بیر نیازدن بیر فکر اورته گه کیلدی؛ بو فکر بوگون ایسه بالهلر اوچون تعلیم و اویین اوینهش بوییچه تینچ بیر محیطنی یرهتیب، عایلهلرگه ینگی امیدنی آلیب کیلماقده. بدخشان ولایتیده بیر عیال خصوصی بالهلر باغچهسینی آچیش بیلن، نهفقط بالهلر تعلیمی اوچون آدیم کوتارگن، بلکیم جمعیت احتیاجلریگه جواب بیریشده تشبث و کیچیک سرمایه یاتقیزیلیشلرنینگ رولیدن بیر نمونهنی نمایش گه قویگن.
بدخشان دهگی اوشبو بالهلر باغچهسی مسئولی ۲۶ یاشر بهار احمدینینگ ایتیشیچه، بو مرکز بالهلر تعلیمی و اویینی اوچون تینچ بیر محیط گه ایگه بولیب و بو توغریده حاضرگچه ۱۵۰ مینگ افغانی سرمایه یاتقیزیلگن. «اوشبو بالهلر باغچهسینی، بیر نیاز بولگنی اوچون آچدیک. بوندن آلدین اوزیمیز هم بالهلر باغچهسیده ایشلهگن ایدیک و بیر نیاز اساسیده بو ییرنی توزهتدیک. بو ییرنی عیاللرنینگ هم ایشلریگه کیتیشلری همده بالهلرینینگ درست شکلده سقلهنیشی اوچون قوردیک.»
احمدیگه کوره، بالهلر باغچهسینینگ فعالیتی باشلنگنیدن قریب بیر آی بولگنی بیلن بو ییرده ۱۰-۱۲ باله تعلیم کورماقده. او، اوچ دن آلتی یاشرگچه بولگن بالهلرنینگ مذکور بالهلر باغچهسیگه آلینیشینی بیان قیلیب و کوپهیتیریشیچه، کوپینچه امکانیت یرهتیلگنی صورتده، چقهلاقلر اوچون هم بیر اتاق توزهتیلیشی نظرگه آلینگن.
بهار احمدینینگ ایتیشیچه، بو یولده آدیم قوییش بیر قطار قیینچیلیک جملهدن مناسب جای تاپیلمسلیگی بیلن روپهره بولگن. «روپهره بولگنیمیز قیینچیلیکلردن بیری مناسب جای تاپیلمسلیگی ایدی که الحمدالله یخشی بیر جاینی تاپه آلدیک.»
اوشبو بالهلر باغچهسی مسئولینینگ اورغولشیچه، بو ایشدن مقصد یالغیز بالهلرنی سقلش ایمس، بلکیم اولرنی تربیهلش و تعلیم بیریش دیر.
شوندهی بیرحالده، انگلیز تیلی و ادبیانی بولیمینی بیتیرگن مذکور مرکزدهگی اوقیتووچیلردن بیری حمیدهنینگ ایتیشیچه، بالهلر بیلن ایشلش اونینگ حیاتیده ایجابی تغییرلرنی کیلتیریب و اوزیگه ایشانچینینگ کوپهیشیگه سبب بولگن. «بو ییرگه ایشلش بیلن اوزیمگه ایشانچیم کوپهیدی. بالهلرگه درس بیریش و ایشلش مینی جودهیم خورسند قیلهدی. بو ییرده ایشلش بیلن اوزیم اوچون هم یخشی درآمد قولگه کیلتیره آلهمن.»
اونگه کوره، هر بیر بالهنینگ یاندهشووی فرقلی بولیب و انه شوو موضوع سبب، اوقیتووچیلر اولرگه درس بیریش و تربیهلش اوچون فرقلی اسلوبلردن فایدهلنهدیلر. اونینگ کوپهیتیریشیچه، بالهلر باغچهسینینگ دستورلریدن کوپینچهسی تعلیمی دیر، بیراق اوشبو تعلیم اویین-کولگی یا-ده گروهی فعالیتلری آرقهلی بالهلرگه کورسهتیلهدی. «بیر ساعتیمیز درس شکلده بولگنیده، کوپینچهسی اویین-کولگی یا-ده فعالیتلر آرقهلی کورسهتیلهدی.»
تعلیم و تربیه بوییچه ایش بیلرکان سجادالله بیان، بالهلرنینگ عاطفی، اجتماعی و ذهنی رشدیده بالهلر باغچهسی اورنینی مهم بیلیب و ایتیشیچه، بالهلر باغچهسی بالهلرنینگ اوز همیاشلری بیلن علاقه قوریب و تعلیمنینگ کیینگی باسقیچیگه کیریش اوچون تیارلنهدیگن بیر محیط دیر. «مکتبدن آلدینگی تعلیملر بالهلرنینگ عاطفیلی و اجتماعی رشدیده جودهیم اهمیتگه ایگه دیر. بالهلر باغچهسی بالهلرنی مکتب دورهسی اوچون تیارلهیدی.»
باشقه بیرتاماندن، اقتصادی ایش بیلرمانلر بالهلر باغچهسی آچیلیشینی یالغیز تعلیمی بیر فعالیت بیلمهی، بلکیم اونی جمعیتده فایدهلی بیر سرمایه یاتقیزیلیش عنوان قیلگن. بو توغریده اقتصادی ایش بیلرمان جمشید یولچینینگ ایتیشیچه: «هر قندهی سرمایه یاتقیزیلیش حتا کیچیک بولسهده، هم ایش زمینهسی یرهتیلیشی همده خذمت کورسهتیلیش دیر.»
اوشبو بالهلر باغچهسی مسئوللری، مذکور کیچیک بیراق تبسم و اورگهنیش بیلن توله بیر فضانینگ کوپینچه قوللب-قوتلنیش بیلن کوچهیب و کیلهجکده بالهلردن کوپراغیگه بو کبی بیر محیطده تعلیم و رشد تجربهسی یرهتیلیشیگه امیدوارلر.
مذکور بالهلر باغچهسیده بالهلر کولیشی سیسی یالغیز اولرنینگ خوشلیگی نشانهسی ایمس؛ ینگی بیر فکر باشلنگن بیر یول دیر. اونده بالهلرنینگ هر بیر اویین، هر بیر تعلیم و هر بیر تبسمی، یخشی بیر کیلهجکنی توزهتیش اوچون ایلک آدیم بوله آلهدیگن یول دیر.
