سلام‌وطندار نینگ افغانستان ده‌گی ۲۰ سپورتچی عیال بیلن اوتکزگن صحبتی اساسیده، مذکور عیال‌لردن ۱۷ ته‌سی عیاللر سپورتی برابریده یره‌تیلگن چیکلاولر سبب، مملکت‌دن تشقی گه مهاجرت قیلیش نی ایسته‌یدی.
اوشبو عیاللر سلام‌وطندار بیلن اوتکزگنلری صحبت‌لرده ایتیشلریچه، سپورت بولیمیده اوز مقصد‌لری گه ایریشیش اوچون، باشقه مملکت‌لر گه مهاجرت قیلیش نی ایسته‌یدیلر.
صحبت اوتکزیلگن ۲۰ عیال‌دن، تورلی سپورت بولیمیده ۱۷ ته‌سی ملی تیرمه جماعه سپورتچیسی و اوچ ته‌سی ایسه دولتی سپورت اعضاسی ایکن که، افغانستان ده عیاللر سپورتی برابریده یره‌تیلگن چیکلاولر و ستدیون‌لر نینگ یاپیلیشی سبب، حاضر ایسه ایش‌سیز بولیب و اویده قالگنلر.
صحبت اوتکزیلگن ۱۷ عیال‌دن، ایکی ته‌سی «موی‌تای» ملی تیرمه جماعه‌سی سپورتچیسی، توقیز ته‌سی فوتبال ملی تیرمه جماعه‌سی سپورتچیسی، بیش ته‌سی والیبال و بیر ته‌سی ایسه بوکس ملی تیرمه جماعه‌سی سپورتچیسی ایکن دیر.
بیزلرنینگ «ایکس» ترماغی ده هم تعقیب قیلینگ!
ملی تیرمه جماعه‌سی گه شامل بولمه‌گن باشقه اوچ سپورتچیلردن بیرته‌سی موی‌تای، بیر ته‌سی فیتنس بولیمی سپورتچیسی و باشقه بیر ته‌سی ایسه افغانستان نینگ فوتبال ملی تیرمه جماعه‌سی فدراسیونی نینگ «کابل کلپ» تیمی سپورتچیسی و بوکس بولیمی سپورتچیسی ایکن.
اوشبو گزارش‌ده صحبت قیلینگن عیال سپورتچیلر آره‌سیدن، جمهوریت توزومی‌ده بوکس بولیمیده بولگن یالغیز بیر سپورتچی، حاضر پاکستان ده حیات کیچیرماقده.
ملی تیرمه جماعه‌ده بیش ییل موی‌تای بولیمی سپورتچیسی پروین حسینی و شونینگدیک ۱۲ ییل افغانستان عیاللر فوتبال ملی تیرمه جماعه سپورتچیسی عمره نینگ ایتیشلریچه، عیال سپورتچیلر برابریده یره‌تیلگن چیکلاولر سبب، مملکت نینگ ترک قیلیش گه قرار آلگنلر.
پروین نینگ ایتیشیچه: «شخصاً اوزیم اوچون سپورت قیلیش اینگ اونملی ایسته‌کلریم‌دن ایدی و بیر کون اوشبو هدفیم بیلن اوزیم، اولکه‌م و اهالیم اوچون فایده‌لی بولیش نی آرزو قیله‌ر ایدیم. مذکور وضعیت نینگ اوزگرمه‌گنی و عیاللر گه حق بیریلمه‌گنی صورت‌ده، بو ییرده بوله آلمه‌یمن.»
شونینگدیک عمره نینگ ایتیشیچه، ایرکین بیر شکلده سپورت قیله آلگنی بیر مملکت‌ده حیات کیچیریش نی ایسته‌یدی. «قیسی مملکت بولگنی اونملی ایمس؛ آسیا بولسین یا-ده اروپا یا هم باشقه هر نرسه، یالغیز ایرکین شکلده سپورت قیله آله‌ی، انسانی حقیم بولسین و ایرکین بیر شکلده ایسته‌گنیم نرسه‌لر گه یتیشه‌ی.»
بو آره‌ده سلام‌وطندار بیلن صحبت قیلگن ۲۰ سپورتچیدن، ۱۷ ته‌سی نینگ ایتیشلریچه، سرپرست حکومت تامانیدن عیاللر سپورتی برابریده یره‌تیلگن چیکلاولر سبب، روحی قیینچیلیکلر بیلن روپه‌ره بولگنلر.
اولر نینگ ایتیشلریچه، ایسته‌ک و آرزولری گه ایریشیش امیدی نی قولدن بیرگنلریدن کیین، حیات‌دن زیریکیب و حیات نینگ دوام بیریش اولر اوچون قیین بولگن.
