطرنی یرهتیب و بو وضعیت دوام قیلگنی صورتده، کوپینچه زیان کوریشلری ممکن.
سمنگان ولایتیدهگی باغدارلردن ۳۹ یاشر حیاتاللهنینگ ایتیشیچه: «بو ییل شکرک آفتی بادام درختلریگه ضرر ییتیشتیردی. برگلر چممیش بولیشی شکرک آفتی علایمی دیر. بو آفت درختدهگی میوهلرنی اورتهدن کیتگیزهدی. ایکینچیلیک ریاستیدن بو آفتلر حلی اوچون بیزلرگه یاردم بیریشلرینی ایستهیمیز.»
ایش بیلرمانلرنینگ ایشانچیگه کوره، یالغیز باغدارلر و مسئول نهادلر آرهسیده یقین همکارلیک، آفتلرنی کنترول قیلیش علمی اسلوبلردن فایدهلنیش و ینگی اقلیم شرایطیگه ماسلشیش بیلن، کوپینچه زیانلرنینگ آلدینی آلیب و سمنگان ولایتیدهگی باغلر تولیدی کوپهیشی امکانیتینی یرهتیش ممکن.
سمنگان ایکینچیلیک، سووغاریش و چاروهچیلیک ریاستینینگ اوسیملیکلرنی سقلش عمومی مدیری و ایش بیلرمان گلابالدین خاننینگ ایتیشیچه: «بو ییلگی ترتیبسیز یاغینگرچیلیکلر و اقلیم اوزگریشلری، اوزوم، زردآلو و بادام درختلریده آفتلر و قارچی کسللیکلر جملهدن شاتهول، آنتراکنوز، دایبک، خاکسرک کوپهیشی زمینهسینی یرهتگن. اولرنینگ کنترول بولیشی اوچون آلدینی آلووچی اسلوبلر و لایم سلفر کبی ترکیبی محلوللردن فایدهلنیش، دهقانلرگه توصیه بولهدی.»
شوندهی بیرحالده، سمنگان ایکینچیلیک ریاستی مسئوللرینینگ ایتیشلریچه، سونگی ییللرده اقلیم اوزگریشلری اوسیملیک آفتلری و کسللیکلری کوپهیشیده مهم رول اوینهب و هوانینگ نامناسب وضعیتی ایسه دهقانلر و باغدارلرنینگ کوپینچه ضرر کوریشیگه سبب بولگن.
سمنگان ایکینچیلیک ریاستی ایشلری بوییچه آمری عبدالخلیل کریم گه کوره، اقلیم اوزگریشلری طفیلی خسارهلر کمهیشی توغریسیده تورلی تومنلرده بیر قطار برنامهلری بار. «اقلیم اوزگریشلری ایسیقدن ساووقلیک همده ترتیبسیز یاغینگرچیلیکلرگچه، باغلرگه ضرر ییتیشتیرهدی. دهقانلرگه مناسب شکلده شاخچهلرنی قیرقیش، قیشکی باغدارچیلیک یاغی و قطرهای سووغاریش کبی ایشلرنی اورگتهمیز که بو شرایط اوچون تیار بولسینلر.»
اقلیم اوزگریشلری، آفتلر و اوسیملیک کسللیکلری کوپهیشی و هوا حرارتی اوزگریشلری، سونگی ییللرده سمنگان دهگی باغدارلرنی قیینچیلیک بیلن روپهره قیلگن اینگ مهم عامللردن دیر. ایکینچیلیک ریاستی مسئوللری آلدینی آلووچی دستورلرنی تیلگه کیلتیریب و ایتیشلریچه، شونینگدیک باغدارلر دارولر سیپیلیشی اوچون صفتلی دارولر و اصلاح بولگن کوچتلر ترقهتیلیشی، فنی قوللب-قوتلنیشلر و زمانهوی باغدارچیلیک اسلوبلری اورگهتیلیشی بولیمیده کوپراق همکارلیک بولیشینی سورهگنلر.
