اوزبیکستان جمهور باشلیغی شوکت میرضیایف و آذربایجان جمهور باشلیغی الهام علیوف، ینگی تاشکینتده آذربایجان باغینی برپا ایتیش ایشلرینی باشلب بیردی.
اوزبیکستان جمهورلیک ریاستی گه کوره، باغ اوچون ینگی تاشکینتده ۴ هکتار میدان اجرهتیلگن. بو ییرده آذربایجاننینگ بای مدنیتی، کوپ عصرلیک تاریخی و ملی عنعنهلرینی عکس ایتتیرهدیگن زمانهوی جماعت مکانی تشکیل ایتیلهدی. او ایکی قرداش خلقنینگ مدنی یقینلیگی و دوستلیگینی نمایان ایتهدیگن مسکن گه ایلنهدی.
شو بیلن بیرگه، بوندن ایلگری اوزبیکستان جمهور باشلیغی شوکت میرضایف آذربایجان گه قیلگن رسمی سفری دایرهسیده، باکو شهرینینگ «آق شهر» حدودیده اوزبیکستان باغینینگ تمل تاشینی قویگن ایدی.
۴.۵ هکتار میدانده تشکیل ایتیلهدیگن اوشبو مجموعهده اوزبیکستاننینگ بای مدنیتی و عنعنهلری، ملی معمارچیلیک مکتبی اوزیگه خاص طرزده نمایان ایتیلهدی. اونده اوشبو مملکت تاریخی آبدهلرینینگ معماری تمثاللری، یشیل حدودلر و سیر مسکنلرینی برپا ایتیش کوزده توتیلگن.
ایسلهتیب اوتهمیز، آذربایجان جمهور باشلیغی الهام علیاوف و تورموش اورتاغی ۱ سنبله/۲۳ آگست، یکشنبه کونی شوکت میرضیایفنینگ تکلیفی گه بناً اوزبیکستان گه بارگندی. ایکی دولت ییتکچیلری عالی درجهدهگی مذاکرهلر همده عالی دولتلر ارا کینگشینینگ اوچینچی ییغیلیشینی اوتکزدی و اونی یانیده سلماقلی حجتلر توپلمی امضالنیب، و بیرقطار اقتصادی و انسان پرورلیک لایحهلرنی ایشگه توشیردی.