میدان‌وردک یشاوچیسی بولمیش فوتبال سپورتچیسی مروه نینگ سلام‌وطندار گه ایتیشیچه: «کوپ سپورت قیلگنی‌میز اوچون وجودیمیز سپورت گه عادت قیلگن ایدی و سپورت نی ترک قیلگنی‌میزده، دایم افسرده بولیب و وجودیمیز زیان کورگن. روحی نقطه‌ی نظردن، آرزولریمیز اورته‌دن کیتدی؛ توزوم نینگ اوزگریشی بیلن، برچه آرزولریمیز توپراق آستی بولدی.»
شونینگدیک ییتی ییل تنلنگن اوسمیرلر جماعه‌سیده اوینه‌گن پروان یشاوچیسی صفا گلزار نینگ ایتیشیچه، روحی نقطه‌ی نظردن کوپینچه زیان کورگن. اونینگ کوپه‌یتیریشیچه: «کوپینچه روحی زیان کوردیم که حتا روحی دارو قوللندیم و روحی مشاوره‌لر آلدیم؛ چونکه کوپ زحمت قیلگن ایدیم.»
بولر گه علاوه، اوشبو گزارش‌ده صحبت قیلینگن عیاللر آره‌سیدن، ۱۴ ته‌سی نینگ سلام‌وطندار گه ایتیشلریچه، اوتگن ییل‌لرده بو یول‌دن قولگه کیلتیره‌دیگنلری درآمد بیلن، عایله خره‌جتلری نی تامین قیله‌ر ایکنلر؛ بیرق حاضر ایسه باشقه قیینچیلیکلر یانیده، یامان اقتصادی وضعیت‌ده قرار تاپگنلر.
فوتبال و اسکیت بولیمی اوینه‌یدگن سمنگان یشاوچیسی شیما محمدی نینگ ایتیشیچه: «اقتصادی وضعیتی‌میز هیچ یخشی ایمس، حتا مین و عایله نینگ آچ اوتکزگنیمیز کون‌لر هم بار. افغانستان ده قیزلر اوچون باشقه یول و چاره قالمه‌‌گن.»
شونده‌ی بیرحالده، افغانستان ملی تیرمه جماعه‌سی و بوکس بولیمیده ۱۲ ییل اوینه‌یدیگن سمنگان یشاوچیسی زهرا (مستعار آت) نینگ ایتیشیچه، اکه‌سی یوق و آته‌سی ایسه کیکسه دیر؛ انه شوو سبب، عیاللر نینگ سپورت‌دن منع بولگنی سبب، باشقه‌لر نینگ اویلریده ایشلش گه یوز کیلتیرگن. اونینگ کوپه‌یتیریشیچه، اوتگن ایکی ییل‌ده حیات قیین‌چیلیکلری اونینگ اوچون کوپ و قیین بولگنی سبب، بیر مرته اوزی نی اولدیریش گه هم قصد قیلگن.
زهرا نینگ کوپه‌یتیریشیچه: «اقتصادی قیینچیلیکلر جوده‌یم قیین دیر. اکه‌م یوق و آته‌م هم کیکسه دیر، خرچ و خره‌جتیم نی کیم بیرسین؟ نیمه ایش قیله‌ی؟ عایله خره‌جتی نی تامین قیله آلمه‌یمن. عایله‌م که حلال نان تاپه‌ی دیب باشقه‌لر نینگ اویی گه باریب ایشله‌دیم.»
عین حالده، سابق توزوم‌ده افغانستان نینگ ملی والیبال فدراسیون اورین‌باسری زهرا فیاضی نینگ ایتیشیچه، افغانستان ده‌گی عیاللر گه هیچ قنده‌ی سپورت فعالیتی اوچون رخصت بیریلمه‌گن. او خلق‌ارا نهاد‌لردن افغانستان ده‌گی سپورتچی عیال‌لردن حمایت بولینیشی نی ایسته‌گن. «قیغو بیلن عیاللر گه هیچ قنده‌ی سپورت فعالیتی اوچون رخصت بیریلمه‌گن و قریب اولردن برچه‌سی ایش‌سیز بولیب اویده قالگن. خلق‌ارا نهاد‌لردن عیال‌لردن حمایت بولینشی و افغانستان عیال‌لری نینگ اونوتیلمه‌سلیگی نی ایسته‌میز.»
شونده‌ی بیرحالده، سپورت ایشلری بوییچه ایش بیلرمان‌لریدن قطاری نینگ ایتیشلریچه، سپورت انسان نینگ ساغلیگی اوچون فایده‌لی دیر و سپورت بولیمی‌دن عیاللر نینگ حذف قیلیش، اولر نینگ جسمی و روحی کسللیکلر گه چیلنتیره‌دی. اولر سرپرست حکومت‌دن عیاللر گه اسلام قاعده-قانونی اساسیده سپورت قیلیشلری اوچون فرصت‌لر یره‌تیلشی نی ایسته‌یدیلر.
