غورنینگ تاغلی حدودلریده اقلیم اوزگریشلری، موسومی سوو تاشقینلر کوپهیشی، توپراق بوزیلیشی و سوو منبعلری کمهیشی بیلن بیرگه، اهالی حیاتینی جدی قیینچیلیکلرگه روپهره قیلماقده. اوشبو ولایت اَیریم منطقهلری اهالیسی ایسه ساده بیراق فایدهلی ییچیم یولگه تیهنیش بیلن طبیعی منبعلرنی اسرهش و بو واقعهلر طفیلی اورته گه کیلهدیگن ضررلرنی کمهیتیریش اوچون سعیوحرکت قیلهدیلر.
غور ولایتی یشاوچیلریدن قطارینینگ ایتیشلریچه، نیچه ییل آلدین حددن تشقری چاروهلرنینگ اوتلنگنی و اوسیملیکلر اوپیریلگنی سبب، منطقهنینگ اوسیملیک بولگن ییرلری اورتهدن کیتیش خوفی بیلن روپهره بولگنی پیت، آق سقاللر و محل یشاوچیلری ییرلرنینگ بیر بولیمینی قوریقلش گه قرار آلگنلر.
غور یشاوچیلریدن حیاتاللهنینگ ایتیشیچه: «بو ییرده بوتهلر و تاغلی اورمانلرنی قوریقلهدیک. اوتلاق بولگن ساحهلر کوپ و بیزلر قویلرنینگ مذکور منطقهلرگه باریشیگه توسیق بولهمیز که یشیل قالسین. بو ییرلرنی قوریقلشدن آلدین سوو تاشقینلر کوپ یوز بیریب و اهالی کوپ ضرر کورهر ایدی. انه شوو سبب بو ساحهلرنینگ قوریقلش گه قرار آلدیک.»
بو ولایت یشاوچیلریدن باشقه بیری سلطاناحمد شوندهی دیدی: «منطقهمیز قوریق بولگنیدن بیری هالنج، چکه و باشقه بیر قطار درختلر منطقهمیزده کوپهیب و یخشی رشد قیلگن. شونینگدیک بوتهلر هم کوپراق بولگن.»
شونینگدیک غور یشاوچیلریگه کوره، آقسقاللر همکارلیگی همده نیچه قوریقچینینگ قوییش بیلن، اوتگن نیچه ییلده یوزلب جریب للمی ییرنی سقلهب و اوسیملیک بولگن جایلرنینگ قیته تیکلش امکانیتینی یرهته آلگنلر. اولرگه کوره، بو ایش توپراق بوزیلیشی کمهیشی، موسومی سوو تاشقینلر آلدینی آلینیشی و طبیعی منبعلرنینگ یخشی سقلنیشیگه سبب بولگن.
غور یشش محیط ایش بیلرمانلری، اهالینینگ بو اقدامیدن خورسندلیک بیلدیریب و ایتیشلریچه، اوسیملیگی بولگن ییرلرنی قوریقلش طبیعی منبهلرنی سقلش اوچون اینگ آز خرهجتلی و یخشی یوللردن دیر.
یشش محیط بیلرمانلریدن عبدالبصیر سلطانینینگ ایتیشیچه، قوریقلنگن ییرلرده اوسیملیکلرنی قیته تکیلش، سوو منبعلرنی مستحکملش، تاغلیم اوسیملیکلر رشدی و توپراق بوزیلیشی بیلن موسومی سوو تاشقینلر کمهیشیگه یاردم بیرهدی. «بیر محیطده اوسیملیک بولگن یشیل جای بولگنیده، سوو سطحی جریانیگه توسیق بولهدی. شونینگدیک یاغینگرچیلیک پیتده توپراقده سوو جذب بولیشی کوپهیهدی و بو موضوع سوو تاشقینلر آلدی آلینیشیده اساسی اورینگه ایگه دیر. اوسیم بولگن یشیل ساحهلر اقلیم اوزگریشلری اثرلری کمهیشیده رول اوینهیدی؛ چونکه محیطده بوغلهنیش میزانینی کوپهیتیرهدی.»
سلطانینینگ اورغولشیچه، اقلیم اوزگریشلری عاقبتلریگه توجه قیلیش بیلن تورلی منطقهلرده اهالی آرقهلی بو کبی برنامهلر کوچهیشی یشش محیط سقلهنیشی و طبیعی منبعلردن برقرار فایدهلنیشده مهم حصه قوشه آلهدی.
شوندهی بیرحالده، غور ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، اهالی همکارلیگی همده محلی انجمنلر یولگه قوییلیشی بیلن شهر و تومنلر بویلب طبیعی منبعلرنی سقلشده سعیوحرکت قیلگنلر.
اوشبو ریاست ییتکرمهلر مسئولی ضیاءالحق جویانینگ ایتیشیچه: «زراعت ادارهسی همکار بیر نهاد صفتیده، مرکز و تومنلرده اوسیملیک بولگن جایلر و طبیعی منبعلر ساحهلرینی سقلش بولیمیده اهالی بیلن همکارلیک قیلگن. طبیعی منبعلرنی سقلش انجمنلری یرهتیلیشی و آگاهیلیک بیریلیش بوییچه دستورلر اوتکزیلیشی بو توغریده بولگن اقداملردن دیر. کیلهجکده هم اوشبو بولیمده کوپینچه لایحهلر و برنامهلر عملگه آشیریلیشیگه امیدوارمیز.»
شونینگدیک ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، اوسیملیک بولگن ییرلرنی سقلش، اوتلاقلرنی درست مدیریت قیلیش و طبیعی منبعلر بوزیلیشی آلدی آلینیشی اوچون اهالینی تشویق قیلیش مقصد، بو ولایت تورلی منطقهلر یشاوچیلریگه بیر قطار آگاهیلیک بیریش برنامهلرنی اوتکزگنلر.
غور ده ییرلری قوریقلش تجربهسیگه کوره، محلی جمعیتنینگ قوشیلیشی اقلیم اوزگریشلری بیلم ماسلشیش اوچون اینگ فایدهلی ییچیم یوللردن بیری بوله آلهدی. بو ولایت یشاوچیلری اوسیملیک بولگن ساحهلرنی قیته تیکلش و جبرلنهدیگن ییرلرینی سقلش بیلن توپراق بوزیلیشی خوفی، موسومی سوو تاشقینلر و سوو تنقیصلیگینی کمهیتیریش همده کیلهسی نسللر اوچون طبیعی منبعلردن برقرار فایدهلنیش امکانیتینی یرهتیش اوچون سعیوحرکت قیلماقدهلر.
