افغانستان تیمیر یولی اداره مسئول‌لریدن بولمیش انجنیر میرویس نینگ سلام‌وطندار گه ایتیشیچه، یقینده افغانستان، پاکستان و اوزبیکستان رسمی‌لری آره‌سیده اوچ تامانلمه ییغین اوتکزیلیشی کوتیله‌دی و بو ییغینده اورته آسیانی افغانستان آرقه‌لی جنوبی آسیا گه باغلش کریدور بحث گه آلینیشی ممکن.
اونینگ کوپه‌یتریشیچه، اوشبو پروژه نینگ اکثر بولیم‌لری افغانستان توپراغیدن اوته‌دی که بویوک شهرلرنی بیر-بیری گه باغلب و کتته درآمد قولگه کیله‌دی. جناب میرویس گه کوره، مذکور پروژه افغانستان اوچون استراتیژیک اهمیتی بولیشی‌گه علاوه، منطقه مملکت‌لری اوچون فایده‌لی دیر.
بیزلرنینگ فیسبوک صحیفه‌میزگه باش اورینگ!
اونگه کوره، اوشبو ییغینده یول خریطه‌سی اوچ مملکت تامانیدن ایجاد و امضاله‌نیب و مذکور پروژه نینگ باشله‌نیش تاریخی و خرجتی انیقلنیشی ممکن. اونینگ ایتیشیچه: «یول خریطه‌سی ایجاد ایتیلیش اوچون تیارگرلیک کوریلماقده و انشاء‌الله تیزلیک بیلن اوتکزیله‌دیگن ییغینده، یول خریطه‌سی امضاله‌نیب و افغانستان‌ده پروژه نینگ عملی ایشی باشله‌نیشی ممکن.»
عین‌حالده، اقتصادی ایش بیلرمان تاج‌محمد تلاش، اوشبو تیمیر یول قوریلیشینی منطقه اینیقسه افغانستان اوچون اونملی بیله‌دی. اونگه کوره، مذکور بویوک پروژه عملی بولیشی بیلن بیرقطار کیشی‌لر ایش بیلن تأمینله‌نیب و صادرات میزانی آشه‌دی.
تاج‌محمد تلاش نینگ ایتیشچیه، بو ایش آرقه‌لی میلیون‌لرچه دالر ملی درآمد گه اضافه بوله‌دی، منطقه مملکت‌لری آره‌سیده سوداگرلیک کوچه‌یب و نهایت اوشبو پروژه افغانستان اونمیگه دیر. اونگه کوره: «افغانستان نینگ حاضرگی شرایطی‌ده بو گَل پروژه‌لر عملگه آشیریلیشی اقتصادیات کوچه‌یشیگه سبب بولیب و اوزاق مدت ده اوشبو پروژه‌دن اقتصادی سود قیلیشمیز ممکن.»
بیزلرنینگ توییترده هم تعقیب قیلینگ!
ایتیش کیره‌ک که، اورته آسیانی جنوبی آسیا بیلن باغله‌یدیگن تیمیر یولی نینگ اکثر بولیم‌لری، مملکت نینگ مهم ولایت‌لریدن اوته‌دی و جلال‌آباد شهری نی پشاور بیلن باغله‌یدی. مذکور پروژه نینگ دستلبکی ایشلرینی بیر ییل آلدین سابق حکومت باشقه ایکی مملکت بیلن بحث گه آلگندی و افغانستان، پاکستان و اوزبیکستان آره‌سیده بعضی بیتیم‌لرگه قول قوییلگن ایدی.
حاضر اسلامی امارت، اوشبو بویوک پروژه نینگ عملی ایشی باشله‌نیشی اوچون سعی-حرکت قیلماقده و بو پروژه نینگ امنیتینی اسلامی امارت ایچکی ایشلر وزیرلیگی زمه‌سیگه آلگن و ۴ مینگ امنیتی کوچی، مذکور پروژه نینگ امنیتینی تأمین ایتیش‌لری کوتیله‌دی.
