دولت مذاکره قیلووچی هیأت اعضالری نینگ ایتیش‌لریچه، بحث قیلینگن آجندا گه وقتینچه‌لیک حکومت توغریسیده هیچ بیر موضوع یوق و حاضرگچه طالبان هم بو موضوع نی هیچ ارایه قیلمه‌گن.
بوگون (یکشنبه ۱۲- دلو) دوحه‌ده دولت مذاکره قیلووچی هیأت اعضالریدن رسول طالب، غلام‌فاروق مجروح و شریفه زرمتی آنلاین بیر ییغین آرقه‌لی خبرچیلرگه ایتیش‌لریچه، تینچلیک سوزلشوولریده هیچ قنده‌ی «بن‌بست» اورته گه کیلمه‌گن، بیراق سوزلشوولر سیکین‌لیککه و وقفه گه دوچ کیلگن. اولر تینچلیک سوزلشوولری نینگ توختلگنی سببی نی سوزلشوولر اوچون طالبان نینگ اونچه‌لیک قیزیقمه‌گنی دیگن.
افغانستان دولتی نینگ مذاکره قیلووچی هیأت اعضاسی رسول طالب نینگ ایتیشیچه، طالبان بیلن سوزلشوولر باشلنگنیدن حاضرگچه وقتینچه‌لیک حکومت خصوصیده هیچ بیر موضوع ارایه ایتیلمه‌گن.
جناب طالب نینگ اورغولشیچه، طالبان اعضالری باشقه بیر مملکتدن جمهوررئیس نینگ استعفا موضوعی نی مطرح قیله‌دی کیم اونینگ رسمتی یوق. اونینگ کوپه‌یتیریشیچه، طالبان نینگ بحث قیله‌دیگن بیر موضوعی بولگن صورتده، تینچلیک سوزلشوولری نینگ میزی گه حاضر بولیب ارایه قیلیش کیره‌ک، نه باشقه بیر مملکتدن.
مذکور هیأت باشقه بیر اعضاسی شریفه زرمتی نینگ ایتیشیچه، ۱۶- جدی دن حاضرگچه طالبان و افغانستان هیأتی آره‌سیده یالغیز اوچ ییغین یولگه قوییلگن. بیرینچی ییغینده دولت هیأتی آتیش کیسین موضوعی نی اورته گه قویدی، بیراق طالبان هیأتی رهبرلری بیلن مصلحت قیلگندن کیین بو حقده جواب بیریش‌لرینی بیلدیرگن.
خانم زرمتی گه کوره، طالبان هیأتی نینگ باشلیغی دوحه گه قیتگنیدن کیین، یالغیز ایکی تامان هیأت‌لری آره‌سیده ییغین یولگه قوییلگن و اوندن کیین طالبان تشقی سفرلرگه یوز کیلتیرگن.
طالبان هیأتی ینگی‌لیکده ایران و مسکو گه سفر قیلگن.
طالبان گروهی سابق اعضاسی سیداکبر آغا نینگ ایتیشیچه، بو گروه هیچ قچان وقتینچه‌لیک حکومت موضوعی نی مطرح قیلمه‌گن، بیراق حاضرگی حکومت گه قتنه‌شیش نی هم ایستمه‌یدیلر.
اونگه کوره، مسکو ده طالبان مذاکره قیلووچی هیأت اورین باسری شیرمحمد عباس استانکزی، احساسات یوزیدن جمهوررئیس نینگ استعفا موضوع‌سینی بیان قیلگن، بیراق بو گروه نینگ باشقه اعضالری بو فکر گه قوشیلمه‌یدی.
افغانستان یشاوچیلری و سیاستچی‌لردن قطاری جمهوررئیس استعفاسی و وقتینچه‌لیک حکومت ایجاد ایتیلیشی نی حاضرگی وضعیت ده مملکت نینگ ضرری گه تمام بولیب و اونینگ قوشنی مملکتلردن قطاری نینگ آجنداسی دیب بیله‌دیلر، بیراق باشقه بیر قطاری ایسه مملکتده تینچلیک تأمین‌لنیشی اوچون وقتینچه‌لیک حکومت ایجاد ایتیلیشی اوستیگه اورغولب و اوندن حمایت بیلدیرگنلر.
