هلمند ولایتی مرکزی لشکرگاه شهرینینگ بیر چیکهسیده، ۳۹ درجهلی ایسیقده، صبا کیچهنی اویقو بیلن ایمس بلکی تشویش بیلن باشلهیدی. او حاملهدار و ایکی نفر یاش فرزندی بار. جزیرمه ایسیق همده برق تیز-تیز اوزیلیشی اونینگ و بالهلرینینگ قولهی یششی اوچون برچه یوللرنی یاپیب قویگن.
صبا هر کیچه چادرنی سوو بیلن هوللب، اونینگ اوستیده اوخلهیدی؛ او اوزی هم بو اصول ساغلیغی و قارنیدهگی فرزندی اوچون فایدهلی ایمسلیگینی بیلهدی، اما باشقه چارهسی یوقلیگینی ایتهدی. او شوندهی دییدی: «حاملهدار من و کیچیک یاشلی ایکی فرزندیم بار. کیچه بویلب چادرنی هول قیلهمن و اونی اوستیده اوخلهیمن. بو اصول اوزیم و قارنیمدهگی چقهلاقنینگ ساغلیغیگه ضرری بارلیگینی بیلهمن، بیراق باشقه چارهم یوق. ایرتهلب توریب و اوی ایشلرینی قیلیشیم کیرهک. بوتون تنهم آغریدی اما بیر پنکه یا کی شارژ بولهدیگن پنکهنی ساتیب آلیشگه قوربیم ییتمهیدی.»
بیراق بو فقط هلمند ولایتیدهگی واقعه ایمس. یوزلب کیلومتر اوزاقده، ننگرهار مرکزی جلالآباد شهریده ایسه ایسیق، پامیر عایلهسی اوچون باشقه معنانی انگلتهدی؛ بو – برق هر سفر اوزیلگنده نفس آلیشی قیینلشهدیگن کسل حقیدهگی تشویش دیر.
برق اوچگنده، پنکه ایشلمهی قالهدی و عایله اعضالرینینگ قوللری اونینگ اورنینی باسهدی. اولر کسلنینگ احوالی ینهده آغیرلشیب کیتمسلیگی اوچون نوبتمه-نوبت قول پنکهسی بیلن اونگه هوا اوریب توریشهدی. اونینگ ایتیشیچه: «اوییمیزده بیر کسل بار. برق اوزیلگنده احوالی آغیرلشهدی و قول پنکهسی بیلن هوا اوریب توریشیمیز کیرهک. بالهلر ایسیق اوچون ییغلهیدی و کیکسهلر هم چیدهی آلمهیدی. کیچهلری نه کسل تینچ، نه بیز.»
افغانستان غربیده هم، هراتنینگ تختسفر یشاوچیسی زرغونه، شونگه اوخشش واقعهنی حکایه قیلهدی. اونینگ سوزلریگه کوره، برق یوقلیگی پیتیده عایله اعضالری ایسیق بیلن کورهشیش اوچون نوبتمه-نوبت قول پنکهسی بیلن بیر-بیرلریگه هوا اوریب توریشهدی. او شوندهی دییدی: «نیچه کوندن بیری هوا جوده ایسیق بولگن. برق یوق، سوویمیز هم یوق. کیچهلری ایسیق سببلی قینلهمیز. نوبت اساسیده قول پنکهسی بیلن بیر-بیریمیز گه هوا اوریب تورهمیز.»
بلخ مرکزی مزارشریف شهریده، رخسار و اونینگ عایلهسی ایسیقدن حمایهلنیش اوچون شارژی پنکه تیارلشگن. هر سفر برق کیلگنده اولرنینگ بیرینچی قیلهدیگن ایشی پنکهنی شارژ قیلیش دیر؛ چونکی اولر قچان برق اوزیلیش پیتینی بیلمهیدی. او شوندهی دییدی: «برق اوزیلگنده ایسیققه چیدهب بولمهیدی، شارژی پنکهدن برق کیتگنده فایدهلنهمیز. ساووق سوو ایچهمیز و یخراق جایگه اولتیرهمیز، بیراق برق کیتمه-کیت نیچه ساعت کیتگنده، هیچ چارهمیز یوق.»
تورت شهر، تورت عایله و تورت حکایه؛ بیراق معما بیتته: جزیرمه ایسیق، برقسیزلیک و امکانیت آزلیگی، کوپلب عایلهلرنینگ تینچلیگینی بوزگن.
بالهلر بیزاوته، کیکسهلر قیینلماقده، کسللر عذاب چیکماقده، حاملهدار عیاللر ایسه کیچهلرنی تانگ آتیش امیدی بیلن اوتکزیشهدی.
صحبت یکونلنگنده، صبا سونگی گپنی ساکن و چرچاق آوازده تیلگه کیلتیرهدی؛ بو جمله، احتمال افغانستانده مینگلب عایلهلرنینگ آغیر کونلری حقیدهگی حکایهنی افادهلشی ممکن. «کتته آرزومیز یوق؛ فقط کیچهلرنی ایسیق و برقسیز اوتکزمسلیک و تینچ اوخلش دیر.»
هوا ایسیشی و یاز فصلینینگ باشلنیشی بیلن بیر وقتده، کوپلب یشاوچیلر برق تنقیصلیگیدن شکایت قیلهدی. افغانستان احتیاجی بولگن برقنی باشقه مملکتلردن تأمینلهیدی، افغانستان برق ییتکزیش شرکت (برشنا) معلوماتلریگه کوره، مملکت یشاوچیلرینینگ اتیگی ۳۸ فایزی برقدن فایدهلنماقده.
