بیرلشگن ملت‌لر تشکیلاتی نینگ انسان‌دوستلیک یاردم‌لر نی هماهنگ قیلووچی دفتری یا-ده اوچا، اوتگن کون ینگی بیر گزارش‌ده ایتگن که، افغانستان ده قشاقلیک میزانی ۲۰۲۰-ییل‌ده ۴۷ فایز، ۲۰۲۱-ییل‌ده ۷۰ فایز و ۲۰۲۲-ییل‌ده ایسه ۹۷ فایز گه ییتیشگن.
درآمد‌لر نینگ کمه‌یشی، قیمت‌لر نینگ یوقاری کیتیشی و سونگی اقتصادی قیین‌چیلیک‌لر اوشبو مملکت یشاوچیلری آره‌سیده قشاقلیک نینگ کوپه‌یشی گه سبب بولگن دیر.
اوچا نینگ آگاه‌لنتیریشیچه، نیازمند کیشی‌لر گه یاردم بیریش اوچون، خلق‌ارا نهاد‌لر تیزلیککه اقدام قیلیش‌‌لری کیره‌ک.
بیزلرنینگ فیسبوک صحیفه‌میزگه باش اورینگ!
ایرتنگ‌دن آخشم‌گچه کفش رنگ قیله‌دیگن کابل یشاوچیسی بولمیش نورمحمد نینگ ایتیشیچه، ۷ کیشی‌لیک بیر عایله نینگ سرپرستی دیر و بو کون‌لر قنچه سعی و حرکت قیلسه هم، تورموش اورتاغی بیلن باله‌لری نینگ قرنی نی تویغزه‌آلمه‌یدی.
شونده‌ی بیرحالده، اقتصادی ایش بیلرمان‌لردن عبدالبصیر ترکی مملکت‌ده‌گی اقتصادی قیین‌چیلیک خصوصیده خواطر بیلدیریب و ایتیشیچه، ایش زمینه‌لری و سونگی سووتاشقین‌لر، افغانستان ده قشاقلیک نینگ کوپه‌یشی گه سبب بولگن.
بیراق سیاسی ایشلر بیلرمان‌لردن بیر قطاری نینگ ایتیشلریچه، دنیا جماعه نینگ ایسته‌کلری اسلامی امارت تامانیدن قبول قیلینمه‌ی و اسلامی امارت نینگ رسمیت گه تانیلمه‌گنی سبب، مملکت‌ده قشاقلیک کوپه‌یگن دیر.
سیاسی ایش بیلرمان‌لردن بیری احمد‌خان اندر، افغانستان ده قشاقلیک کوپه‌یگنیدن خواطر بیلدیریب و ایتیشیچه، حاضرگی وضعیت نینگ دوام قیلگنی صورت‌ده، نادارلیک اجتماعی و خوفسیزلیک قیین‌چیلیک‌لر نی هم اورته گه کیلتیرییشی ممکن.
عین حالده، اسلامی امارت مسئوللری نینگ ایتیشلریچه، آمریکا بانک‌‌لریده افغانستان پول‌لری نینگ یاپیق قالگنی و اسلامی امارت گه وضع بولگن چیکلاولر مملکت‌ده نادارلیک نینگ کوپه‌یشی گه سبب بولگن.
اسلامی امارت سوزلاوچی اورین‌باسرلریدن بلال‌کریمی نینگ سلام‌وطندار گه ایتیشیچه، اسلامی امارت مملکت‌ده قشاقلیک کمه‌یشی اوچون بیر قطار برنامه‌لر نی قولگه آلگن دیر.
باشقه تاماندن قحطچیلیک و آچرچیلیک خلق‌ارا شاخص‌لر رویخطی ده، افغانستان ۱۲۱ مملکت ارا، ۱۰۹- اورین گه قرار تاپگن.
بیزلرنینگ توییترده هم تعقیب قیلینگ!
مذکور گزارش‌ده کیلگن که، افغانستان یامان آزیق-آوقات کم‌لیگی وضعیتی‌ده قرار تاپگن و دنیا‌ده یشاوچیلریدن کوپ قطاری ییمککه قول تاپه آلمه‌گن مملکت‌لردن بیری دیر.
شونینگدیک ینگی‌لیکده افغانی قیزیل آی جمعیتی‌ده ایتگن که، افغانستان جمعیتی‌دن یریمی‌دن آرتیغی عاجل یاردم‌لر گه نیازلری بار و مذکور مملت یشاوچیلریدن ۸دن ۱۰ میلیونی آچلیک‌دن رنج ایلته‌دیلر.
ایتیش کیره‌ک که، شونینگدیک بوندن آلدین هم بیرلشگن ملت‌لر تشکیلاتی نینگ انسان دوستلیک یاردم‌لر هماهنگ قیلووچی دفتری کیله‌سی قیش موسمی‌ده افغانستان اوچون نیاز بولگن یاردم‌لر تکمیل بولمه‌گنی خصوصیده هشدار بیریب و ایتگن ایدی که، اوشبو یاردم‌لر مذکور نهاد نینگ اختیاری قرار تاپمه‌گنی صورت‌ده، کیله‌سی قیش‌ده افغانستان نینگ اوزاق بولیم‌لریده اهالی‌دن کوپ قطاری آچلیک سبب، تلف بولیش‌لری ممکن.
