دوشنبه کونی، ۲۴ دلو/ ۱۳ فبروری، خلق‌ارا رادیو کونی گه ماس دیر. اوشبو کوندن سلام افغانستان میدیا مؤسسه‌سی (رادیو سلام‌وطندار) دفتری ده، افغانستان اوچون بیرلشگن ملت‌لر تشکیلاتی باش کاتبی نینگ مخصوص نماینده‌سی روزا اوتونبایوا، افغانستان ده بیرلشگن ملت‌لر تشکیلاتی نینگ تعلیمی، علمی و فرهنگی تشکیلات باشلیغی پاتریشیا مک فیلپس، اوشبو میدیا رهبریتی، خبرچی‌لر و ایشلاوچیلری حضوری بیلن نشانلندی.
مذکور برنامه ده، افغانستان ده بیرلشگن ملت‌لر تشکیلاتی اورین باسرلیک هیئت دفتری (یوناما) باشلیغی روزا اوتونبایوا، افغانستان ده حاضر میدیالر و خبرچی‌لر اونگیده‌گی قیینچیلیکلر گه اشاره قیلیب، جمعی میدیالر اینیقسه رادیولر نینگ فعالیتینی مهم عنوان قیلگن.
یوناما باشلیغی گه کوره: «سیزلر نینگ قیینچیلیکلرینگیز گه قره‌گنده، مثبت و مهم ایشلرنی بجرماقده‌سیزلر، اهالی و جمعیت نی آگاه‌لنتیریش دیر. تورلی دستورلرینگیز آرقه‌لی جمعیت فکرینی آچه‌سیزلر.»
بیزلرنینگ فیسبوک صحیفه‌میزگه باش اورینگ!
مذکور برنامه ده، افغانستان ده بیرلشگن ملت‌لر تشکیلاتی اورین باسرلیک هیئت دفتری باشلیغی، اوشبو تشکیلات نینگ میدیالر اینیقسه رادیولر بیلن همکارلیکلری دوامی و اسلام امیرلیگی بیلن مذاکره قیلیب و میدیالر فعالیتی گه قولی‌لیک یره‌تیش اوچون سعی‌وحرکت قیلیشیدن ایشانچ بیردی.
عین‌حالده، افغانستان ده یونسکو باشلیغی پاتریشیا مک فیلپس، سلام‌وطندار رادیوسی دفتری ده خلق‌ارا رادیو کونیدن نشانلش مراسمیده ایتیشیچه: «یونسکو نینگ خبرچی‌لر و میدیالردن حمایت ایتیش اوچون، کوپ برنامه‌لری بار و بو برنامه‌لرنی دوام بیریش گه متعهد میز.»
باشقه تاماندن، مذکور برنامه ده افغانستان سلام میدیا مؤسسه‌سی مسئوللری، اطلاعات خصوصیده ییتکیرمه‌لر اینیقسه رادیو نینگ اورنی خصوصیده معلومات کیریتیب و خبرنگارلیک قاعده‌لری اساسیده فعالیت‌لری گه دوام بیریشیدن ایشانچ بیردیلر.
شونینگدیک، مذکور میدیا مسئوللری میدیالر فعالیتی گه زمینه یره‌تیش خصوصیده، خلق‌ارا تشکیلات‌لر و حکومت اورته‌سیده هماهنگ‌لیک ایجاد ایتیشی اوستیگه تأکید ایتدیلر.
افغانستان سلام میدیا مؤسسه‌سی خبر بولیمی مدیری نجیب‌الله آرمان نینگ بوتوغریده ایتیشیچه: «افغانستان نینگ اوزاق منطقه‌لریده برنامه بیره‌میز. بو برنامه‌لرنی یشاوچیلر نینگ نیازی گه بناً تیارلش مقصدیده سعی‌وحرکت قیلماقده‌میز. بیراق سونگی سیاسی اوزگریش و میدیالر نینگ اقتصادی قیینچیلیگی باعث، بو ایشنی دوام بیریش قیین دیر. بوتوغریده حکومت و بویوک تشکیلات‌لر نینگ اقدام قیلیشی گه امید بیلدیره‌میز.»
بیزلرنینگ توییترده هم تعقیب قیلینگ!
شونینگدیک، اوشبو برنامه ده افغانستان ایرکین میدیالریدن حمایت قیلووچی نهاد (نی) مسئولی ظریف کریمی، میدیالر خلق‌ارا تشکیلات‌لر تامانیدن قوللب_قوتلنیشی اوستیگه تأکید ایتدی.
اونینگ کوپه‌یتیریشیچه: «بوگون افغانستان ده میدیالر نینگ ایش حقوقی اساس‌لری نامعلوم. بیز ده عامه‌وی اخبارات و اطلاعات گه قول تاپیش قاعده‌لری یوق و خبرنگارلیک قاعده‌لری باسیم آستیده دیر. یوناما دن بوتوغریده اسلام امیرلیگی رسمی‌لری و نهادلر بیلن صحبت قیلیشینی ایسته‌یمیز.»
ایتیش کیره‌ک که، بو ییل افغانستان ده خلق‌ارا رادیو کونیدن عین‌حالده نشانلنماقده که، افغانستان ایرکین میدیالریدن حمایت قیلووچی نهاد نینگ معلوماتی اساسیده، اولکه بویلب رادیولردن قریب یریمی غیر فعال بولگن.
