دایمی اویقوسیزلیک کینگ ترقهلگن اویقو بوزیلیشی بولیب، هفته دوامیده اوچ کیچهدن کوپراق و بیر نیچه آی دوامیده اوخلب قالیش یا-ده اویقونی سقلهب قالیشده قیینچیلیک بیلن توصیفلنهدی. بو حالت دواملی چرچاق، فکرلش قابلیتینینگ کمهیشی، ایمنی تیزیم فعالیتینینگ بوزیلیشی و روحی کسللیکلر خوفینینگ کوپهیشی بیلن کوچهیهدی. اونینگ کینگ ترقهلگن سببلری استرس، کیچه-کوندوز اوخلش ریتیمینینگ بوزیلیشی و ساغلام اویقو شرایطی رعایت بولمسلیگیدن عبارت دیر.
فاریاب دهگی عیاللرنینگ ایتیشلریچه، اویقوسیزلیک خوفلرینی بیلمسلیک سبب کوندهلیک تیریکچیلیکده قیینچیلیکلر بیلن روپهره بولگنلر. بو توغریده فاریاب یشاوچیسی بولمیش ۲۰ یاشر شکیلانینگ ایتیشیچه: «کیچهلر اوخلش اوچون کوزیمنی یومیب اولتیرهمن، بیراق ذهنم تورلی فکرلر بیلن تولهدی و کیچ وقتگچه اوخله آلمهیمن. انه شوو سبب کون بویی دایم چرچهب و انرژیسیز بولهمن.»
شونینگدیک فاریاب یشاوچیلریدن باشقه بیری ۲۵ یاشر فاطمهنینگ ایتیشیچه، دواملی اویقوسیزلیک خوفلرینی بیلمسلیک سبب، تیز کسل بولیش قیینچیلیگی بیلن روپهره بولگن. اونینگ ایشانچیگه کوره، دواملی شکلده اویقوسیزلیک باشقه هر نرسه گه قرهگنده کوندهلیک حیاتیگه تاثیر قویگن. «کیچهلر نیچه مرته اویغنهمن و قیته راحت اوخله آلمهیمن. انه شوو سبب، کون جریانیده دایم ضعف قیلیش حسی بیلن روپهره بولیب و بیحوصله بولهمن.»
شونینگدیک فاریابلیک عیاللردن ۲۳ یاشر مریم، نیچه مرته ییترلی اوخله آلمسلیک، کوندهلیک انرژیسی کمهیشی و تیزلیککه کسل بولیش سبب شفاکار گه مراجعت قیلگن. اونینگ ایتیشیچه، حتا دارو ییش بیلن ینه هم بو قیینچیلیگی حل بولمهگن. «شفاکار که مراجعت قیلیب و دارو آلدیم، بیراق هیچ قندهی جدی بیر تغییرنی حس قیلمهدیم و حاضرگچه هم کیچهلر درست اوخله آلمهیمن. بو وضعیت حقیقتاً کوندهلیک ایش و حیاتیمگه سلبی تاثیر قویگن. کیچهلر نیچه مرته اویغنهمن و باشقه راحت اوخله آلمهیمن و کیین کون بویی بیحوصله بولیب یوریمن.»
شوندهی بیرحالده، نسایی-ولادی شفاکارلریدن ناهید احمدی، دواملی اویقوسیزلیک سببینی روحی، محیطی و فیزیولوژیکی عامللر بیلیب و اورغولشیچه، بو جریان دوامی استرس، اضطراب، هورمونی تغییرلر و تنهنینگ ایمنی سیستمی کوچلنیشی کمهیشیگه سبب بوله آلهدی. «عیاللرده اوزاق مدتلی استرسلر، اضطراب و هورمونی تغییرلر، اینگ مهم دواملی اویقوسیزلیک عامللریدن بولیب و بو وضعیت دوام قیلگنی صورتده، تنهنینگ عمومی ساغلیگینی تاثیر آستیگه قویه آلهدی.»
شونینگدیک عمومی ایچکی بولیم شفاکارلریدن حامد صدیقی، اوخلش یخشیلنیشی اوچون حیات سبکی توزهلیشی اهمیتیگه تاکیدلب و ایتیشیچه، اوخلش برنامهسینی تنظیملش، کیچه تامان تلیفوندن کمراق فایدهلنیش و کون یکونی ساعتلریده قهوه صرفلنمسلیگی بیلن، اویقو صفتی و مدتینی یخشیراق مدیریت قیلیش ممکن. «بیر کیشی اوخلش برنامهسینی تنظیملش و کیچه تامان کمراق تلیفوندن فایدهلنیش بیلن اویقوسینینگ صفتینی یخشی بیر شکلده درست قیله آلهدی.»
۲۴ ساعت ایچیده تنهنینگ نیازی بولگن اویقو میزانی ۷ دن ۹ ساعت تعیینلنگنی بیرحالده، عیاللر دواملی اویقوسیزلیکدن خواطرلنگنلر. بو ساعتدن کمراق اوخلش حتا آز مدتده هم دایمی چرچهش، تمرکز کمهیشی و ایمنی سیستم ضعیفلنیشیگه سبب بولیشی ممکن.
