بوگون (پنجشنبه، ۲۰- قوس) خواف – هرات تیمیر یولی افغانستان و ایران اولکه‌لری نینگ مسؤل‌لری تامانیدن رسمی شکلده آچیلدی. اوشبو تیمیر یول ایکی اولکه آره‌سیده‌گی بیرینچی تیمیر یول بولیب و هر ییل ۶ میلیون تُن سوداگرلیک توار و ۱ میلیون مسافر جایلشتیریش ظرفیتی گه ایگه بولگن.
هرات – خواف تیمیر یولی نینگ آچیلیش مراسمیده افغانستان جمهور رئیسی محمد اشرف غنی و ایران جمهور رئیسی حسن روحانی آنلاین شکلده صحبت قیلگنلر.
جمهور رئیس محمد اشرف غنی نینگ ایتیشیچه، خواف – هرات تیمیر یولی آچیلیش پروژه‌سی، تاریخی بیر پروژه دیر و اوشبو پروژه ایکی مملکت نینگ اقتصادی رواجله‌نیشی اوچون جوده اونملی بولگن.
عین‌حالده جناب غنی گه کوره، خواف – هرات تیمیر یول پروژه‌سی نینگ تکمیل بولگنی افغانستان – ایران اولکه‌لری نینگ ملی اراده‌سینی نشانه‌سی دیر.
انه‌شوحالده، ایران جمهور رئیسی محمد حسن روحانی هرات – خواف تیمیر یول آچیلیش مراسمیده صحبت اوتکزیب، اوشبو تیمیر یول آچیلیشی بیلن ایکی اولکه نینگ علاقه‌لری کوچلنیشی ممکن دیگن.
تیمیر یول ایرکین اداره‌سی باشلیغی یما شمس نینگ ایتیشیچه، هرات – خواف تیمیر یولی آچیلیشی بیلن افغانستان، ایران جنوبی بندری و ایران – ترکیه تیمیر یولی شبکه‌سی آرقه‌لی اروپا بیرلیگی گه باغلنیشی ممکن.
ایران اولکه سی نینگ یول و شهرلرنی قوریش وزیری محمد اسلامی گه کوره، هرات – خواف تیمیر یولی نینگ ۲۲۵ کیلومتریدن ۱۴۰ کیلومتری توزه‌لیب و فایده‌لنیش گه تاپشیریلگن و قالگن ۸۵ کیلومتری هم تیزلیککه توزه‌لیشی ممکن.
جناب اسلامی نینگ ایتیشیچه، هرات – خواف تیمیر یولی آچیلیشی بیلن ایران – افغانستان سوداگرلری نینگ ایشی آسان بولیشی ممکن.
اوشبو تیمیر یول آرقه‌لی، ایران نینگ سوداگرلیک توارلری افغانستان گه و افغانستان نینگ سوداگرلیک توارلری دنیا اولکه‌لریگه صادر بوله‌دی.
اوشبو تیمیر یول نینگ قالگن ایشی هرات شهری نینگ روزنک منطقه‌سیدن باشله‌نیب، هرات جنوبیده‌گی صنعتی شهرچه‌ده تمام‌لنه‌دی.
هرات – خواف تیمیر یولی نینگ اوزون‌لیگی ۲۲۵ کیلومتر دیر. اوشبو تیمیر یول نینگ ۴ بولیمی بار کیم ۲ بولیمی ایران و ۲ بولیمی افغانستان توپراق‌لریده دیر. ایران توپراق‌لریده‌گی بولیم‌لرنینگ ایشی تمام‌لنگن و افغانستان توپراق‌لریده‌گی ۲ بولیم‌دن ۱ بولیمی نینگ ایشی تمام‌لنگن و قالگن بیر بولیمی نینگ ایشی یقیینده باشلندی.
