سلام‌وطندار بو مرته بیلیم اورگه‌نیش یا-ده ناچارلیک یوزیدن ترکیه گه مهاجر بولگن طلبه‌لر، رسانه و مدنی فعاللری بیلن افغانستان تینچلیگی توغریسیده صحبت اوتکزگن.
مذکور یاش‌لردن بیری منیره اورگنج دیر که اونینگ رسانه، نقاش‌لیک و شاعرلیک بولیمیده اوزون قولی بار. خانم اورگنج ژورنالیزم و عامه اداره بولیمیده ایکی لیسانس حجتی گه ایگه دیر و او، نیچه ییل دن بویان ترکیه‌ده بیلیم اورگه‌نیش بیلن شغلله‌نیب کیلماقده.
منیره نینگ ایتیشیچه: «افغانستان ده یریم قرن دن بویان دوام ایتیب کیله‌دیگن اوروش یکونله‌نیشی و مملکتده هرتامانمله و عزتلی بیر تینچلیک تأمین‌لنیشی نیچه نسل نینگ آرزوسی دیر.»
منیره اورگنج نینگ ایشانچی گه کوره، افغانستان نینگ اوزون پیتلی اوروشیده اینگ کتته جانی و روحی ضرر نی ییگیتلر اینیقسه هر قنده‌ی امکانیتدن اوزاق یشه‌یدیگن عیاللر کورگن. اونگه کوره، افغانستان ده اهالی اینیقسه ییگیت‌لرنینگ برابریده کوپ قیینچیلیکلر موجود.
- مهاجرلیک؛ مقصد یا-ده اولیم گه آلیب باره‌دیگن یول
- مهاجرلر: تینچلیک تأمین‌لنگن صورتده، مملکت گه قیته‌میز
- نامنظم مهاجرلیک و اروپاده‌گی افغانستانلیک مهاجرلرنینگ نامعلوم سرنوشتی
منیره افغانستان باله‌لری و ییگیت‌لری نینگ کیله‌جگی توغریسیده خواطر بیلدیریب ایتیشیچه: «افغانستان باله‌لری زور ایشلر بیلن شغلله‌نیب کیلماقده و افغانستان ییگیت‌لری ایسه ناامید دیر و اولرنینگ کیله‌جگی توغریسیده هیچ قنده‌ی امیدی یوق و بو هر قنده‌ی قیینچیلیک دن خوفلی دیر. ییگیت‌لری کیله‌جگی توغریسیده امیدی بولمه‌گن جامعه نابود بولیش گه محکوم دیر.»
منیره ییگیت‌لرنینگ ناتینچلیک دن قورقیب قاچیشی و بونینگ افغانستان کیله‌جگی اوستیگه سلبی تأثیری توغریسیده سلام‌وطندار تامانیدن سوره‌لگن سوراققه جواب بیریب ایتیشیچه، ییگیت‌لردن کوپینچه‌سی ناقانونی مهاجرلیک آرقه‌لی تینچ بیر حیات اَختره‌دی و بو یوللر ییگیت‌لرنینگ ضرری گه تمام بوله‌دی. منیره اورگنج نینگ ایتیشیچه، ناقانونی یوللر آرقه‌لی مهاجرلیککه یوز کیلتیرگن کیشیلر یا جانی نی قولدن بیرگن یا هم روانی قیینچیلیکلرگه چلینگن.
سلام‌وطندار اوزبیکی نی فیسبوککه هم تعقیب قیلینگ!
مذکور خانم نینگ کوپه‌یتیریشیچه، افغانستان دن تشقی بیلیم اورگه‌نیش بیلن شغللنگن ییگیتلر، مملکتده تینچلیک تأمین ایتیلیشی و قیته‌دن مملکتده کیلیشلرینی کوتیب تورگن.
منیره اورگنج نینگ ایتیشیچه، طالبان بیلن تینچلیک ییغین‌لری ایجابی نتیجه بیریشی و اهالی بیلیم اورگه‌نیش حقی، ایرکین یشش حقی، ایش قیلماق حقی و تینچ نفس تارتیش حقی گه ایگه بولیشی گه امیدوار دیر.
اسلم تیمور ترکیه ده یشه‌یدیگن افغانستان رسانه و مدنی فعاللریدن بیری دیر. اونینگ طالبان بیلن تینچلیک توغریسیده باشقچه بیر فکری بار. اسلم افغانستان بیلن طالبان نینگ تینچلیک سوزلشوولری و شونینگدیک افغانستان تینچلیگی توغریسیده استانبول ییغینی یولگه قوییلیشی گه، باشقه هر بیر مملکت گه نسبتن ترکیه نینگ نقشی نی یوقاری بیله‌دی.
اوشبو رسانه فعالی گه کوره، ترکیه پاکستان بیلن و پاکستان ایسه ترکیه بیلن یخشی علاقه‌سی بار. شو یوزه‌دن افغانستان دولتی اورته گه کیلگن فرصت دن یخشی فایده‌لنه آله‌دی. بولمه‌گن صورتده طالبان قان توکیش گه دوام بیریشی ممکن.
سلام‌وطندار اوزبیکی نی توییترده هم تعقیب قیلینگ!
اسلم تیمور نینگ ایتیشیچه: افغانستان و طالبان آره‌سیده‌گی تینچلیک سوزلشوولری نینگ کم‌چیلیک‌لری بولگن صورتده هم، افغانستان اهالیسی بو مملکتده تینچلیک تأمین‌لنیشی گه امیدوار دیر. تینچلیک سوزلشوولریده طالبان اوزلرینی افغانستان دولتی گه کوره قدرتلی دیب بیله‌دی. چونکه افغانستان دولتی طالبان نی باسیم یا-ده حربی باسیم بیلن سوزلشووگه حاضر قیلمه‌گن، بلکیم تینچ بیر شکلده اولردن افغانستان دولتی بیلن صحبت اوتکزیشی نی سوره‌گن.
شونینگدیک ترکیه‌ده یشه‌یدیگن افغانستانلیک مهاجرلردن باشقه بیری حیات‌الله بیگ‌اوغلی، تینچلیک پروسه‌سی توغریسیده مذکور مملکت نینگ نقشی نی قطر، پاکستان و روسیه مملکت‌لریگه نسبتن امیدوارلنیرووچی دیگن. اوشبو مدنی فعال و شاعر ییگیت حاضر ترکیه نینگ استانبول شهریده آغیر ایشلر بیلن شغللنگن.
افغانستان تینچلیگی توغریسیده استانبول ییغینی ۲۴- اپریل ده دولت، طالبان، دنیا و منطقه مملکت‌لری نینگ نماینده‌لرینی حضوری بیلن ترکیه نینگ استانبول شهریده باشله‌نیب و ۱۰ کون گچه یولگه قوییلیشی گه قرار قیلینگن ایدی؛ بیراق بو ییغین کیچیکتیریلدی.