بو توغریده سپورت ایشلری بوییچه ایش بیلرمانی ضیاءالله حسینی نینگ ایتیشیچه: «سپورتچی صفتیده، شریعت و اسلامی مملکت‌لر اساسیده،عیاللر گه سپورت اوچون رخصت بیریلیشی نی ایسته‌یمیز، اسلام امیر‌لیگی اوز قاعده-قانونی اساسیده، عیاللر گه سپورت کلپ‌لری نی توزه‌تیب و اولر نینگ سپورت قیلیشلری اوچون رخصت بیرسین.»
شو بیلن بیرگه، عیال حقوقی فعاللری سپورت بولیمیده عیاللر نینگ منع بولیشی سببی نی نابیللی دیب و اسلام امیر‌لیگی‌دن عیاللر گه سپورت اوچون رخصت بیریلیشی نی ایسته‌یدیلر. اولر عیاللر سپورتی برابریده‌گی یره‌تیلگن چیکلاولر نینگ دوام قیلگنی صورت‌ده، عیاللر آره‌سیده روحی قیینچیلیکلر نینگ کوپه‌یشی خصوصیده تاکید قیلگنلر.
عیال حقوقی فعاللریدن زهرا محمدی نینگ ایتیشیچه: «باشقه موضوع‌لر کبی، بو هم نامعلوم و گنگ سببی بولیشی ممکن که، حکومت نیگه سپورت اوچون عیاللر گه رخصت بیریلمه‌یدی؟ حکومت‌دن اهالی گه عادی حیاتلری نی دوام بیریشلری اوچون رخصت بیریلیشی نی ایسته‌یمیز.»
بیزلرنینگ فیسبوک صحیفه‌میزگه باش اورینگ!
شونینگدیک عیال حقوقی فعاللریدن باشقه بیری فروزان داوودزی نینگ ایتیشیچه، کوپینچه چیکلاولر نینگ یره‌تیلیشی، جمعیت نینگ کوپینچه قیینچیلیکلر بیلن روپه‌ره بولیشی گه سبب بوله‌دی. «سینگیل‌لریمیزدن کوپینچه‌سی روحی باسیم‌لر آستیده دیر، بو باسیم‌لر نینگ کوپه‌یگنی صورت‌ده، مذکور موضوع‌لر جمعیت نینگ قیین‌‌چیلیک تامان تارته‌دی. اسلام امیر‌لیگی‌دن سپورت ساحه‌لری نینگ یاپیلمه‌سلیگی نی ایسته‌یمیز.»
باشقه بیر تامان‌دن، کابل یشاوچیلریدن قطاری، سپورت نینگ انسان ساغلیگی اوچون فایده‌لی دیب و سرپرست حکومت‌دن ایرککلر یانیده، عیاللر گه سپورت زمینه‌سی یره‌تیلشی نی ایسته‌دیلر.
کابل شهری یشاوچیسی فیروزه رسولی نینگ ایتیشیچه: «سپورت ایرکک و عیال اوچون فایده‌لی دیر. اسلام امیر‌لیگی حکومتی‌دن قیزلر گه سپورت زمینه‌سی یره‌تیلیشی نی ایسته‌میز.»
کابل یشاوچیلریدن باشقه بیری مرضیه احمدی نینگ ایتیشیچه، حاضرگی وضعیت‌ده سپورت قیله آلمه‌گن عیاللر، تورلی‌خیل کسللیکلر گه چلینگنلر. «نیچه همکار و دوستیم نینگ سپورت نی ترک قیلگنی‌دن کیین وزن آلیب و تورلی‌خیل روحی کسللیکلر گه روپه‌ره بولگنلری گه شاهد‌مین.»
بو گزارش‌ده المپیک ملی کمیته مسئوللری و حکومتی باشقه نهاد‌لری نینگ عیاللر سپورتی و سپورت وضعیتی خصوصیده فکرلری نی آلیش ایسته‌دیک؛ بیراق کوپینچه سعی و حرکت بیلن موفق بولمه‌دیک.
عین حالده، انسان حقوقی کوزه‌تووچیسی، ۱۴۰۱-ییل ۱۵-قوس، مملکت‌ده عیاللر سپورتی برابریده یره‌تیلگن چیکلاولر سبب، المپیک کمیته‌سیده افغانستان عضویتی نینگ تعلیق بولگنی نی اعلام قیلگن ایدی.